Cambodia News: May 27, 2007

គណៈកម្មការពិនិត្យគុណភាពផ្លូវនិងស្ពានតភ្ជាប់ពីជើងឯកទៅខេត្ដកណ្ដាល

កំណាត់ផ្លូវកំពុងធ្វើការសាងសង់ត្រូវបានមន្ដ្រីចំរុះស្ថាប័នចុះធ្វើការត្រួតពិនិត្យគុណភាព

រាជធានីភ្នំពេញ ៖ គណៈកម្មការចំរុះរួមមានតំណាងក្រសួងសាធារណការ និងដឹកជញ្ជូន តំណាងក្រសួង សេដ្ឋកិច្ច និងហិរញ្ញវត្ថុ រួមជាមួយមន្ដ្រីជំនាញសាលាក្រុងភ្នំពេញ និងខេត្ដកណ្ដាល ដឹកនាំដោយលោក ជ្រាង សុផាន់ អភិបាលរងក្រុងភ្នំពេញ អមដំណើរដោយ លោកគង់ អៀង តំណាងកងវិស្វកម្មក្រសួង ការពារជាតិ បានចុះទៅពិនិត្យគុណភាពនៃការស្ថាបនាស្ពាន និងផ្លូវតភ្ជាប់ពីមជ្ឈមណ្ឌលប្រល័យ ពូជសាសន៍ជើងឯក រាជធានីភ្នំពេញ ទៅខេត្ដកណ្ដាលកាលពីព្រឹកថ្ងៃទី២៥ ឧសភា ២០០៧ ។

មន្ដ្រីសាលាក្រុងភ្នំពេញឱ្យដឹងថា សម្ដេចនាយករដ្ឋមន្ដ្រីហ៊ុន សែន បានផ្ដល់អំណោយជាស្ពាន និងផ្លូវ មួយខ្សែសំរាប់តភ្ជាប់ពីផ្លូវចូលមជ្ឈមណ្ឌលប្រល័យពូជសាសន៍ជើងឯក ទៅខេត្ដកណ្ដាល ត្រង់ចំណុចរង្វង់ មូលផ្លូវបំបែកផ្លូវជាតិលេខ២ និងលេខ៣ ដើម្បីសំរួលដល់ការលំបាករបស់ប្រជាពលរដ្ឋក្នុងការធ្វើដំណើរ។ ការសាងសង់បានចាប់ផ្ដើម នៅថ្ងៃទី២៦ កុម្ភៈ ២០០៧ ដែលពិធីបើកការដ្ឋានស្ថិតក្រោមអធិបតីភាព នាយករដ្ឋមន្ដ្រីហ៊ុន សែន ។ ការងារស្ថាបនាផ្លូវត្រូវបានអនុញ្ញាតឱ្យក្រុមហ៊ុនឯកជនមួយ ចំណែក ឯការសាងសង់ស្ពានឆ្លងស្ទឹងព្រែកត្នោតត្រូវបានអនុញ្ញាតឱ្យកងវិស្វកម្មក្រសួងការពារជាតិ ។

មន្ដ្រីដដែលបន្ថែមថា ផ្លូវដែលត្រូវស្ថាបនានោះមានប្រវែង៥.០០០ម៉ែត្រ និង ទទឹង១២ម៉ែត្រចាប់ពីផ្លូវ បំបែកចូលមជ្ឈមណ្ឌលប្រល័យពូជសាសន៍រហូតដល់រង្វង់មូលបំបែកផ្លូវជាតិលេខ២ និងលេខ៣ក្នុង ខេត្ដកណ្ដាល។ ចំណែកស្ពានឆ្លងស្ទឹងព្រែកត្នោតដែលគេដាក់ឈ្មោះថា ស្ពានព្រែកជ្រៃ ជាប្រភេទស្ពាន បេតុងប្រវែង១០៥,១៥ម៉ែត្រ និងទទឹង១១ម៉ែត្រ ។
ក្នុងឱកាសនោះលោកជ្រាង សុផាន់ បានណែនាំដល់តំណាងក្រុមហ៊ុនម៉ៅការស្ថាបនាផ្លូវ ត្រូវយកចិត្ដ ទុកដាក់កសាងឱ្យមានគុណភាព ។ លើសពីនេះទៀតពិនិត្យជាប្រចាំពេលចាក់ដីបំពេញលើកកំពស់ផ្លូវ គឺបើឃើញដីស្អុយត្រូវកាយចេញ ហើយកិនបង្ហាប់តាមលក្ខណៈបច្ចេកទេស ។

លោកបានវាយតំលៃថា ការសាងសង់ស្ពានព្រែកជ្រៃរបស់កងវិស្វកម្មបានប្រមាណ៧០%ហើយៗរំពឹងថា នៅក្នុងខែតុលាខាងមុខនេះអាចឱ្យប្រជាពលរដ្ឋធ្វើចរាចរបានហើយ ។ ដោយឡែកការស្ថាបនាផ្លូវបាន ប្រមាណ៦០%ហើយ តែមានការខ្វះខាត ដែលត្រូវណែនាំឱ្យកែលំអ ។

អត្ថបទ កោះសន្តិភាព

Labels: ប្រវត្ដិសាស្ដ្រ, សេដ្ឋកិច្ច

By Hang Meas
On Sunday, May 27, 2007
At 11:17 AM
Comments :

បកស្បែកជនស្ទាវ៤នាក់អុកឡុករោងចក្រធ្វើស្បែកជើង

សមត្ថកិច្ចប៉ូលិសបង្ហាញមុខជនស្ទាវអុកឡុងរោងចក្រស្បែកជើង ត្រូវដាក់ខ្នោះប្រតែងគ្នា

ខេត្ដកំពង់ស្ពឺ ៖ ជនស្ទាវ៤នាក់ប្រដាប់ដោយដាវវែង ក្នុងចំណោមបក្សពួក៧នាក់ ត្រូវបានសមត្ថកិច្ច ស្រុកសំរោងទងឃាត់ខ្លួន កាលពីថ្ងៃទី២៣ ឧសភា ដោយចោទប្រកាន់ថា បានបង្កទំនាស់ជាមួយ កងសន្ដិសុខរោងចក្រស្បែកជើងមួយនៅខាងលិចផ្សារថ្នល់ទទឹងក្នុងទឹកដីឃុំត្រញំងគង ស្រុកសំរោងទង ខេត្ដកំពង់ស្ពឺ កាលពីថ្ងៃទី២២ ឧសភា កន្លងមក ។

មន្ដ្រីប៉ូលិសព្រហ្មទណ្ឌខេត្ដបានប្រាប់ឱ្យដឹងថា ជនស្ទាវទាំងនេះប្រដាប់ដោយដាវ ដំបង ដុំថ្ម បានបង្កការ អុកឡុកនៅរោងចក្រធ្វើស្បែកជើង ហើយត្រូវចាប់ខ្លួនបាន៤នាក់មាន១-ឈ្មោះកែវ វុធ ភេទប្រុស អាយុ២៣ឆ្នាំ, ២-ឈ្មោះមី សុផល អាយុ៣០ឆ្នាំ, ៣-ឈ្មោះ តូ រី អាយុ២២ឆ្នាំ និង៤-ឈ្មោះជីន សុភ័ក្ដ អាយុ២២ឆ្នាំ ។ ក្មេងពាលទាំង៤នាក់នេះមានលំនៅឋានក្នុងភូមិឧកញ៉ាទេព ឃុំត្រញំងគង ស្រុក សំរោងទង ។

ទាក់ទិននឹងការឃាត់ខ្លួនជនអន្ធពាលទាំង៤នាក់នេះ លោកវរសេនីយ៍ទោសុខ ខេមរិន ទទួលបន្ទុកការងារ ព្រហ្មទណ្ឌបានឱ្យដឹងថា កាលពីវេលាម៉ោង៩និង៤៥នាទីយប់ ថ្ងៃទី ២២ ឧសភា ក្រុមជនអន្ធពាលចំនួន ៧នាក់ ប្រដាប់ដោយដាវ ដំបង ដុំថ្មបានបង្កទំនាស់ជាមួយក្រុមសន្ដិសុខរោងចក្រធ្វើស្បែកជើង ខាងលិច ផ្សារថ្នល់ទទឹង និងបានវាយបំបែកកញ្ចក់តូបយាមបែកបាក់អស់មួយចំហៀង និងវាយឱ្យក្រុមសន្ដិសុខ រោងចក្រម្នាក់ឈ្មោះណែម បូរី រងរបួសបែក្បាល និងរបួសច្រើនកន្លែងទៀត ដែលបច្ចុប្បន្នសន្ដិសុខ រងគ្រោះបានទៅសំរាកព្យាបាលនៅឯមន្ទីរពេទ្យភ្នំពេញហើយ ។

លោកវរសេនីយ៍ទោសុខ ខេមរិន បានឱ្យដឹងទៀតថា ពេលនេះក្រុមស្ទាវអន្ធពាលចំនួន៣នាក់ទៀត កំពុង ត្រូវបានសមត្ថកិច្ចធ្វើការស្វែងរកចាប់ខ្លួន ។ បច្ចុប្បន្នក្មេងពាលទាំង៤នាក់នេះ រួមទាំងដាវវត្ថុតាង ត្រូវបានបំពេញសំណុំរឿងបញ្ជូនទៅកាន់តុលាការ ។

អត្ថបទ កោះសន្តិភាព

Labels: សន្តិសុខ

By Hang Meas
On
At 11:14 AM
Comments :

អ្នកបើកឡានប្លន់បេះដូង...នាំប្រពន្ធគេទៅរំលោភ១យប់

រថយន្ដទួរីសដែលម្ចាស់វាថ្លើមធំហ៊ាននាំប្រពន្ធគេទៅរំលោភ១យប់ និងទិដ្ឋភាពក្នុងរថយន្ដរៀបកៅអីសំរាប់ដេក (រូបថត កោះសន្តិភាព)

ខេត្ដកំពង់ចាម ៖ បុរសជាអ្នកបើកបររថយន្ដតាក់ស៊ីប្រភេទទួរីសម្នាក់ បានប្រើល្បិចលួងលោមស្ដ្រីម្នាក់ ដែលជាអ្នកដំណើរនាំទៅរំលោភសេពសន្ថវៈនៅចំណុចស្ថានីយលេខ១៥ ស្ថិតនៅឃុំសំរោង ស្រុកព្រៃឈរ រហូតបានសំរេចតាមបំណង ។ ហេតុការណ៍នេះ កើតឡើងកាលពីយប់ថ្ងៃទី២៣ ឧសភា ។

លោកកែវ សុវណ្ណារ៉ា នាយរងប៉ុសិ៍្ដរដ្ឋបាលឃុំស្រងែប្រចាំការនៅផ្សារព្រៃទទឹង បានឱ្យកោះសន្ដិភាពដឹងថា ខណៈពេលដែលរូបលោកកំពុងយាមប្រចាំការក្នុងផ្សារនៅវេលាម៉ោង៩ និង៣០នាទីយប់ថ្ងៃទី២៣ ឧសភា មានស្ដ្រីចំណាស់ម្នាក់រស់នៅក្នុងឃុំជ្រៃវៀន រត់មកប្ដឹងឱ្យជួយដល់កូនស្រីរបស់គាត់ អាយុ២៤ឆ្នាំ ដែល ត្រូវអ្នកបើកបរតាក់ស៊ីម្នាក់នាំចេញទៅបាត់ និងសុំឱ្យជួយអន្ដរាគមន៍ ព្រោះការនាំទៅនោះមានបំណងមិន ល្អ។ លោកបន្ដថា ប្រជាពលរដ្ឋរស់នៅភូមិដូនដីចំនួនជាង២០នាក់មានប្រុសមានស្រី ក្នុងនោះក៏មាន ស្ដ្រីរងគ្រោះផងដែរ នាំគ្នាជិះរថយន្ដទួរីសមួយគ្រឿងពាក់ស្លាកលេខកំពង់ស្ពឺ 2A.0725 បើកបរដោយ ឈ្មេះអ៊ា តូនី ហៅក្ដាម អាយុ២៥ឆ្នាំ រស់នៅភូមិព្រៃទទឹង ឃុំជ្រៃវៀន បើកចេញពីភូមិដូនដីក្នុងតំលៃ ព្រមព្រៀងគ្នាមួយកាលពីរសៀលថ្ងៃទី២៣ ឧសភា ឆ្ពោះទៅចូលរួមពិធីមង្គលការគេ នៅទីរួមខេត្ដ កំពង់ចាម លុះដល់វេលាយប់ក៏នាំគ្នាឡើងជិះរថយន្ដដដែលនេះត្រឡប់មកផ្ទះវិញ ។ អ្នកបើកបរបានបើក រថយន្តដាក់អ្នកជិះតាមផ្ទះនីមួយៗ តែបុរសអ្នកបើកបរមិនបានឱ្យស្ដ្រីរងគ្រោះដែលអង្គុយក្បែរខ្លួននោះ ចុះចេញទៅណាទេដោយសន្យាជូនទៅដល់ផ្ទះ ។ មន្ដ្រីប៉ូលិសដដែលបន្ដថា ខណៈពេលមនុស្សចុះអស់ ពីរថយន្ដនៅសល់តែស្ដ្រីម្នាក់នោះអ្នកបើកបរបានបើកចេញទៅជើងបាត់។

