សមាសភាពប្រដាល់នៅប៉ុស្ដិ៍លេខ ៥ ថ្ងៃសុក្រ
រាជធានីភ្នំពេញ ៖ សេន ប៊ុនថេន អ្នកប្រដាល់ក្បាច់ខ្មែរបុរាណនៃសមាគមកីឡាប្រដាល់ក្រសួងមហាផ្ទៃ បានណាត់ម៉ី សុភាព ជាម្ចាស់ជើងឯក CTN ទំងន់៦៣,៥គីឡូក្រាម មកពីក្លឹបសិង្ហកីឡា ដើម្បីប្រកួតគ្នា នៅលើសង្វៀនប៉ុសិ៍្ដលេខ៥នាល្ងាចថ្ងៃសុក្រ ទី៨ មិថុនា ខាងមុខនេះ ។
គូនេះសុទ្ធតែជាអ្នកប្រដាល់ចាស់វស្សាដូចគ្នា ប៉ុន្ដែសំរាប់ប៊ុនថេនបានបាត់មុខពីលើសង្វៀនយូរមកហើយ ហើយការលេចមុខរបស់គេនៅលើសង្វៀនម្ដងនេះមិនទាន់ដឹងថា តើថ្វីដៃប្រយុទ្ធរបស់គេនៅល្អដូចកាល ពីមុន ឬយ៉ាងណានោះទេ ។ ការមកប៉ះជាមួយសុភាពលើកនេះ គេមិនអាចធ្វើការវាយតំលៃទុកមុនទេ ពីព្រោះសុភាពមិនមែនជាអ្នកប្រដាល់ជើងអន់ដែលងាយស្រួលក្នុងការបង្ក្រាបនោះឡើយ ។ ប៊ុនថេន មាន ស្នៀតកណ្ដាប់ដៃនិងស្នៀតកែងល្អ ដែលពេលវាយចេញម្ដងៗ គឺច្រើនតែមានប្រសិទ្ធភាព ។
ចំពោះសុភាពវិញមួយរយៈមកនេះ គេពិតជាមិនធម្មតាឡើយ ហើយទឹកចិត្ដរបស់គេក៏ត្រជាក់ដែរ មិនងាយច្រឡោតខឹងផ្ដេសផ្ដាស់នោះទេ ។ អ្នកតាមដានការប្រកួតភាគច្រើននិយាយថា ប៊ុនថេន ដែល សុំឡើងប្រកួតជាមួយសុភាពនេះ គឺមានការប្រថុយប្រថានពេកហើយ ។
អេ អូត ក្លឹបអេភូថងទន្លេបាសាក់ នឹងឡើងប្រកួតជាមួយឡុង សុផាត មកពីក្លឹបសាលវ័ន្ដកីឡា ។ រវាងគេ ទាំង២នេះ សុទ្ធតែជាអ្នកប្រដាល់ជើងថ្មីដូចគ្នា ប៉ុន្ដែសំរាប់អេ អូតមួយរយៈនេះគេឧស្សាហ៍ឃើញមានមុខ នៅលើសង្វៀនញឹកញាប់ជាងសុផាត ដូច្នេះសុផាតមិនខុសពីអ្នកប្រដាល់ជើងថ្មីប៉ុន្មានឡើយ។
វ៉ែន សាខន ក្លឹបកងរាជអាវុធហត្ថរាជធានីភ្នំពេញ ត្រូវជួបប្រកួតជាមួយឡុង បូឡា ក្លឹបពន្លឺនេអុង។ គូនេះសុទ្ធតែជាអ្នកប្រដាល់ជើងចាស់ដូចគ្នា ប៉ុន្ដែពួកគេបានបាត់មុខពីលើសង្វៀនយូរក្រែលមកហើយ។ ការជួបគ្នារវាងគេទាំង២លើកនេះ អត់មានអ្នកណាម្នាក់ហ៊ានធ្វើការសន្និដ្ឋានពីការចាញ់ឈ្នះទុកមុនបានទេ គឺមានតែរង់ចាំថ្ងៃប្រកួតមកដល់សិនប៉ុណ្ណោះ ទើបអាចដឹងបាន ។
ចាន់ សំរិត ក្លឹបតោមាស ត្រូវជួបប្រកួតជាលក្ខណៈសាកលជាមួយចេង រិទ្ធីកុសល ក្លឹបជើងទឹក វាយលើគោក។ ឯរិទ្ធី រស្មី ក្លឹបពន្លឺមានរឹទ្ធិ ត្រូវជួបប្រកួតជាមួយរាជសីហ៍ បញ្ញា ក្លឹបសំរែករាជសីហ៍ បង្ក្រាបគ្រឿងញៀន ។
Labels: កីឡា
for this post
Leave a Reply