ឈ្នះក្ដីបានដីរួមមកវិញ នាំគ្នាដាំបង្គោលការពារ
ខេត្ដកណ្ដាល ៖ ប្រជាពលរដ្ឋ៤៥គ្រួសារ រស់នៅក្នុងភូមិក្រឡឹងដុំ ឃុំឆក់ឈើនាង ស្រុកអង្គស្នួល ខេត្ដកណ្ដាល បាននាំគ្នាកាប់ឆ្ការព្រៃ និងបោះបង្គោលលើព្រំដីបន្ទាប់ពីតុលាការខេត្ដកណ្ដាល កាត់ក្ដី ប្រគល់ទៅឱ្យពួកគាត់ធ្វើការគ្រប់គ្រងជាដីរួមក្រុមសាមគ្គីវិញ ក្រោយពេលដីខាងលើនោះត្រូវបុគ្គលម្នាក់ ដែលរស់នៅក្នុងភូមិផ្សេងរំលោភយក ហើយបង្កឱ្យមានរឿងក្ដីក្ដាំគ្នាជាច្រើនឆ្នាំកន្លងមកហើយនោះ ។
សកម្មភាពកាប់ឆ្ការព្រៃ និងបោះបង្គោល នៅលើដីទំនាស់ដែលទើបបានឈ្នះក្ដីនោះ បានប្រព្រឹត្ដទៅកាល ពីវេលារសៀលថ្ងៃទី២៥ ខែឧសភា ឆ្នាំ២០០៧ ដោយមានមន្ដ្រីសាលាខេត្ដ មន្ដ្រីតុលាការ មន្ដ្រីសាលា ស្រុកអង្គស្នួល និងសមត្ថកិច្ចចូលរួមដឹងឮផងដែរ។ ប្រជាពលរដ្ឋបានឱ្យដឹងថា ដីរួមក្រុមសាមគ្គី របស់ ពួកគាត់ដែលតុលាការទើបប្រគល់ឱ្យវិញនោះមានទំហំជិត២ហិកតាគឺ ១៩៩៨១,៧៥ម៉ែត្រការ៉េ ជាដីរួម ក្រុមសាមគ្គីរបស់ភូមិក្រឡឹងដុំចាប់តាំងពីឆ្នាំ១៩៧៩មកម្ល៉េះ ប៉ុន្ដែត្រូវបុគ្គលម្នាក់ ដែលរស់នៅក្នុង ភូមិផ្សេងមករំលោភយក។ ដីខាងលើនោះ គឺជាប្រភេទដីទួលមួយចំនួន និងដីស្រែអាចបង្កបង្កើនផល បានមួយចំនួនផងដែរ ហើយបុគ្គលដែលជាអ្នកភូមិផ្សេងទៅរំលោភយកនោះឈ្មោះភួង ភិន និងប្រពន្ធ ឈ្មោះញ៉ឹប យន់ មានទីលំនៅភូមិត្រញំងសុពណ៌ ឃុំឆក់ឈើនាង ដែលមានព្រំប្រទល់ជាប់នឹងភូមិ ក្រឡឹងដុំនោះដែរ ។
ប្រជាពលរដ្ឋបន្ដថា រហូតមកដល់ឆ្នាំ១៩៩៨ បុគ្គលខាងលើបានសុំខ្ចីដីរួមក្រុមសាមគ្គីនោះ ដើម្បីធ្វើជា កន្លែងសំរាប់រម្ងាស់ស្ករត្នោត ហើយពេលនោះក៏បានធ្វើកិច្ចសន្យាខ្ចីយ៉ាងត្រឹមត្រូវផងដែរ ទើបពួកគាត់ សុខចិត្ដឱ្យបុគ្គលនោះខ្ចីប្រើប្រាស់ជាបណ្ដោះអាសន្នសិន។ បន្ទាប់ពីរស់នៅលើដីនោះជាបណ្ដោះអាសន្ន រហូតដល់ឆ្នាំ២០០៤ ប្រជាពលរដ្ឋភូមិក្រឡឹងដុំ បានសុំឱ្យបុគ្គលនោះប្រគល់ដីដើម្បីកាន់កាប់ និងប្រើប្រាស់ វិញ ។ ពេលនោះ ឈ្មោះភួង ភិន បានបដិសេធមិនព្រមប្រគល់ឱ្យទេ ហើយបាននិយាយថា កុំថាឡើយដី ទាំងអស់នោះ សូម្បី១ចំអាមក៏គាត់មិនព្រមឱ្យដែរ ។ បន្ទាប់ពីត្រូវឈ្មោះភួង ភិន រំលោភយកដី ទាំងស្រស់ៗបែបនេះ ប្រជាពលរដ្ឋទាំងអស់មានការក្ដៅក្រហាយគ្រប់ៗគ្នា ហើយក៏បានដាក់ពាក្យប្ដឹង ពីបុគ្គលដែលរំលោភយកដី ហើយកាលនោះអាជ្ញាធរស្រុកអង្គស្នួលក៏បានធ្វើការដោះស្រាយជាបន្ដបន្ទាប់ ដោយធ្វើសម្បទានដីនោះមួយចំនួនឱ្យឈ្មោះភួង ភិន ទៀតផង ប៉ុន្ដែពេលនោះគាត់មិនយល់ព្រមទើប រឿងនេះឡើងដល់តុលាការ ។ ប្រជាពលរដ្ឋបានបន្ដទៀតថា ក្រោយពីពិនិត្យលើភាពជាក់ស្ដែង តុលាការ ខេត្ដកណ្ដាលបានកាត់ក្ដីឱ្យឈ្មោះភួង ភិន ចាញ់ និងប្រគល់ដីខាងលើឱ្យប្រជាពលរដ្ឋក្នុងភូមិក្រឡឹង ដុំគ្រប់គ្រងជាដីរួមក្រុមសាមគ្គីវិញ ។
តាមអំណាចសាលក្រមតុលាការលេខ៩ (រ)ចុះថ្ងៃទី១៧ ខែវិច្ឆិកា ឆ្នាំ២០០៦ ចំពោះការកាត់ក្ដី នៅតុលាការខេត្ដកណ្ដាលនោះ ឈ្មោះភួង ភិន មិនបានទៅចូលរួមស្ដាប់ទេ ប៉ុន្ដែពេលនោះប្រពន្ធ របស់គាត់ឈ្មោះញ៉ឹប យន់ បានសុខចិត្ដយល់ព្រមផ្ដិតមេដៃទទួលស្គាល់ការសំរេចរបស់តុលាការ ។ ប្រជា ពលរដ្ឋបានបន្ដថា ពួកគាត់សូមអរគុណយ៉ាងខ្លាំងចំពោះមន្ដ្រីស្ថាប័នពាក់ព័ន្ធនានា ជាពិសេសតុលាការ ខេត្ដកណ្ដាលដែលបានប្រគល់ដីជូនពួកគាត់ក្នុងភាពយុត្ដិធម៌បែបនេះ ។
គណៈកម្មការចំរុះបានឱ្យដឹងថា ទោះបីជាបែបណាពុំទាន់មានការអនុវត្ដន៍សាលក្រមនៅឡើយទេ ពេលនេះ គ្រាន់តែឱ្យប្រជាពលរដ្ឋនាំគ្នាបោះបង្គោលកំណត់ព្រំដីឱ្យបានច្បាស់លាស់ជាមុនសិនប៉ុណ្ណោះ ឯការអនុវត្ដន៍ សាលក្រមនឹងធ្វើឡើងនៅពេលក្រោយ។
Labels: សន្តិសុខ