ស្ដ្រីចំណាស់ជាម្ដាយពេលមិនឃើញកូនស្រីមកផ្ទះ និងដឹងថា អ្នកបើកបររថយន្ដនាំទៅបាត់ក្នុងបំណង មិនល្អ ទើបរត់ទៅប្ដឹងប៉ូលិសឱ្យជួយ ។ ពេលទទួលបានបណ្ដឹងផ្ទាល់មាត់ភ្លាម កំលាំងប៉ូលិស ប៉ុសិ៍្ដមួយចំនួន ដែលនៅតាមផ្លូវឆ្ពោះទៅរមណីយដ្ឋានទឹកឆា តាមស្ទាក់រថយន្ដទួរីសនោះ។ ប៉ុន្ដែពុំឃើញ រថយន្ដនោះទេ គឺគេបានបើកគេចតាមផ្លូវវត្ដទៅដល់ស្ថានីយទី១៥ ក្នុងឃុំសំរោង ហើយបានឈប់ រថយន្ដនៅទីនោះ រួចកាច់ពូករថយន្ដចាប់ស្ដ្រីនោះរំលោភសេពសន្ថវៈទាំងកំរោលរហូតបានសំរេច ។

លោកនាយរងប៉ុសិ៍្ដបានបញ្ជាក់ថា លុះដល់វេលាម៉ោង១រំលងអធ្រាត្រឈានចូលថ្ងៃទី២៤ ឧសភា ទើប អ្នកបើកបរនោះនាំស្ដ្រីឈ្មោះឆ.ត មកផ្ទះវិញ ដោយបើកតាមផ្លូវជាតិលេខ៧ ហើយនាំនាងមកដាក់នៅផ្លូវ ក្បែរផ្ទះក្នុងសំលៀកបំពាក់រ៉ូបពណ៌លឿង ទើបត្រូវក្រុមសាច់ញាតិរបស់ស្ដ្រីរងគ្រោះ ព្រមទាំងកំលាំង ប៉ូលិសដេញស្ទាក់រថយន្ដ ខណៈស្ដ្រីរងគ្រោះចេញពីរថយន្ដនោះ។ ការតាមឃាត់រថយន្ដឱ្យឈប់ពី សមត្ថកិច្ចនោះ អ្នកបើកបរពុំព្រមឈប់ទេ ទើបមានការគប់កញ្ចក់រថយន្ដខាងមុខបំបែក ហើយម៉ូតូសេ ១០០កូរ៉េ ពណ៌ក្រហមមួយគ្រឿង ដែលដាក់ញំងពីមុខ ក៏ត្រូវរថយន្ដថយបុករួញអស់ ទើបម្ចាស់ រថយន្ដលោតចុះរត់គេចទៅបាត់ ។

មន្ដ្រីប៉ូលិសបានឱ្យដឹងទៀតថា បុរសជាបងរបស់ឈ្មោះក្ដាម បានមកបើករថយន្ដបំរុងគេច តែត្រូវសមត្ថកិច្ច ស្ទាក់ជាប់ រួចនាំមករក្សាទុកនៅអធិការដ្ឋានស្រុកព្រៃឈរ ដើម្បីដោះស្រាយទៅតាមច្បាប់ ។ លោកទូច ម៉េង អធិការប៉ូលិសស្រុកព្រៃឈរឱ្យដឹងថា ជនជាប់ចោទជាអ្នកចាប់រំលោភសេពសន្ថវៈ លើស្ដ្រីរងគ្រោះ ត្រូវបានកំលាំងប៉ូលិសតាមចាប់ទាំងយប់ ប៉ុន្ដែបានរត់គេចខ្លួនបាត់ ។ កន្លងមកជននេះធ្លាប់បង្ករបួសស្នាម លើអ្នកដទៃ ហើយត្រូវបានសមត្ថកិច្ចចាប់បញ្ជូនទៅតុលាការខេត្ដដោយជាប់ឃុំម្ដងរួចមកហើយ ។ មន្ដ្រីដដែលអះអាងថា ទោះបីជាជននេះរត់គេចខ្លួនមែន តែជំនាញត្រូវកសាងសំណុំរឿងទៅតុលាការខេត្ដ ដើម្បីសុំដីកាស្វែងរកចាប់ខ្លួន ។

នេះជាអំពើដ៏លាមកបំផុតដែលអ្នកបើកបររថយន្ដម្នាក់ បានប្រព្រឹត្ដអំពើមិនគប្បីលើស្ដ្រីដែលមានប្ដីហើយ ធ្វើឱ្យបុរសផងគ្នាឈឺចាប់ និងបំផ្លាញអនាគតខ្លួនឯង ព្រោះតែចំណង់កាមគុណតែមួយប៉ប្រិចភ្នែក។ កំហុស បែបនេះនឹងទទួលនូវការថ្កោលទោសពីច្បាប់សង្គមផង និងច្បាប់ខាងសាសនាផង ដែលថា ពេលស្លាប់ ទៅនឹងធ្លាក់នរក ហើយរងកម្មឡើងរកាដែក ។

Labels: វប្បធម៌, សន្តិសុខ

By Hang Meas
On
At 11:12 AM
Comments :

សភាបន្ដពិភាក្សាស្ដីពីការឃាត់ខ្លួន-បញ្ជូនខ្លួននិងការស៊ើបអង្កេត

រាជធានីភ្នំពេញ ៖ នៅព្រឹកថ្ងៃទី២៥ ឧសភា រដ្ឋសភាបានបន្ដពិភាក្សាលើសេចក្ដីព្រាងច្បាប់ក្រមនីតិវិធី ព្រហ្មទណ្ឌឈានដល់ថ្ងៃទី៣ ហើយក្នុងកិច្ចពិភាក្សាជជែកវែកញែករបស់អ្នកតំណាងរាស្ដ្រមានសភាពតឹង តែង និងប្រុងប្រយ័ត្នបំផុតទៅលើការឃាត់ខ្លួនជនល្មើស និងការបញ្ជូនខ្លួនបុគ្គលដែលត្រូវបានឃាត់ខ្លួន។ ក្នុងការពិភាក្សានោះ រដ្ឋសភាបានឈានដល់ការអនុម័តទៅលើជំពូកទី៣ មាន៧មាត្រា ជំពូកទី៤ និងជំពូក ទី៥ មានចំនួន២មាត្រា ហើយបន្ទាប់ពីពិភាក្សា អង្គសភាបានអនុម័តជំពូកទាំង៣ ដោយសំលេងគាំទ្រ ៧៩លើ៧៩ ។

លោកឯក សំអុល ប្រធានគណៈកម្មការនីតិកម្មនិងយុត្ដិធម៌របស់រដ្ឋសភាបានមានប្រសាសន៍ថា ច្បាប់នេះ មានចំណុចល្អជាងច្បាប់អ៊ុនតាក់ទៅទៀត ។ ការឃាត់ខ្លួនជនល្មើសក្នុងករណីនេះដើម្បីស៊ើបសួរយក ព័ត៌មានបន្ដ ហើយការឃាត់ខ្លួននោះ តាមច្បាប់នេះមិនមានការបន្ថយម៉ោងទេ ។ លោកបន្ដថា ការឃាត់ ខ្លួននៅក្នុងរឿងព្រហ្មទណ្ឌធម្មតា ការឃុំខ្លួនមានរយៈពេល៤៨ម៉ោង តែបើបទល្មើសភេរវកម្មវិញនោះ ត្រូវតែឃុំខ្លួន ដើម្បីស៊ើបសួរតទៅទៀត ។

លោកអង្គ វង្សវឌ្ឍានា រដ្ឋមន្ដ្រីក្រសួងយុត្ដិធម៌បានមានប្រសាសន៍ការពារច្បាប់នេះថា ការឃាត់ខ្លួន ជនល្មើសជាក់ស្ដែងដើម្បីធ្វើការស៊ើបអង្កេត ។ លោកបន្ដថា “ជនល្មើសខ្លះមិនព្រមនិយាយទេ ក្នុង រយៈពេល២៤ម៉ោង នៅពេលចាប់ខ្លួន រង់ចាំមេធាវីមកដល់ ។ ពួកគេខិលដែរ... វាជាការលំបាកចំពោះ ប៉ូលិសស៊ើបអង្កេត” ។ ឯលោកប៉ែន បញ្ញា តំណាងរាស្ដ្រគណបក្សប្រជាជនកម្ពុជា បានថ្លែងថា មាត្រា ១០៤បានចែងយ៉ាងច្បាស់ អំពីសិទ្ធិរបស់បុគ្គលដែលមានបញ្ហាត្រូវឃាត់ខ្លួននោះ ករណីនេះអាចបញ្ជូនខ្លួន ទៅតុលាការ (ព្រះរាជអាជ្ញា) ឬត្រូវដោះលែងឱ្យមានសេរីភាព ។
មាត្រា៩៦ បានចែងពីការឃាត់ខ្លួនថា មន្ដ្រីនគរបាលយុត្ដិធម៌ត្រូវរាយការណ៍ភ្លាមជូនព្រះរាជអាជ្ញា ព្រមទាំងបញ្ជូនគ្រប់ភស្ដុតាងទាំងអស់ដែលតម្រូវឱ្យមានការឃាត់ខ្លួននេះ ។ ការឃាត់ខ្លួនមានរយៈពេល ៤៨ម៉ោង ប៉ុន្ដែចំពោះបទឧក្រិដ្ឋកាលណាមានតម្រុយ ដែលបង្ហាញឱ្យឃើញថា មានពិរុទ្ធភាពលើបុគ្គល ដែលឃាត់ខ្លួន មន្ដ្រីនគរបាលយុត្ដិធម៌ អាចពន្យារពេលឃាត់ខ្លួនបាន ប្រសិនបើវិធានការនេះជាការ ចាំបាច់ដើម្បីឱ្យការស៊ើបអង្កេតប្រព្រឹត្ដទៅបានល្អ ។ ការពន្យារពេលនេះ ត្រូវសុំទៅព្រះរាជអាជ្ញាដែល ត្រូវផ្ទៀងផ្ទាត់មើលមូលភាព ហើយការពន្យារពេល មិនឱ្យលើសពី២៤ម៉ោងឡើយ ដោយមិនគិត ពីថិរវេលាចាំបាច់ក្នុងការដឹកជញ្ជូន ។

មាត្រា៩៨ ចែងថា ក្នុងរយៈពេល២៤ម៉ោងបានកន្លងផុតទៅតាំងពីពេលផ្ដើម នៃការឃាត់ខ្លួនមកនោះ បុគ្គលដែលឃាត់ខ្លួន អាចសុំសន្ទនាជាមួយមេធាវី ឬជាមួយជនណាម្នាក់ដែលខ្លួនជ្រើសរើស កុំឱ្យតែជន នេះ មានការទាក់ទងនៅក្នុងរឿងជាមួយ ។ ជននេះត្រូវបានទទួលដំណឹងពីការស្នើសុំជ្រើសរើសនេះ តាមគ្រប់មធ្យោបាយ និងជាបន្ទាន់។ លោកអង្គ វង្សវឌ្ឍានា បានមានប្រសាសន៍ថា ការដោះលែង យោងទៅតាមព្រះរាជអាជ្ញា ព្រោះព្រះរាជអាជ្ញាមានសិទ្ធិក្នុងការដោះលែង ។ លោកបន្ដទៀតថា មាត្រា២៩៣ ចែងថា គ្រប់ថិរវេលាដែលចែងដោយក្រមនេះ ដើម្បីបំពេញកិច្ច ឬទម្រង់ការណាមួយនោះ ត្រូវផុតរលត់នៅថ្ងៃចុងក្រោយវេលាម៉ោង២៤ ។ តាមធម្មតារយៈពេលដែលផុតកំណត់នៅថ្ងៃសៅរ៍ ថ្ងៃ អាទិត្យ ឬថ្ងៃបុណ្យ ត្រូវអូសបន្លាយរហូតដល់ថ្ងៃទីមួយដែលបើកធ្វើការវិញ ។

លោកជាម យៀប បានមានប្រសាសន៍ថា ច្បាប់នេះក៏មានបំណងរកយុត្ដិធម៌ដល់ជនរងគ្រោះផង ដល់ ចុងចោទផង។ លោកបន្ដថា កន្លងមកមានបទល្មើសមួយមានមនុស្សពីរនាក់ ជួនកាលមនុស្សទាំងពីរនាក់ មានជំលោះនឹងគ្នាផ្សេងទេ តែនៅពេលមនុស្ស “ក” ចង់ប្ដឹងមនុស្ស “ខ” ហើយទៅប្ដឹងប៉ូលិសយុត្ដិធម៌ ឱ្យចុះស៊ើបអង្កេត ជួនកាលគាត់ទៅទិញ គ្រឿងញៀនលាក់ទុកនៅកន្លែងណាមួយ ឬ បោះចូលកន្លែង ណាមួយ ដល់ពេលប៉ូលិស ស៊ើបអង្កេតទៅឃើញមានគ្រឿងញៀននេះមែន ។

អត្ថបទ កោះសន្តិភាព

Labels: នយោបាយ

By Hang Meas
On
At 10:52 AM
Comments :

ជនសង្ស័យត្រូវបាញ់ចំកណ្ដាលថ្ងាសស្លាប់មុខបន្ទប់ ប៉ូលិសបន្ដរារាំងអ្នកកាសែត(ការបាញ់ប្រហារនៅតែអាថ៌កំបាំង)

ពាក់អាវ.សជាមន្ដ្រីប៉ូលិសស្លៀកពាក់ស៊ីវិលដែលរារាំងមិនឱ្យអ្នកកាសែតថតសាកសពដែលបាញ់ស្លាប់និងការលើកសពដាក់រថយន្ដមកវត្ដព្រះពុទ្ធ(រូបថត កោះសន្តិភាព)

រាជធានីភ្នំពេញ ៖ ការបាញ់សំលាប់ជនសង្ស័យនៅផ្ទះសំណាក់លេខ១៣៣ ស្ថិតនៅតាមផ្លូវលេខ៧០ សង្កាត់ ទួលសង្កែ ខណ្ឌឫស្សីកែវពីសំណាក់កំលាំងសមត្ថកិច្ចនៃមន្ទីរប្រឆាំងគ្រឿងញៀនក្រសួងមហាផ្ទៃ នៅតែ ជាព័ត៌មានមួយដែលមហាជនមានការចាប់អារម្មណ៍ ហើយចោទសួរថា តើជនសង្ស័យដែលត្រូវបាញ់ សំលាប់នោះ មានគំនិតចង់ប្លន់ប្រាក់ដែលប៉ូលិស(ខ្លា.ស) យកទៅធ្វើជាធ្នាក់មែន ឬត្រូវបានសំលាប់ បំបិទមាត់? អ្វីដែលធ្វើឱ្យមហាជននៅមានចំងល់នោះ គឺនៅពេលដែលមានការបាញ់ប្រហារជនសង្ស័យ ហេតុអ្វីបានជាគេធ្វើការរារាំងរហូតដល់ក្រុមអ្នកកាសែតមិនឱ្យថតរូបភាព និងយកព័ត៌មាននោះ សូម្បីតែ ជនដែលត្រូវបានចាប់ខ្លួន២នាក់ គឺប្រុសម្នាក់ និងស្រីម្នាក់ក៏មិនត្រូវបានអនុញ្ញាតឱ្យមានការសាកសួរដែរ។

សូមរំលឹកថា កាលពីវេលាម៉ោង៤រសៀល ថ្ងៃទី២៤ ខែឧសភា នៅផ្ទះសំណាក់លេខ១៣៣ តាមផ្លូវ លេខ៧០ ក្នុងសង្កាត់ទួលសង្កែ ខណ្ឌឫស្សីកែវ បុរសម្នាក់ត្រូវគេបាញ់សំលាប់ដួលដេកនៅមុខបន្ទប់នៃ ជាន់ទី១ ដោយចោទថាជាជនសង្ស័យជួញដូរថ្នាំញៀន ព្រមទាំងចាប់បានបុរសម្នាក់ និងស្ដ្រីម្នាក់ ដែលជា ក្រុមអ្នកស្លាប់នោះ។ ការបាញ់សំលាប់ជនសង្ស័យនេះ ត្រូវប៉ូលិសមន្ទីរប្រឆាំងគ្រឿងញៀន នៃក្រសួង មហាផ្ទៃអះអាងថា ដោយសារជននោះមានបំណងប្លន់ប្រាក់របស់មន្ដ្រីប៉ូលិសចំនួន២៧.០០០ដុល្លារ ដែលក្នុង នោះលុយសុទ្ធ៧.០០០ដុល្លារ និងលុយក្លែងក្លាយ២ម៉ឺនដុល្លារ។

នៅកន្លែងកើតហេតុតាមសាក្សីបំភ្លឺថា បន្ទាប់ពីឮស្នូរផ្ទុះអាវុធចំនួន២គ្រាប់មានការភ្ញាក់ផ្អើលថា មនុស្ស ម្នាក់ត្រូវគេបាញ់សំលាប់ធ្វើឱ្យមានការភ្ញាក់ផ្អើលដល់ប៉ូលិសមូលដ្ឋាន និងប៉ូលិសក្រុងភ្នំពេញ ។ នៅជុំវិញ ផ្ទះសំណាក់មានការចោមរោមមើលពីសំណាក់មនុស្សរាប់ពាន់នាក់ ។ ផ្ទះសំណាក់នោះត្រូវបានការពារ យ៉ាងតឹងរ៉ឹងពីសំណាក់ប៉ូលិសស្លៀកពាក់ស៊ីវិលដែលគេស្គាល់ថា ជាប៉ូលិសមន្ទីរប្រឆាំងគ្រឿងញៀន ក្រសួងមហាផ្ទៃ ដោយបានហាមមិនឱ្យអ្នកយកព័ត៌មានចូលថតរូបភាពសាកសពជនសង្ស័យ ។

តាមព័ត៌មានពីប៉ូលិសមន្ទីរប្រឆាំងគ្រឿងញៀនឱ្យដឹងថា ការបាញ់សំលាប់ជនសង្ស័យនោះ គឺដោយសារ តែគេមានគំនិតចង់ប្លន់ប្រាក់ដែលសមត្ថកិច្ចយកទៅធ្វើជាធ្នាក់ទិញថ្នាំញៀនពីពួកគេ ។ ជនម្នាក់នោះ បានភ្ជង់ចាប់ចងមន្ដ្រីប៉ូលិសដែលយកប្រាក់ទៅរកទិញថ្នាំញៀន ព្រមទាំងបាញ់គំរាម១គ្រាប់ ទើបសមត្ថកិច្ច នៅក្បែរនោះធ្វើអន្ដរាគមន៍បាញ់គេ១គ្រាប់ស្លាប់តែម្ដង ។

ជនសង្ស័យរូបនោះឈ្មោះគីម អាយុ៣៥ឆ្នាំ ត្រូវបានបាញ់១គ្រាប់ចំកណ្ដាលថ្ងាស ធ្លាយទៅក្រោយស្លាប់នៅ មុខបន្ទប់ជាន់ទី១ នៃផ្ទះសំណាក់។ ចំណែកអ្នកដែលត្រូវចាប់ខ្លួនមាន២នាក់ ម្នាក់ជាបុរសឈ្មោះនុត និត អាយុ៣៧ឆ្នាំ មានទីលំនៅក្នុងភូមិវាល ឃុំតំបែរ ស្រុកតំបែរ ខេត្ដកំពង់ចាម និងស្ដ្រីម្នាក់ទៀត ឈ្មោះ សយ សុគន្ធ អាយុ៣០ឆ្នាំ មានទីលំនៅក្នុងភូមិតាកុច ឃុំសំបុក ស្រុកក្រចេះ ខេត្ដក្រចេះ ។

ប៉ូលិសអះអាងថា ក្នុងហេតុការណ៍នោះដកហូតបានកាំភ្លើងខ្លីម៉ាក K54 មួយដើម និងថ្នាំញៀន៧កញ្ចប់ តូច។ ទោះបីជាយ៉ាងណាពុំមានព័ត៌មានផ្លូវការណាមួយអះអាងពីការបាញ់សំលាប់ជនសង្ស័យនោះឡើយ តែព័ត៌មានក្រៅផ្លូវការខ្លះនិយាយថា ការបាញ់សំលាប់ជនសង្ស័យនេះស្ថិតនៅក្នុងភាពអាថ៌កំបាំង។ នៅ ល្ងាចនោះ (២៤ ឧសភា) អ្នកកាសែតបានព្យាយាមចូលទៅថតរូបភាពជនសង្ស័យ តែត្រូវរារាំងដោយ មន្ដ្រីប៉ូលិសស្លៀកពាក់ស៊ីវិលរបស់មន្ទីរប្រឆាំងគ្រឿងញៀន ។ រហូតដល់វេលាម៉ោង៧និង៤០នាទីយប់ ទៅហើយនៅពេលដែលសមត្ថកិច្ចពិនិត្យសាកសពរួចហើយនោះ អ្នកកាសែតក៏នៅតែត្រូវមន្ដ្រីប៉ូលិសម្នាក់ ទៀតស្លៀកពាក់ស៊ីវិលត្រូវបានគេស្គាល់ថា ឈ្មោះសុខ ងី ជាអនុប្រធានការិយាល័យកណ្ដាលព្រហ្មទណ្ឌ ដែលជាមន្ដ្រីចុះទៅពង្រឹងនៅខណ្ឌឫស្សីកែវ ធ្វើការរារាំងហួងហែងដដែលហាក់ដូចជា ចង់បិទបាំងការបាញ់ សំលាប់មនុស្សនេះ គឺមិនចង់ឱ្យមានរូបភាពត្រូវបានកត់សំគាល់ ។ ទោះបីជាបែបណាសាកសព ត្រូវបានបញ្ជូនទៅតំកល់នៅឈាបនដ្ឋានវត្ដព្រះពុទ្ធ ។ រហូតមកដល់ព្រឹកថ្ងៃទី២៥ ឧសភា សាកសពមិន មានក្រុមគ្រួសារមកមើលឡើយដែលគេមានការសង្ស័យថា ជនដែលត្រូវបាញ់ស្លាប់ចំកណ្ដាលថ្ងាសនេះ ទំនងជាម្ចាស់ថ្នាំញៀនមកពីខេត្ដក្រចេះ ។ គ្មានប្រភពផ្លូវការណាមួយបំភ្លឺពីហេតុការណ៍នោះឱ្យដឹងឡើយ គិតត្រឹមវេលាល្ងាចថ្ងៃទី២៥ឧសភា ។

អត្ថបទ កោះសន្តិភាព

Labels: សន្តិសុខ

By Hang Meas
On
At 10:51 AM
Comments :

ភ្លៀងធ្លាក់ខ្លាំងដើមរដូវនាំជាតិពុលចូលទន្លេ ឡូត៍នេសាទ៣រងគ្រោះព្រោះត្រីងាប់អស់៥៨តោន

ខេត្ដកំពង់ឆ្នាំង ៖ ប៉ុន្មានថ្ងៃថ្មីៗនេះ ទឹកភ្លៀងបានសម្រុកធ្លាក់ខ្លាំងនៅតំបន់មួយចំនួន តាមដងទន្លេក្នុង ខេត្ដកំពង់ឆ្នាំង ហើយទឹកភ្លៀងបានហូរចូលត្រញំង បឹងបួ និងហូរចូលក្នុងទន្លេដោយនាំយកទៅជាមួយ នូវសារធាតុពុលបង្កឱ្យត្រីក្នុងឡូត៍នេសាទមួយចំនួន ងាប់អស់រាប់តោន ដែលបញ្ហានេះជាក្ដីព្រួយបារម្ភ បំផុតរបស់ម្ចាស់ឡូត៍នេសាទ ។

លោកអ៊ឹង គឹមលាង ប្រធានការិយាល័យជលផលនៃមន្ទីរកសិកម្មខេត្ដបានប្រាប់ឱ្យដឹងថា ឡូត៍នេសាទដែល ទទួលរងការខូចខាតដោយត្រីងាប់នោះមានឡូត៍លេខ១ (ស្លត) ឡូត៍លេខ៣ (ពែកគូ) និងឡូត៍លេខ៤ (សាច់ស្ពៃ) ។ ឡូត៍ទាំងបីនេះមានត្រីងាប់សរុបប្រមាណ៥៨តោន ប៉ុន្ដែឡូត៍លេខ៣ (ព្រែកគូ) រងគ្រោះ ធ្ងន់ធ្ងរជាងគេ គឺមានត្រីងាប់ដល់ទៅ៣៥តោនឯណោះ ។ លោក អ៊ឹង គឹមលាង បានប្រាប់ពីលក្ខណៈ បច្ចេកទេសថា កត្ដាទឹកបឹងដែលបង្កជាតិពុលហូរធ្លាក់ចូលទន្លេ បណ្ដាលឱ្យត្រីងាប់បែបនេះ គឺមកពី ទឹកកខ្វក់ដោយសារកាកសំណល់ស្មៅ ចំការដែលប្រជាកសិករបានជម្រះ ឬកន្លែងខ្លះបាញ់ថ្នាំសម្លាប់ស្មៅ ងាប់រលួយ ហើយទឹកពុលនៃស្មៅរលួយទាំងនោះ ហូរធ្លាក់ចូលទន្លេបង្កឱ្យកើតជាអាម៉ូនីញ៉ាក់ និង ឧស្ម័នកាបូនិក ធ្វើឱ្យទឹកមានជាតិពុល ។ ឯករណីមួយទៀត គឺតាមចំការរបស់បងប្អូនកសិករយើងនៅ តាមមាត់ទន្លេបានប្រើប្រាសថ្នាំពុលសម្លាប់សត្វ ដែលក៏ជាកត្ដាបំពុលទឹកផងដែរ ។ ជាទូទៅទឹកមានជាតិ ពុលដែលហូរចុះទន្លេមាន ពណ៌ត្នោត ។

ឡូត៍នេសាទទាំង៣ដែលមានត្រីងាប់ប្រមាណ៥៨តោន ភាគច្រើនគឺត្រីក្លាំងកាយ ត្រីកែស និងត្រីក្រមម ចំណែកត្រីរ៉ស់ ត្រីឆ្ដោ មិនសូវឃើញងាប់ប៉ុន្មានទេ ។ ទោះបីជាបែបណា ព័ត៌មានពីត្រីងាប់នេះ គឺទទួលបានតែពីប្រធានការិយាល័យជលផលប៉ុណ្ណោះ ចំណែកឯម្ចាស់ឡូត៍នេសាទទាំង៣មិនបានផ្ដល់ ព័ត៌មាននោះទេ ប៉ុន្ដែមានមតិខាងក្រៅដែលមិនផ្លូវការប្រាប់ថា ពិតជាមានត្រីងាប់មែនហើយ តែមិនដល់ ប៉ុណ្ណឹងពេកទេអាចជាការបំប៉ោងក៏ថាបានដែរ ។

អត្ថបទ កោះសន្តិភាព

Labels: សុខាភិបាល, សេដ្ឋកិច្ច

By Hang Meas
On
At 10:46 AM
Comments :

គណបក្សសម រង្ស៊ីបណ្ដេញក្រុមប្រឹក្សាសង្កាត់និរោធ

លោកស្រីអោក ដារ៉ាវី ធ្វើសន្និសីទពីប្រតិកម្ម (រូបថត កោះសន្តិភាព)

រាជធានីភ្នំពេញ ៖ គណបក្សសម រង្ស៊ី បានប្រកាសបណ្ដេញសមាជិករបស់ខ្លួន ជាសមាជិក ក្រុមប្រឹក្សាសង្កាត់និរោធ ខណ្ឌមានជ័យ គឺលោកស្រីអោក ដារ៉ាវី ដែលជាក្រុមប្រឹក្សាសង្កាត់និរោធ ក្នុងលំដាប់លេខរៀងទី៣នៃគណបក្សសម រង្ស៊ី ។ ការប្រកាសបណ្ដេញចេញនេះ បានធ្វើឡើងតាម រយៈលិខិតចុះថ្ងៃ ទី១១ ខែឧសភា ដែលចុះហត្ថលេខាដោយលោកគង់ គាំ អនុប្រធានគណបក្សសម រង្ស៊ី ដោយបានអះអាងថា លោកស្រីបានធ្វើសកម្មភាពផ្ទុយពីផលប្រយោជន៍របស់គណបក្ស ។

ជាប្រតិកម្ម លោកស្រីអោក ដារ៉ាវី បានមានប្រសាសន៍នៅក្នុងសន្និសីទកាសែតថា សកម្មភាពរបស់ លោកស្រីកន្លងមកមិនបានប្រព្រឹត្ដអំពើពុករលួយទេ រាល់សកម្មភាពគឺដើម្បីភាពស្អាតស្អំ តែផ្ទុយទៅវិញ ប្រធានគណបក្សមិនបានគិតដល់តំលៃរបស់អ្នកដែលបានចូលរួមជាមួយគណបក្សសម រង្ស៊ី ។ លោកស្រី បន្ដថា “មេដឹកនាំគណបក្សនេះបានចាត់ទុកខ្ញុំដូចជាសត្វធាតុ ដូចជាមនុស្សគ្មានវិញ្ញាណឈរចាំតែគេប្រើ តែខ្ញុំជាមនុស្សមិនមែនជាសត្វធាតុទេ ។ ខ្ញុំស្រឡាញ់កិត្ដិយស កេរ្ដិ៍ឈ្មោះរបស់ខ្ញុំ” ។

លោកស្រីបានបន្ដថា លោកស្រីត្រូវតែចាកចេញពីគណបក្សសម រង្ស៊ី ហើយមិនអាចយកខ្លួនទៅប្រឡូក ជាមួយអ្នកដែលអាក្រក់អស់ទាំងនោះទេ។ លោកស្រីបន្ដទៀតថា គណបក្សសម រង្ស៊ី មិនឱ្យលោកស្រី ចេញទេកាលពីមុន ដែលលោកស្រីបានសុំលាឈប់ជាយូរមកហើយ ។

លោកគង់ គាំ អនុប្រធានគណបក្សសម រង្ស៊ី បានសំរេចធ្វើការលុបឈ្មោះលោកស្រី អោក ដារ៉ាវី ពីសមាជិកគណបក្ស ដោយយោងតាមមាត្រា១៤នៃច្បាប់ស្ដីពីគណបក្ស នយោបាយ មាត្រា១៤នៃលក្ខន្ដិកៈ និងមាត្រា៦នៃបទបញ្ជាផ្ទៃក្នុងគណបក្ស និងយោងតាមការធ្វើសកម្មភាព ផ្ទុយពីផលប្រយោជន៍ របស់គណបក្ស ។ លោកគង់ គាំ បានថ្លែងថា គណបក្សសម រង្ស៊ី សំរេចលុបឈ្មោះលោកស្រីអោក ដារ៉ាវី ចេញពីបញ្ជីគណបក្សហើយ ។ លោកស្រីអោក ដារ៉ាវី បានថ្លែងថា ការដោះស្រាយត្រូវឱ្យមានភាព កណ្ដាលដែលអាចទទួលយកបាន។ កន្លងមកលោកស្រីបានធ្វើការដោះស្រាយករណីជាច្រើន តែគេមិនឱ្យ តំលៃទេ។ សកម្មភាពរបស់គណបក្សមិនគោរពតំលៃស្ដ្រីភេទទេ ហើយកន្លងមកលោកស្រីមិនជឿគេ តែពេលនេះច្បាស់លាស់ហើយ ខណៈដែលបក្សនេះច្រានចោលមន្ដ្រីជាស្ដ្រី ។

អត្ថបទ កោះសន្តិភាព

Labels: នយោបាយ

By Hang Meas
On
At 10:45 AM
Comments :

អ្នកលក់មាសនៅកំពង់ស្ពឺ ចង្អុលមុខចោរប្លន់ពីថ្ងៃមុន

អ្នកលក់មាសនិងភរិយាចង្អុលជនសង្ស័យ (រូបថត កោះសន្តិភាព)

ខេត្ដកំពង់ស្ពឺ ៖ ក្រោយពីមានអំពើប្លន់ប្រដាប់អាវុធនៅក្នុងភូមិថ្មី ឃុំរកាធំ ស្រុកច្បារមន កាលពី វេលាម៉ោង៥ល្ងាចថ្ងៃទី២២ ឧសភា ទៅលើអ្នកលក់មាស២នាក់ប្ដីប្រពន្ធ ដែលទើបវិលត្រឡប់មកពីធ្វើ អាជីវកម្មលក់ដូរនៅឯផ្សារដំបូលប្រាំវិញដោយមិនទាន់ទាំងបានបើកទ្វារចូលផ្ទះផងនោះ សមត្ថកិច្ចប៉ូលិស នៃស្នងការដ្ឋានខេត្ដកំពង់ស្ពឺបានខិតខំដុតដៃដុតជើងធ្វើការស្រាវជ្រាវ និងរុករកក្រុមចោរទាំងនោះ យ៉ាង សកម្មបំផុត ។ ប៉ុន្ដែគួរឱ្យសោកស្ដាយជាពន់ពេកនៅថ្ងៃកើតហេតុនោះ ទោះបីសមត្ថកិច្ចខំរាយអន្ទាក់គ្រប់ ផ្លូវយ៉ាងណា ក៏ស្ទាក់ចាប់មុខសញ្ញាដែលមិនស្គាល់អត្ដសញ្ញាណទាំងនោះមិនបានដែរ គឺគ្រាន់តែរកឃើញ ម៉ូតូ២គ្រឿងដែលពួកជនមិនស្គាល់មុខបានរុញទំលាក់ចោលនៅក្នុងទឹកប្រឡាយទួលធ្លុង មានចំងាយពី ប៉ុសិ៍្ដរដ្ឋបាលរកាធំប្រមាណ១គីឡូម៉ែត្រ តាមរយៈសេចក្ដីរាយការណ៍ពីអ្នកដំណើរប៉ុណ្ណោះ ។

ដោយសេចក្ដីព្យាយាមរបស់សមត្ថកិច្ចប៉ូលិសខេត្ដកំពង់ស្ពឺ ជនជាប់សង្ស័យ៥នាក់ ដែលបង្កបទល្មើស ផ្សេងៗពីគ្នាត្រូវចាប់ខ្លួនបានជាបន្ដបន្ទាប់ យកមកសួរចំលើយនៅស្នងការដ្ឋានដែលក្នុងចំណោមនោះ មាន ជនជាប់សង្ស័យម្នាក់ដែលពាក់ស្លាកលេខ១៣ ត្រូវបានអ្នករងគ្រោះចង្អុលប្រាប់សមត្ថកិច្ចថា គឺជនម្នាក់នេះ ហើយដែលជាអ្នកដៃដល់ប្លន់យកកន្ដ្រកដាក់មាស និងលុយពីគាត់កាលពីល្ងាចថ្ងៃទី២២ ឧសភា កន្លង មកនោះ ។ លោកហេង ឈុនហោ អាយុ៣៤ឆ្នាំ និង ភរិយាឈ្មោះហេង វ៉ិត បានបញ្ជាក់ប្រាប់ប៉ូលិសថា ជនដែលពាក់ស្លាកលេខ១៣នេះ បានប្រើកាំភ្លើងខ្លីបាញ់ប្រហារមកលើគាត់ជាច្រើនគ្រាប់តែមិនផ្ទុះ ហើយ បានប្លន់យកកន្ដ្រកដាក់មាស និងលុយពីគាត់បានសំរេច ដែលនៅក្នុងនោះមានមាសទំងន់១តម្លឹង២ជី, បា្លទីន ២០តម្លឹង, លុយអាមេរិក១២០ដុល្លារ និងលុយខ្មែរជាង១លានរៀល ។

ទាក់ទិននឹងការចាប់ខ្លួនជនជាប់សង្ស័យពីបទប្លន់ប្រដាប់អាវុធទៅលើអាជីវករលក់ មាសដូរលុយ នៅក្នុង ភូមិថ្ម ឃុំរកាធំ ស្រុកច្បារមននេះ លោកវរសេនីយ៍ទោសុខ ខេមរិន ស្នងការរងនគរបាលខេត្ដកំពង់ស្ពឺ ទទួលបន្ទុកព្រហ្មទណ្ឌបានប្រាប់កោះសន្ដិភាពនៅព្រឹកថ្ងៃ ទី២៥ ឧសភា ថា ជនជាប់សង្ស័យពាក់ស្លាក លេខ១៣នេះ ឈ្មោះស៊ឹម ម៉ៅ អាយុ២៤ឆ្នាំ ប្រកបរបររត់ម៉ូតូឌុប មានស្រុកកំណើតនៅភូមិសែនជ័យ ឃុំគ ស្រុកត្បូងឃ្មុំ ខេត្ដកំពង់ចាម បច្ចុប្បន្នស្នាក់នៅបណ្ដោះអាសន្នក្នុងភូមិស្នោ ឃុំរកាធំ ស្រុកច្បារមន ខេត្ដកំពង់ស្ពឺ ត្រូវកំលាំងសមត្ថកិច្ចប៉ូលិសរបស់លោកចាប់ខ្លួនបានកាលពីវេលាម៉ោង៩ព្រឹក ថ្ងៃទី២៣ ឧសភា នៅត្រង់ចំណុចប្រឡាយទឹកទួលធ្លុង ជាទីដែលពួកចោរប្លន់មាសជិះម៉ូតូ២គ្រឿង យកទៅទំលាក់ ចោល កាលពីល្ងាចថ្ងៃទី២២ ឧសភា បន្ទាប់ពីពួកគេប្លន់បានមាសរួចមក ។ លោកស្នងការរងបានបញ្ជាក់ ឱ្យដឹងទៀតថា ជនជាប់សង្ស័យឈ្មោះស៊ឹម ម៉ៅ នេះ មិនបានសារភាពពីទោសកំហុសរបស់ខ្លួនទេ ប៉ុន្ដែ អ្នករងគ្រោះបានអះអាងយ៉ាងប្រាកដប្រជាថា គឺជននេះហើយដែលជាអ្នកដៃដល់ក្នុងអំពើប្លន់នោះ ។

នៅចំពោះមុខមន្ដ្រីប៉ូលិសព្រហ្មទណ្ឌខេត្ដ ជនជាប់សង្ស័យឈ្មោះស៊ឹម ម៉ៅ បាននិយាយដោះសាថា ខ្លួនមិនដឹងថា នៅក្នុងប្រឡាយទឹកទួលធ្លុងនោះមានគេលាក់ម៉ូតូនៅក្នុងទឹកទេ ហើយការដែលខ្លួន ដោះខោអាវក្រៅចេញនោះ គឺខ្លួនបំរុងឆ្លងប្រឡាយទៅមើលគេភ្ជួរស្រែនៅទីនោះ ។ ប៉ុន្ដែតាម សមត្ថកិច្ចដែលជាអ្នកចុះទៅចាប់ខ្លួនជនជាប់សង្ស័យដោយផ្ទាល់ដៃនោះបានបញ្ជាក់ថា នៅក្បែរប្រឡាយ ទឹកទួលធ្លុងនាព្រឹកថ្ងៃទី២៣ ឧសភា នោះ មិនមានប្រជាកសិករណាម្នាក់នៅភ្ជួរដាស់ស្រែឡើយ ។ លោក វរសេនីយ៍ទោសុខ ខេមរិន បានអះអាងថា ទោះបីជាជនជាប់ចោទព្យាយាមឆ្លើយបង្វែងដាន មិនព្រម សារភាពយ៉ាងណាក៏ដោយ ក៏លោកមិនព្រមលើកលែងការចោទប្រកាន់ជាដាច់ខាត ពីព្រោះមានសាក្សី ចង្អុលបង្ហាញយ៉ាងច្បាស់លាស់រួចទៅហើយ ហើយបើបានចំលើយសារភាពពីជនជាប់ចោទនោះ លោក នឹងដាក់បញ្ជាឱ្យកំលាំងជំនាញតាមចាប់ខ្លួនបក្សពួករបស់ឈ្មោះស៊ឹម ម៉ៅ ដែលកំពុងរត់គេចខ្លួននេះ យក មកផ្ដន្ទទោសទៅតាមច្បាប់ឱ្យបាន ។

Labels: សន្តិសុខ

By Hang Meas
On
At 10:40 AM
Comments :

ស្ដ្រីលក់ស្រាបៀរចូលរួមសិក្ខាសាលារិះរកវិធីសាស្ដ្រជួយខ្លួនឯង

ទិដ្ឋភាពក្នុងសិក្ខាសាលានៅសណ្ឋាគារផារ៉ាន់ដា (រូបថត កោះសន្តិភាព)

រាជធានីភ្នំពេញ ៖ អង្គការកម្ពុជាដើម្បីជួយស្ដ្រីមានវិបត្ដិហៅកាត់ថា CWCC បានរៀបចំសិក្ខា សាលាស្ដីពីសេចក្ដីត្រូវការរបស់ស្ដ្រីលក់ស្រាបៀរកាលពីថ្ងៃទី២៤ ឧសភា នៅសណ្ឋាគារឡាផារ៉ាន់ដា ដោយមានអ្នកតំណាងក្រុមហ៊ុនផលិតស្រាបៀរ អ្នកចែកចាយស្រាបៀរ និងអង្គការក្រៅរដ្ឋាភិបាល ជាច្រើនរូបចូលរួម ។

លោកហឿង សុផុន ប្រធាននាយកដ្ឋានព័ត៌មានទីផ្សារការងារតំណាងឱ្យលោកវង សូត រដ្ឋមន្ដ្រី ក្រសួងការងារ និងបណ្ដុះបណ្ដាលវិជ្ជាជីវៈ ដែលចូលរួមជាអធិបតីក្នុងពិធីនោះបានថ្លែងសុន្ទរកថា មានខ្លឹម សារថា សិក្ខាសាលានេះរៀបចំធ្វើឡើងក្នុងគោលបំណងដើម្បីរកឱ្យឃើញនូវសេចក្ដីត្រូវការពិតប្រាកដ របស់ស្ដ្រីលក់ស្រាបៀរ ជាពិសេសគឺដើម្បីជួយពួកនាងឱ្យមានលទ្ធភាពជួយខ្លួនឯងបាន ទាំងសុខភាព ជីវភាព ភាពរើសអើង ភាពមើលងាយ និងការដោះខ្លួនដោយសមរម្យចំពោះការប៉ុនប៉ងមើលងាយ មើល ថោក ពីសំណាក់អតិថិជនមួយចំនួនរបស់ខ្លួន។

លោកបញ្ជាក់ថា ចង់អនុវត្ដការងារនេះឱ្យមានប្រសិទ្ធភាពខ្ពស់ និងឆាប់រហ័សក្រុមហ៊ុនផលិតស្រាបៀរ និងក្រុមហ៊ុនផ្សព្វផ្សាយ ស្រាបៀរគ្រប់ប្រភេទ ម្ចាស់ភោជនីយដ្ឋាន រង្គសាល ក្លឹបកំសាន្ដរាត្រី ហាងខារ៉ាអូខេ និងសាធារណជនទាំងអស់ដែលទៅចូលរួម កំសាន្ដសប្បាយ គប្បីរក្សាឱ្យបាននូវអាកប្ប កិរិយា សេចក្ដីថ្លៃថ្នូរ និងធានាបាននូវប្រពៃណីទំនៀមទំលាប់ដែលដូនតាខ្មែររក្សាទុក ។

លោកស្រីអ៊ុង ច័ន្ទថុល នាយិកាប្រតិបត្ដិអង្គការកម្ពុជាដើម្បីជួយស្ដ្រីមានវិបត្ដិបានថ្លែងថា សិក្ខា សាលានេះរៀបចំឡើងដើម្បីចូលរួមចំណែកជាមួយគោលនយោបាយរាជរដ្ឋាភិបាល និងក្រុមហ៊ុនក្នុងការ ធ្វើឱ្យស្ថានភាពស្ដ្រីលក់ស្រាបៀរមានភាពប្រសើរជាងមុន ។ នៅចុងបញ្ចប់នៃសិក្ខាសាលាសង្ឃឹមថា នឹងមានការយល់ដឹង និងប្រមូលព័ត៌មាន ដែលទាក់ទងទៅនឹងផែនការសុវត្ថិភាព សំរាប់ស្ដ្រីលក់ស្រាបៀរ និងអាចកែលំអ ចំពោះទស្សនៈរើសអើងដែលគេតែងយល់ថា ស្ដ្រីលក់ស្រាបៀរទាំងអស់សុទ្ធតែជាស្ដ្រី ដែលបំរើសេវាផ្លូវភេទ និងចង់សប្បាយ ។

លោកស្រីបញ្ជាក់ថា អង្គការកម្ពុជាដើម្បីជួយស្ដ្រីមានវិបត្ដិបានបង្កើតឡើងកាលពី ឆ្នាំ១៩៩៧ ដោយសារ មើលឃើញនូវអំពើហិង្សាលើស្ដ្រី និងកុមារមានសភាពធ្ងន់ធ្ងរ និងមានកង្វះខាតសេវាកម្មជួយដល់ស្ដ្រី និង កុមាររងគ្រោះដោយអំពើហិង្សាទាំងអស់នោះ ។ ទស្សនៈអង្គការកម្ពុជាដើម្បីជួយ ស្ដ្រីមានវិបត្ដិ គឺលុបបំបាត់អំពើហិង្សាលើស្ដ្រី និងកុមារដើម្បីឱ្យទទួលបាននូវសមភាព និង សន្ដិភាព ។ បេសកកម្ម របស់អង្គការ គឺជួយស្ដ្រី និងកុមារឱ្យចាកផុតពីអំពើហិង្សាក្នុង គ្រួសារការជួញដូរ និងការរំលោភសេព សន្ថវៈ ជាពិសេសគឺដើម្បីឱ្យចេះជួយខ្លួនឯងតែម្ដង ។

សិក្ខាសាលាបានណែនាំស្ដ្រីលក់ស្រាបៀរ ឱ្យចេះនិយាយយ៉ាងណាឱ្យភ្ញៀវទទួលយកបាន ក្នុងការប្រកែក មិនព្រមអង្គុយជិតភ្ញៀវ និងត្រូវមានសេចក្ដីក្លាហានហ៊ានប្ដឹងចំពោះបុរសទាំងឡាយ ដែលបំពារបំពាន រំលោភបំពានលើនារីភេទទៅសមត្ថកិច្ច ហើយបើសិនមិនចេះរកកន្លែងប្ដឹងទេនោះ គឺត្រូវរត់រកអង្គការ កម្ពុជាដើម្បីជួយស្ដ្រីមានវិបត្ដិដើម្បីឱ្យជួយ ។

អត្ថបទ កោះសន្តិភាព

Labels: សន្តិសុខ, សុខាភិបាល, សេដ្ឋកិច្ច

By Hang Meas
On
At 10:36 AM
Comments :

កងរាជអាវុធហត្ថក្រុងព្រះសីហនុឃាត់ខ្លួនចោរឆក់អ្នកទេសចរ នៅឆ្នេរអូរឈើទាល

ជនទាំង២នាក់ត្រូវចាប់ខ្លួន (រូបថត កោះសន្តិភាព)

ក្រុងព្រះសីហនុ ៖ ជនជាប់ចោទ២នាក់ ដែលធ្វើសកម្មភាពឆក់យកកាបូបពីអ្នកទេសចរជនជាតិន័រវ៉េស ម្នាក់ នៅចំណុចមុខផ្ទះសំណាក់មករាតំបន់ឆ្នេរសមុទ្រអូរឈើទាល ត្រូវសមត្ថកិច្ចកងរាជអាវុធហត្ថ ក្រុងព្រះសីហនុឃាត់ខ្លួនបានកាលពីវេលាថ្ងៃត្រង់ថ្ងៃទី២៣ ឧសភា ឆ្នាំ២០០៧ ដោយដកហូតបាននូវ សំភារៈ និងប្រាក់មួយចំនួនប្រគល់ជូនជនរងគ្រោះវិញ ។

លោកវរសេនីយ៍ទោហេង ប៊ុនទី មេបញ្ជាការរងកងរាជអាវុធហត្ថក្រុងព្រះសីហនុបានឱ្យដឹងថា ជនសង្ស័យ ទាំងពីរនេះម្នាក់ឈ្មោះ ម៉ៅ សុជា ភេទប្រុស អាយុ៣១ឆ្នាំ និងម្នាក់ទៀតឈ្មោះម៉ៅ ចំរើន ភេទប្រុស អាយុ២២ ឆ្នាំ អ្នកទាំងពីរមុខរបរមិនពិតប្រាកដ មានទីលំនៅជាមួយគ្នាក្នុងសង្កាត់លេខ៤ ខណ្ឌមិត្ដភាព ក្រុងព្រះសីហនុ ។ ពួកគេបានធ្វើសកម្មភាពឆក់យកកាបូបស្ពាយមានដាក់សំភារៈ និងលុយកាក់ពីជនជាតិ ន័រវ៉េសម្នាក់ ដែលកំពុងដើរកំសាន្ដនៅតាមឆ្នេរសមុទ្រអូរឈើទាល កាលពីព្រឹកថ្ងៃទី២២ ឧសភា រួច ក៏សំងំលាក់ខ្លួនបានមួយថ្ងៃ ក៏ត្រូវសមត្ថកិច្ចកងរាជអាវុធហត្ថក្រុងព្រះសីហនុស្រាវជ្រាវរកឃើញ និងចាប់ ខ្លួនបាន ក្នុងកាបូបនោះមានលុយកាក់របស់ជនរងគ្រោះ និងសំភារៈមួយចំនួនរួមមានកាម៉េរ៉ាថតរូប មួយគ្រឿង ទូរស័ព្ទដៃពីរគ្រឿង កុំព្យូទ័រម៉ាកឡេបថបពីរគ្រឿង កាតធនាគារ៣សន្លឹក សំបុត្រយន្ដហោះ ២សន្លឹក ប្រាក់ថៃ ៣០.០០០បាត ប្រាក់ដុល្លារអាមេរិក១៦០ ដុល្លារ និងប្រាក់ប្រទេសន័រវ៉េស១.០០០ ដុល្លារ។

ក្រោយពេលឃាត់ខ្លួនក្រុមចោរឆក់នេះ សមត្ថកិច្ចបានដកហូតសំភារៈលុយកាក់មួយចំនួនប្រគល់ជូនជន រងគ្រោះវិញ ប៉ុន្ដែនៅមានបាត់បង់ខ្លះ ហើយជនសង្ស័យទាំងពីរត្រូវសមត្ថកិច្ចកសាងសំណុំរឿងបញ្ជូន ខ្លួនទៅកាន់តុលាការ ដើម្បីផ្ទន្ទាទោសតាមច្បាប់ ។

អត្ថបទ កោះសន្តិភាព

Labels: សន្តិសុខ

By Hang Meas
On
At 10:31 AM
Comments :

គ្រោងពិភាក្សាសេចក្ដីព្រាងច្បាប់ប្រឆាំងភេរវកម្មខែមិថុនា

រាជធានីភ្នំពេញ ៖ លោកយឹម សុវណ្ណ ប្រធានគណៈកម្មការទី៤របស់រដ្ឋសភាបានមានប្រសាសន៍ថា ច្បាប់ប្រឆាំងអំពើភេរវកម្ម ដែលស្នើឡើងដោយរាជរដ្ឋាភិបាលបានបញ្ជូនមកដល់រដ្ឋសភាហើយ ដែល ពេលនេះគណៈកម្មាធិការអចិន្ដ្រៃយ៍នៃរដ្ឋសភាបានអនុម័តយល់ព្រម បញ្ជូនមកគណៈកម្មការជំនាញរួច រាល់ហើយ។ នៅពេលដ៏ខ្លីខាងមុខនេះ គណៈកម្មការជំនាញនឹងដាក់ចូលអង្គប្រជុំសភា នៅពេលដ៏ខ្លី ខាងមុខនេះ គឺក្នុងសបា្ដហ៍ទី១ នៃខែមិថុនា ឆ្នាំ២០០៧ ។

លោកយឹម សុវណ្ណ បានបន្ដថា នៅក្នុងដំណាក់កាលទី១ គណៈកម្មការទី៤ បានធ្វើការប្រជុំពិភាក្សាគ្នា រួចរាល់ហើយ។ ក្នុងដំណាក់កាលទី២ យើងបានរៀបចំកិច្ចពិគ្រោះយោ បល់មួយដែលមានអ្នកតំណាងរាស្ដ្រ និងមានអ្នកជំនាញមកពីប្រទេសអូស្ដ្រាលីចូលរួមផ្ដល់អនុសាសន៍ផងដែរ ។ លោកបន្ដថា នៅថ្ងៃទី ២៥ ខែឧសភា គណៈកម្មការជំនាញពិភាក្សាជាមួយតំណាងសង្គមស៊ីវិលបន្ថែម ដើម្បីទទួលបានមតិយោបល់ នឹងអនុសាសន៍ផ្សេងៗទៀត បន្ទាប់មកយើងនឹងរៀបចំដំណាក់កាលចុងក្រោយជាមួយតំណាងរដ្ឋាភិបាល ។
លោកយឹម សុវណ្ណ បានថ្លែងថា ច្បាប់នេះ មាន១៣ជំពូក ១១៣មាត្រា ដោយក្នុងនោះមានកំណត់ នូវទោសព្រហ្មទណ្ឌកំរិតធ្ងន់ ដោយបែងចែកទៅតាមកម្រិតនៃទោស និងប្រភេទនៃការប្រព្រឹត្ដ ។ លោកបន្ដថា មានដូចជាការប្រព្រឹត្ដនៅលើយន្ដហោះ លើនាវាការដាក់គ្រាប់បែកបំផ្ទុះនៅលើដីគោក ក្នុងអគារសាធារណៈ ការកំណត់ក៏ទៅតាមនេះ រហូតដល់ទោសដាក់គុកមួយជីវិត ឬក៏មាន សំណងជម្ងឺចិត្ដ ដោយសារតែប្រទេសយើង គ្មានទោសប្រហារជីវិត ។

លោកជាម យៀប ប្រធានគណៈកម្មការទី២របស់រដ្ឋសភា និងជាសមាជិកអចិន្ដ្រៃយ៍ រដ្ឋសភាបានមាន ប្រសាសន៍ថា ដោយប្រទេសកម្ពុជាជាសមាជិកពេញសិទ្ធិនៃប្រទេសអាស៊ាន និងសមាជិកអង្គការ សហប្រជាជាតិ ហើយបច្ចុប្បន្នអំពើភេរវកម្មអន្ដរជាតិកំពុងតែរីកដុះដាលក្ដៅគគុក នៅគ្រប់តំបន់ទាំងអស់ នោះ ដូច្នេះប្រទេសកម្ពុជាចាំបាច់ត្រូវតែមានច្បាប់មួយស្ដីអំពីការបង្ក្រាបអំពើភេរវកម្មជាតិក្ដី-អន្ដរជាតិក្ដី កុំឱ្យមានទាស់ និងស្របទៅតាមប្រទេសយើងដែលជាសមាជិក នៃប្រទេសអាស៊ីអាគ្នេយ៍ផង និង ក្នុងសាកលលោកផង ។

លោកឯក សំអុល ប្រធានគណៈកម្មការនីតិកម្ម នៃរដ្ឋសភាបានមានប្រសាសន៍ថា ច្បាប់នេះកំពុងស្ថិតនៅ ក្នុងដៃគណៈកម្មការជំនាញរបស់លោកយឹម សុវណ្ណ នៅឡើយ ។ លោកបន្ដថា “ស្ថានទូតអាមេរិកក៏គេបាន ទូរស័ព្ទមកសាកសួរលោកដែរជុំវិញបញ្ហាច្បាប់ប្រឆាំងអំពើភេរវកម្មនេះ” ។ តែលោក យឹម សុវណ្ណ បានគូ សបញ្ជាក់ថា បើសិនជាមិនមានការប្រទាំងប្រទើសគ្នាទេ ការពិភាក្សាជាមួយតំណាងរាជរដ្ឋាភិបាល នឹង ធ្វើឡើងនៅថ្ងៃទី៤ ខែមិថុនា ខាងមុខនេះ ។ លោកបន្ដទៀតថា “យើងនឹងបញ្ចូលទៅក្នុងសភាពេញអង្គ នៅពេលដ៏ខ្លីខាងមុខ” ។

Labels: នយោបាយ

By Hang Meas
On
At 10:25 AM
Comments :

ពលរដ្ឋជាង២០០គ្រួសាររំជើបរំជួលជុំវិញការអនុវត្ដន៍ដីការុះរើផ្ទះ

លោកមេឃុំប៉ោយប៉ែតទៅជួបប្រជាពលរដ្ឋដល់ចំណុចដីដែលសាលដីកាតំរូវឱ្យរុះរើ (រូបថត កោះសន្តិភាព)

ខេត្ដបន្ទាយមានជ័យ ៖ នៅព្រឹកថ្ងៃទី២៥ ឧសភា ប្រជាពលរដ្ឋប្រមាណ២០០គ្រួសារ ដែលរស់នៅ លើដីសមាគមអភិវឌ្ឍន៍កសិកម្មជាតិចំណុចដើមចាមរី ក្នុងភូមិបាលិលេយ្យ ឃុំប៉ោយប៉ែត ស្រុកអូរជ្រៅ ខេត្ដបន្ទាយមានជ័យ បានលើកគ្នាទៅសាលាឃុំ ដើម្បីតវ៉ាសុំឱ្យអាជ្ញាធរជួយធ្វើការដោះស្រាយជូនពួកគាត់ ព្រោះមានដីកាឱ្យរុះរើ ផ្ទះរបស់ពួកគាត់នៅថ្ងៃទី២៩ឧសភាខាងមុខ។

លោកសាន ស៊ានហូ ប្រធានក្រុមប្រឹក្សាឃុំប៉ោយប៉ែត ដែលទើបជាប់ឆ្នោតបានណែនាំឱ្យប្រជាពលរដ្ឋ ទាំងអស់វិលត្រឡប់ទៅកាន់លំនៅឋានវិញ ។ នៅវេលាម៉ោង១០ព្រឹកថ្ងៃ ទី២៥ ឧសភា លោកប្រធាន ឃុំប៉ោយប៉ែត បានដឹកនាំកំលាំងរួមមានសមត្ថកិច្ចប៉ូលិសប៉ុស្ដិ៍រដ្ឋបាលឃុំ និងសមត្ថកិច្ចប៉ូលិសការពារ ព្រំដែនគោកវរៈ៩១១ ចុះទៅចំណុចដីសមាគមកសិកម្មធម្មជាតិ ហើយបានប្រមូលប្រជាពលរដ្ឋទាំងអស់ មកជុំគ្នា។ ខណៈនោះលោកឱ្យដឹងថា ប្រជាពលរដ្ឋដែលលើកគ្នាទៅតវ៉ានៅសាលាឃុំ ឱ្យលោកជួយរក ដំណោះស្រាយនោះ គឺត្រូវតែសហការជាមួយអាជ្ញាធរមូលដ្ឋាន ។ ចំពោះដីកាដែលតម្រូវឱ្យរុះរើផ្ទះសម្បែង នៅថ្ងៃទី២៩ ឧសភា នោះគឺពិតជាមានមែន ប៉ុន្ដែលោកបានសុំឱ្យផ្អាកការអនុវត្ដដីកាសិន ។ ដោយឡែក លោកសុំឱ្យប្រជាពលរដ្ឋជួយសហការជាមួយអាជ្ញាធរមូលដ្ឋាននោះ គឺត្រូវស្រង់ស្ថិតិឱ្យបានច្បាស់លាស់ រួចលោកនឹងស្នើសុំទៅថ្នាក់ លើឱ្យជួយដោះស្រាយរឿងនេះ ។

លោកមេឃុំបន្ដថា ពលរដ្ឋទាំងអស់ត្រូវបញ្ជាក់ឱ្យច្បាស់ថា តើដីដែលកំពុងរស់នៅនេះបានមកពីទិញ ឬជាដី សម្បទានមកពីខាងណា។ លើសពីនេះលោកនឹងស្រាវជ្រាវរកមេខ្យល់ដើម្បីឱ្យច្បាប់ផ្ដន្ទាទោស ។

ប្រជាពលរដ្ឋទាំងអស់ឱ្យដឹងថា ពួកគាត់មករស់នៅលើដីនេះគឺដោយសារមនុស្ស៤ទៅ៥នាក់ សម្បទាន ឱ្យពួកគាត់ដោយបានរស់នៅជាង១ឆ្នាំមកហើយ ។ ចំណែកដីកន្លែងខ្លះ គឺខាងអាជ្ញាធរខេត្ដដឹកនាំដោយ លោកសុខ សារ៉េត បានចុះដោះស្រាយម្ដងរួចមកហើយៗបានសំរេចឱ្យពួកគាត់រស់នៅ ។ ទោះបីជា យ៉ាងណានៅពេលនេះមានដីកាឱ្យចុះរុះរើផ្ទះសម្បែងរបស់ពួកគាត់នៅថ្ងៃទី២៩ ឧសភា ក៏សំរេចដោយ លោកសុខ សារ៉េត អភិបាលរងខេត្ដបន្ទាយមានជ័យនេះដែរ ។ ទាក់ទិនរឿងនេះពួកគាត់សំណូមពរ សូមនាយករដ្ឋមន្ដ្រីហ៊ុន សែន ជួយរកដំណោះស្រាយណាមួយឱ្យពួកគាត់បានរស់នៅផង ពីព្រោះពួក គាត់គ្មានដីធ្លីអ្វីសំរាប់នៅទេ ក្រៅពីដីនេះ ។

អត្ថបទ កោះសន្តិភាព

Labels: សន្តិសុខ

By Hang Meas
On
At 10:17 AM
Comments :

រថយន្ដដឹកដីកៀរប៉ូលិសជិះម៉ូតូដួលបែកក្បាលស្លាប់

មន្ដ្រីប៉ូលិសដេកស្លាប់បែបនេះដោយសាររថយន្ដដឹកដីបើកកៀរ (រូបថត.កោះសន្តិភាព)

រាជធានីភ្នំពេញ ៖ បុរសម្នាក់បានស្លាប់នៅក្នុងថ្លុកឈាមដោយសារពេលជិះម៉ូតូត្រូវរថយន្ដកៀរ ដួល បោកក្បាលទៅលើថ្នល់ កាលពីវេលាម៉ោងជិត៥ភ្លឺ ថ្ងៃទី២៥ ខែឧសភា ឆ្នាំ២០០៧ នៅលើកំណាត់មហា វិថីសហព័ន្ធរុស្ស៊ីស្ថិតក្នុងភូមិក្បាលដំរី សង្កាត់កាកាប ខណ្ឌដង្កោ ក្រុងភ្នំពេញ ។

គ្រោះថ្នាក់ចរាចរណ៍នោះ បើតាមសាក្សីម្នាក់អះអាងថា រថយន្ដធុនធំដឹកដីមួយគ្រឿងបានបើកកៀរ បុរសរងគ្រោះពេលជិះម៉ូតូតែម្នាក់ឯង ។ បុរសនោះឈ្មោះតន់ សឿន អាយុ៤៧ឆ្នាំ ជាមន្ដ្រីប៉ូលិស នៅនាយកដ្ឋានអង្គរក្សក្រសួងមហាផ្ទៃ មានទីលំនៅក្នុងភូមិ៧ ក្រុមទី៣៥ ផ្លូវរថភ្លើង សង្កាត់បឹងកក់ទី២ ខណ្ឌទួលគោក រាជធានីភ្នំពេញ ។

តាមប្រភពព័ត៌មានមួយឱ្យដឹងថា លោក តន់ សឿន ជិះម៉ូតូម៉ាកអ៊ិចវ័ន (X1) ពណ៌ត្រួយចេក តាម ដងមហាវិថីសហព័ន្ធរុស្ស៊ីក្នុងទិសដៅពីកើតទៅលិចតែម្នាក់ឯង។ លុះពេលទៅដល់ត្រង់ចំណុចកើតហេតុ ត្រូវរថយន្ដធុនធំដឹកដីមិនស្គាល់ម៉ាក ដែលបើកបរយ៉ាងលឿនស្របទិសគ្នាកៀរម៉ូតូរបស់លោក បណ្ដាល ឱ្យដួលបោកក្បាលទៅលើថ្នល់ស្លាប់ភ្លាមមួយរំពេចតែម្ដង ។

ប្រភពដដែលបន្ដទៀតថា ក្រោយពេលបើកកៀរអ្នកជិះម៉ូតូរួច ហើយរថយន្ដនោះ បន្ថែមល្បឿនកាន់តែ លឿនឡើងគេចទៅទិសខាងលិចបាត់ ។ ប៉ូលិសឱ្យដឹងថា ពេលសមត្ថកិច្ចចុះទៅវាស់វែងឃើញសពមន្ដ្រី ប៉ូលិសនោះស្ថិតក្នុងថ្លុកឈាមក្បែរម៉ូតូរបស់ខ្លួន ហើយក្រៅពីនេះមានកាំភ្លើងខ្លីមួយដើម និងត្រីខកំប៉ុង មួយចំនួនទៀត ។ ប៉ូលិសសន្និដ្ឋានថា មន្ដ្រីប៉ូលិសរងគ្រោះទំនងត្រូវរថយន្ដធុនធំនោះបើកកៀរដូចជា ការអះអាងរបស់សាក្សីមែន ព្រោះឃើញមានស្នាមអូសប្រវែងប្រហែល១៣ម៉ែត្រឯណោះ ។ ទោះបីជា បែបណារថយន្ដនោះម៉ាកអ្វី និងរបស់ក្រុមហ៊ុនណាពុំមានប្រភពបញ្ជាក់ឡើយ។ សពត្រូវបានប្រគល់ឱ្យ ក្រុមគ្រួសារនាំយកទៅធ្វើបុណ្យ។

ប្រជាពលរដ្ឋនៅម្ដុំកើតហេតុឱ្យដឹងថា រថយន្ដដឹកដីបើកបរប្រណាំងគ្នាក៏មានដែរ នៅលើកំណាត់មហាវិថី សហព័ន្ធរុស្ស៊ីនាវេលាជិតភ្លឺ។ ក្រុមអ្នកបើកបររថយន្ដទាំងនោះមិនគិតពីសុវត្ថិភាពអ្នកដំណើរតាមផ្លូវទេ ព្រោះពេលបើកបុកមនុស្សហើយបើករត់ តែបើបើករត់មិនរួចមានក្រុមហ៊ុនធានារ៉ាប់រង ឬថៅកែចេញមុខ ដោះស្រាយ។ ម្យ៉ាងទៀតថៅកែរបស់ពួកគេណែនាំថា បើកបរធ្វើយ៉ាងម៉េចឱ្យលឿនដើម្បីបានច្រើនជើង ហើយបើមានគ្រោះថ្នាក់ធ្វើយ៉ាងណារត់ឱ្យតែរួចខ្លួន ចាំគេជាថៅកែចេញមុខដោះស្រាយ។

អត្ថបទ កោះសន្តិភាព

Labels: សន្តិសុខ

By Hang Meas
On
At 10:13 AM
Comments :

ស្រែកយំឡាំប៉ាមុខតុលាការ ខឹងមិនឃុំខ្លួនជនចុងចោទ

ស្ដ្រីដើមចោទឡាំប៉ាមុខខ្លោងទ្វារតុលាការ (រូបថត កោះសន្តិភាព)

រាជធានីភ្នំពេញ ៖ មានការភ្ញាក់ផ្អើល មួយនៅមុខតុលាការក្រុងភ្នំពេញកាលពីព្រឹកថ្ងៃទី២៥ ឧសភា ដោយមានស្ដ្រីមេម៉ាយម្នាក់បានស្រែកទ្រហោយំឡាំប៉ា តវ៉ាដល់តុលាការ ដែលមិនឃុំខ្លួនភាគីចុងចោទ។ ស្ដ្រីមេម៉ាយដែលយំសោកបោកប្រាណនៅមុខតុលាការក្រុងភ្នំពេញនេះ ត្រូវបានគេស្គាល់ថាឈ្មោះ រ័ត្ន សុភាព អាយុ៤៣ឆ្នាំ ស្នាក់នៅផ្ទះលេខ២៤ មហាវិថីព្រះនរោត្ដម សង្កាត់ទន្លេបាសាក់ ខណ្ឌចំការមន មានមុខរបរជាអ្នករកស៊ីម៉ៅការភាស៊ីតាមផ្សារ ។

ទាក់ទិននឹងការភ្ញាក់ផ្អើលនេះ ត្រូវបានគេកត់សំគាល់ឃើញថា ខណៈពេលដែលចៅក្រមបានកោះអញ្ជើញ បុរសឈ្មោះជា ទី ឱ្យចូលខ្លួន ដើម្បីធ្វើការសាកសួរតាមបណ្ដឹងរបស់ស្ដ្រីមេម៉ាយខាងលើដែលជាដើម បណ្ដឹង ។ ពេលបុរសឈ្មោះ ជា ទី ឡើងតុលាការតាមដីកាកោះអញ្ជើញនោះ ដើមបណ្ដឹង គឺអ្នកស្រី រ័ត្ន សុភាព ក៏ទៅតាមឆ្មក់លបមើលដំណើរការរបស់តុលាការផងដែរ ដោយមិនទុកចិត្ដខ្លាចតុលាការមិនចោទ ប្រកាន់ឃុំខ្លួនបុរសចុងចោទ។ នៅម៉ោងប្រមាណជិត១១ព្រឹក អ្នកស្រីរ័ត្ន សុភាព ទទួលបានព័ត៌មានចេញ ពីក្នុងតុលាការវិញថា ចៅក្រមមិនបានចោទប្រកាន់ឱ្យឃុំខ្លួនឈ្មោះជា ទី ជាចុងចោទនោះទេ ទើបអ្នក ស្រីរ័ត្ន សុភាព ស្រែកយំឡាំប៉ារកតែគេចាប់មិនឈ្នះនៅពីមុខខ្លោងទ្វារតុលាការក្រុងភ្នំពេញ ហើយបានធ្វើ ឱ្យមនុស្សម្នាអ្នកដំណើរភ្ញាក់ផ្អើលឈរមើលគ្រប់គ្នា ។

តាមសំដីដែលអ្នកស្រីស្រែកទ្រហោយំ លាយឡំនឹងទឹកភ្នែកនោះ អ្នកស្រីបានចោទប្រកាន់ទៅលើមន្ដ្រី ស្ថាប័នតុលាការក្រុងភ្នំពេញថា មិនយុត្ដិធម៌ទេ ដែលដោះលែងឱ្យមនុស្សជាជនខិលខូចបានរួចខ្លួន និងមាន ពាក្យអសុរោះច្រើនទៀត ដែលអ្នកស្រីដៀលត្មះលើប្រព័ន្ធតុលាការ ។ ជាមួយគ្នានោះ អ្នកស្រីបានជេរ ប្រទេចទៅលើបុរសឈ្មោះជា ទី ជាចុងចោទថា ធ្លាប់បានប្រើល្បិចក្លែងបន្លំឯកសារមួយចំនួន ឃុបឃិត ជាមួយមន្ដ្រីនគរបាលខិលខូច រត់ការទៅតុលាការចាប់ខ្លួនរូបគាត់ដាក់គុក២ដងយ៉ាងអយុត្ដិធម៌បំផុត។ ស្ដ្រី មេម៉ាយរូបនេះបានឡាំប៉ានៅមុខតុលាការ ក្រុងភ្នំពេញអស់រយៈពេលជិត១ម៉ោង បើទោះបីនគរបាល ការពារស្ថាប័នតុលាការអង្វរយ៉ាងណាក៏ដោយ ក៏កំហឹងទាំងឡាយត្រូវអ្នកស្រីស្រែកទំលាយរហូតដល់ហត់ អស់កំលាំងទើបបានឈប់ ។ អ្នកស្រីរៀបរាប់ដំណើររឿងឱ្យដឹងថា ក្នុងអំឡុងឆ្នាំ២០០៥ អ្នកស្រី ត្រូវបានឈ្មោះជា ទី ឈ្មោះកុក យូ និងឈ្មោះហូរ សារ៉េត បង្កើតឯកសារក្លែងក្លាយប្ដឹងអ្នកស្រី រឿងដេញថ្លៃភាស៊ីតាមផ្សារ និងយឿត្រីដែលអ្នកស្រីកំពុងប្រកបអាជីវកម្មស្របច្បាប់ ។

ការក្លែងឯកសារប្ដឹងអ្នកស្រីបានធ្វើឱ្យអ្នកស្រីជាប់គុក២លើក ទាំងក្ដីឈឺចាប់បំផុត ព្រោះថា ទាំងរូបរាង កាយ ទាំងមុខរបរត្រូវបាត់បង់ ។ ការឈឺចាប់ទាំងអស់នោះ ពេលអ្នកស្រីបានរួចពីការចោទប្រកាន់មកវិញ អ្នកស្រីបានពឹងពាក់អ្នកច្បាប់ គឺមេធាវីឱ្យជួយធ្វើពាក្យបណ្ដឹងប្ដឹងឈ្មោះជា ទី និងគូកន ដើម្បីឱ្យតុលាការ វែកមុខជនខិលខូច។ អ្នកស្រីរ័ត្ន សុភាព បានបន្ដទៀតថា អ្នកស្រីបានធ្វើពាក្យបណ្ដឹងដាក់ទៅ សមត្ថកិច្ចនគរបាលក្រសួងមហាផ្ទៃ ទើបនគរបាលក្រសួងមហាផ្ទៃកសាងសំណុំរឿងនេះដាក់ជូនតុលាការ ក្រុងភ្នំពេញ គឺដោយមានរឿងហេតុយ៉ាងដូច្នេះហើយ ទើបតុលាការបានកោះហៅឈ្មោះជាទីឱ្យចូលខ្លួន ដើម្បីសាកសួរ ។ នៅពេលលោកចៅក្រមម្នាក់សាកសួរ ហើយតាមឆន្ទានុសិទ្ធិរបស់ចៅក្រមរូបនោះបំរុង ឃុំខ្លួនឈ្មោះជា ទី ពីបទក្លែងលិខិតសាធារណៈ ប៉ុន្ដែដោយមានសម្ពាធជុំវិញធ្វើឱ្យលោកចៅក្រមរូបនោះ មិនហ៊ានឃុំខ្លួនឈ្មោះជា ទី ទេ ត្រង់ហ្នឹងហើយ ទើបធ្វើឱ្យរូបអ្នកស្រីមិនពេញចិត្ដចំពោះទង្វើរបស់ តុលាការក្រុងភ្នំពេញ ។

អ្នកស្រីបានបន្ដទៀតថា កិត្ដិយសអ្នកស្រីត្រូវគេក្លែងលិខិតចាប់ដាក់គុកទទេៗបាន និងប្រាក់ ១៨០.០០០ដុល្លារសហរដ្ឋអាមេរិកត្រូវខាតបង់ ។ ផ្ទុយទៅវិញ ជនខិលខូចដែលអ្នកស្រីបានព្យាយាម ផ្ដល់ឯកសារគ្រប់គ្រាន់សំរាប់ធ្វើការចោទប្រកាន់នោះបែរជារួចខ្លួន ចំណែកអ្នកស្រីបែរជាទទួលរងនូវភាព អយុត្ដិធម៌មកវិញនេះ ហើយដែលធ្វើឱ្យកំហឹងពុះពោរទប់មិនបានមានតែការស្រែកទ្រហោយំ ដើម្បីកាត់ បន្ថយភាពតឹងតែងអួលណែនក្នុងដើមទ្រូង ។

ទាក់ទងនឹងការចោទប្រកាន់ខាងលើនេះ កោះសន្ដិភាពបានព្យាយាមរង់ចាំជួបលោក ជា ទី ដែរ ដើម្បី បានបំភ្លឺ ក៏ប៉ុន្ដែគួរឱ្យសោកស្ដាយ ពេលដែលលោកជា ទី ត្រូវបានតុលាការក្រុងអនុញ្ញាតឱ្យទៅផ្ទះ គាត់ដោយបានឱ្យលួចចេញតាមទ្វារក្រោយបាត់ ។ មិនមានការអធិប្បាយណាមួយពីមន្ដ្រីតុលាការទេ។

អត្ថបទ កោះសន្តិភាព

Labels: សន្តិសុខ

By Hang Meas
On
At 10:02 AM
Comments :

ក្រុមក្មេងស្ទាវជិះម៉ូតូដេញកាប់គ្នាមុខប៉ុសិ៍្ដប៉ូលិស

ក្រុមស្ទាវធ្វើអ្នកលេងនៅតំបន់ប៉ោយប៉ែត (រូបថត កោះសន្តិភាព)

ខេត្ដបន្ទាយមានជ័យ ៖ ក្រុមក្មេងស្ទាវ៤នាក់ត្រូវបានកំលាំងប៉ូលិសប៉ុសិ៍្ដរដ្ឋបាលឃុំប៉ោយប៉ែត ធ្វើការ ឃាត់ខ្លួន ខណៈដែលពួកគេជិះម៉ូតូ២គ្រឿង ដេញកាប់ចាក់គ្នានៅនឹងមុខប៉ុសិ៍្ដប៉ូលិសប៉ោយប៉ែត ។ ហេតុ ការណ៍នេះបានបង្កឱ្យមានការភ្ញាក់ផ្អើលដល់ប្រជាពលរដ្ឋកាលពីវេលាម៉ោង១០ព្រឹក ថ្ងៃទី២៣ ឧសភា កន្លងទៅ នៅតាមទីសាធារណៈបង្កការភ័យខ្លាចដល់ប្រជាពលរដ្ឋទូទៅ ។

លោកអនុសេនីយ៍ត្រីសូយ សំណាង នាយរងប៉ុសិ៍្ដរដ្ឋបាលប៉ោយប៉ែតបានឱ្យដឹងថា ក្រុមក្មេងស្ទាវដែល ត្រូវបានឃាត់ខ្លួននោះ មាន១-ឈ្មោះសូវ ប៊ុនឆាយ ភេទប្រុស អាយុ២៣ឆ្នាំ ២-ឈ្មោះសូវ ប៊ុនហេង ភេទប្រុស អាយុ១៨ឆ្នាំ ៣-ឈ្មោះសូវ ប៊ុនផេង ភេទប្រុស អាយុ ២៥ឆ្នាំ ទាំង៣នាក់នេះជា បងប្អូនបង្កើតនឹងគ្នា រស់នៅក្នុងឃុំប៉ោយប៉ែត ស្រុកអូរជ្រៅ បានព្រួតគ្នាដេញវាយកាប់ចាក់លើយុវជន ម្នាក់ទៀតឈ្មោះសៀង សាន អាយុ២២ឆ្នាំ រស់នៅភូមិថ្មី ឃុំប៉ោយប៉ែត ស្រុកអូរជ្រៅ ជាអ្នករត់ ម៉ូតូឌុបនៅតំបន់ប៉ោយប៉ែត នោះ ។

លោកនាយរងប៉ុសិ៍្ដឱ្យដឹងទៀតថា ទំនាស់គ្នានេះបើតាមការឱ្យដឹងពីឈ្មោះសៀង សាន ថា គេពុំដែលធ្លាប់ មានទំនាស់ពាក្យសំដី ឬ វិវាទអ្វីជាមួយបងប្អូនត្រកូលសូវនោះទេ ហើយមុនពេលកើតហេតុនោះ រូបគេបាន ទៅអង្គុយផឹកកាហ្វេក្នុងហាងមួយនៅជិតផ្សារអគ្គ រួចបានសម្លឹងមើលមុខពួកគេ ទើបធ្វើឱ្យពួកគេព្រួតគ្នា ដេញវាយកាប់ចាក់តែម្ដង គឺជិះម៉ូតូតាមរហូតមកដល់មុខប៉ុសិ៍្ដប៉ូលិស ហើយក៏ត្រូវឃាត់ខ្លួនទាំងអស់គ្នា បែបនេះ ។

លោកវរសេនីយ៍ត្រីអ៊ឹង សុងយូ អធិការប៉ូលិសស្រុកអូរជ្រៅបានឱ្យដឹងថា ចំពោះករណីបង្កជំលោះរបស់ ក្រុមក្មេងពាលទាំងនេះ កំលាំងប៉ូលិសរបស់លោកនឹងមិនអត់អោនឱ្យបានទេ ព្រោះពួកគេបង្កការអុកឡុក នៅតាមទីសាធារណៈធ្វើឱ្យមានការភ័យខ្លាចដល់ប្រជាពលរដ្ឋ ហើយម្យ៉ាងនៅនឹងមុខប៉ុសិ៍្ដប៉ូលិសទៀតផង ដែលពួកគេហាក់ដូចជាគ្មានញញើតសមត្ថកិច្ចបន្ដិចឡើយ ។ ដូច្នេះត្រូវតែកសាងសំណុំរឿងបញ្ជូនទៅ តុលាការឱ្យពួកគេមានការរាងចាល ដើម្បីឈានទៅលុបបំបាត់ក្រុមក្មេងពាល និងបងតូចបងធំតាម បទបញ្ជា និងការណែនាំរបស់លោកស្នងការ។ (អត្ថបទ កោះសន្តិភាព)

Labels: សន្តិសុខ

By Hang Meas
On
At 8:32 AM
Comments :

Featured news

A Casino Night (also called Vegas Nights, Las Vegas Night, Monte Carlo Night) is an entertainment event with a casino theme. Casino Nights can be tied to a fundraiser to raise money for a specific cause (such as cancer research, community services, youth organizations, etc.) by having each participant purchase a ticket for the event. Each participant receives a specific amount of fun money that can be used to purchase gaming chips at the gambling tables. When the participants have lost their chips they may purchase additional fun money, increasing the amount of funds raised for the charity. The participants engage in various casino games (such as blackjack, roulette, baccarat, craps, poker, wheel of fortune, etc.) in the attempt to accumulate the largest amount of gaming chips. At the end of the evening the participant who managed to win the most chips may receive a prize, which is often awarded by a representative of the charity. When a casino night party is just for entertainment it usually works in the same way as a fundraiser casino night except that guests are given the fun money free of charge. Casino Nights function strictly as entertainment events with no real monetary gambling involved.

Cambodia News

គណៈកម្មការពិនិត្យគុណភាពផ្លូវនិងស្ពានតភ្ជាប់ពីជើងឯកទៅខេត្ដកណ្ដាល

បកស្បែកជនស្ទាវ៤នាក់អុកឡុករោងចក្រធ្វើស្បែកជើង

អ្នកបើកឡានប្លន់បេះដូង...នាំប្រពន្ធគេទៅរំលោភ១យប់

សភាបន្ដពិភាក្សាស្ដីពីការឃាត់ខ្លួន-បញ្ជូនខ្លួននិងការស៊ើបអង្កេត

ជនសង្ស័យត្រូវបាញ់ចំកណ្ដាលថ្ងាសស្លាប់មុខបន្ទប់ ប៉ូលិសបន្ដរារាំងអ្នកកាសែត(ការបាញ់ប្រហារនៅតែអាថ៌កំបាំង)

ភ្លៀងធ្លាក់ខ្លាំងដើមរដូវនាំជាតិពុលចូលទន្លេ ឡូត៍នេសាទ៣រងគ្រោះព្រោះត្រីងាប់អស់៥៨តោន

គណបក្សសម រង្ស៊ីបណ្ដេញក្រុមប្រឹក្សាសង្កាត់និរោធ

អ្នកលក់មាសនៅកំពង់ស្ពឺ ចង្អុលមុខចោរប្លន់ពីថ្ងៃមុន

ស្ដ្រីលក់ស្រាបៀរចូលរួមសិក្ខាសាលារិះរកវិធីសាស្ដ្រជួយខ្លួនឯង

កងរាជអាវុធហត្ថក្រុងព្រះសីហនុឃាត់ខ្លួនចោរឆក់អ្នកទេសចរ នៅឆ្នេរអូរឈើទាល

គ្រោងពិភាក្សាសេចក្ដីព្រាងច្បាប់ប្រឆាំងភេរវកម្មខែមិថុនា

ពលរដ្ឋជាង២០០គ្រួសាររំជើបរំជួលជុំវិញការអនុវត្ដន៍ដីការុះរើផ្ទះ

រថយន្ដដឹកដីកៀរប៉ូលិសជិះម៉ូតូដួលបែកក្បាលស្លាប់

ស្រែកយំឡាំប៉ាមុខតុលាការ ខឹងមិនឃុំខ្លួនជនចុងចោទ

ក្រុមក្មេងស្ទាវជិះម៉ូតូដេញកាប់គ្នាមុខប៉ុសិ៍្ដប៉ូលិស

Featured news

Recent Posts

Archives

Blogroll

Searching

Subscribe & Bookmark

Readers's Community