Cambodia News: May 30, 2007

ព្រះសង្ឃតំណាងពុទ្ធបរិស័ទខ្មែរនៅប្រទេសញូវហ្សេឡែន ពេញព្រះទ័យចំពោះការកសាង ពុទ្ធមណ្ឌលកម្ពុជា

ភ្នំពេញៈ តំណាងពុទ្ធបរិស័ទខ្មែរនៅក្រុងអុកខ្លែន ប្រទេសញូវហ្សេឡែន ព្រះតេជគុណ ហ៊ុយ ស៊ីណាត ដែលគង់នៅវត្ដខេមរៈរតនារាម នៅក្រុងអុកខ្លែន ប្រទេសញូវហ្សេឡែន និងលោកជាតំណាងពុទ្ធបរិស័ទ ខ្មែរនៅក្រុងអុកខ្លែន ប្រទេសញូវហ្សេឡែនបានសំដែងនូវទឹកព្រះទ័យយ៉ាងខ្លាំង ចំពោះការកសាងឡើង នៅពុទ្ធមណ្ឌល ដែលស្ថិតក្នុងឃុំដីឥដ្ឋ ស្រុកកៀនស្វាយ ខេត្ដកណ្ដាល ដែលដឹកនាំការសាងសង់ដោយ ព្រះសង្ឃនាម នន្ទ សុទេព និងព្រះសង្ឃនាមស្រី សុវណ្ណ ដែលគង់នៅប្រទេសអូស្ដ្រាលី បន្ទាប់ពី ព្រះអង្គបានអានអត្ថបទមួយរបស់កាសែតកោះសន្ដិភាព ដែលធ្វើការបកស្រាយយ៉ាងល្អិតល្អន់ ដោយព្រះ ភិក្ខុឃួន បូរ៉ា ដែលទទួលខុសត្រូវលើគំរោងសាងសង់នោះ។

ទាក់ទងតាមទូរស័ព្ទពីប្រទេសញូវហ្សេឡែន កាលពីថ្ងៃអង្គារ ព្រះតេជគុណ ហ៊ុយ ស៊ីណាត ដែលមាន ព្រះជន្ម៦០ព្រះវស្សាបានមានសង្ឃដីការថា “អាត្មាក៏ដូចជាពុទ្ធបរិស័ទខ្មែរ នៅញូវហ្សេឡែនទាំងអស់ សូម បញ្ជាក់ថា មានការពេញចិត្ដ ពេញព្រះទ័យ និងពេញចិត្ដចំពោះសេចក្ដីពន្យល់អស់សេចក្ដី និងក្បោះ ក្បាយនោះហើយ ហើយក៏អស់មន្ទិលពីការសំរេចចិត្ដជ្រើសរើសទីតាំងសំរាប់កសាងនោះដែរ“។

ព្រះតេជគុណបានមានដីកាបន្ដថា “សេចក្ដីងឿងឆ្ងល់ និងព្រះទ័យមិនជ្រះថ្លាទាំងប៉ុន្មានរបស់អាត្មា ក៏ដូចជា ពុទ្ធបរិស័ទខ្មែរនៅទីនេះទាំងអស់ លែងមានទៀតហើយ ផ្ទុយទៅវិញបែរជាមានព្រះទ័យ និងទឹកចិត្ដ កាន់តែជ្រះថ្លា ក្នុងការបន្ដជួយរៃអង្គាសប្រាក់ ដើម្បីជួយកសាងពុទ្ធមណ្ឌលកម្ពុជានេះ តទៅទៀត”។

ព្រះអង្គក៏បានថ្លែងអំណរគុណ ចំពោះកាសែតកោះសន្ដិភាព និងសហការី ដែលបានស្រាវជ្រាវព័ត៌មាននេះ ក៏ដូចជាការខិតខំធ្វើការដើម្បីផលប្រយោជន៏ជាតិ និងប្រជាជនពិតប្រាកដ។

ធ្វើដំណើរចម្ងាយប្រមាណ២៧គីឡូម៉ែត្រពីទីក្រុងភ្នំពេញ ដោយធ្វើដំណើរតាមផ្លូវជាតិលេខ១ ទៅដល់ខាង កើតវិទ្យាល័យដីឥដ្ឋ ចម្ងាយប្រមាណមួយគីឡូម៉ែត្រ យើងនឹងឃើញផ្ទាំងប៉ាណូធំមួយសរសេរថា “ពុទ្ធមណ្ឌលកម្ពុជា”។ ពេលទៅដល់ទីនោះយើងត្រូវបត់ស្ដាំចុះពីផ្លូវជាតិលេខ១ ចូលតាមផ្លូវលំក្រាល ក្រួសក្រហមមួយខ្សែទៅខាងស្ដាំដៃនៅទិសខាងត្បូង ហើយធ្វើដំណើរប្រមាណ៤គីឡូម៉ែត្រ នឹងដល់ផ្លូវ បំបែកមួយដែលមានខ្លោងទ្វារដាក់ថា ផ្លូវចូល “ពុទ្ធមណ្ឌលកម្ពុជា”។ យើងបត់ចូលតាមផ្លូវលំក្រាល ក្រួសក្រហមមួយខាងឆ្វេងដៃ ចម្ងាយប្រហែលជាងមួយ ឬពីរគីឡូម៉ែត្រទៀតនោះ យើងនឹងបានឃើញ ផ្ទៃដីដ៏ធំមួយមានទំហំរហូតដល់ទៅ១០៧ហិកតា ហើយមានសង់ជាវិហារឬប្រាសាទ ឬអគារជាច្រើន កន្លែងនោះ ហើយជាពុទ្ធមណ្ឌលកម្ពុជា ដែលក្លាយជាកន្លែងសក្ការៈដ៏ធំមួយសំរាប់ពុទ្ធសាសនិកជន។

Labels: ជំនឿ, វប្បធម៌, សាសនា

By Hang Meas
On Wednesday, May 30, 2007
At 2:34 PM
Comments :

កីឡាករប្រដាល់ ១៦ រូប វ៉ៃដណ្ដើមខ្សែក្រវាត់ស្រាសាច់ដុំ ក្នុងប្រភេទទម្ងន់ ៦០ គីឡូក្រាម និង ៦៣,៥០ គីឡូក្រាមនៅ ស៊ីធីអិន

រាជធានីភ្នំពេញ ៖ បណ្ដាញទូរទស្សន៍កម្ពុជា CTN រួមសហការជាមួយសហព័ន្ធ កីឡាប្រដាល់កម្ពុជា ស្ម្រ័គចិត្ដ និងមានការឧបត្ថម្ភពីក្រុមហ៊ុនស្រាសាច់ដុំពិសេសបានរៀបចំឱ្យមានការប្រកួតប្រដាល់ ក្បាច់ខ្មែរ បុរាណដើម្បីឈានទៅដណ្ដើមខ្សែក្រវាត់ស្រាសាច់ដុំពិសេស២ប្រភេទទម្ងន់បន្ដទៀត គឺទម្ងន់៦០ គីឡូ ក្រាម និង៦៣,៥០គីឡូក្រាម។

មានប្រសាសន៍ក្នុងសន្និសីទសារព័ត៌មាននៅស្ថានីយទូរទស្សន៍ CTN កាលពីព្រឹកថ្ងៃទី ២៦ ឧសភា លោក ឧកញ៉ាអ៊ុំ យូរ៉ាន់ ទីប្រឹក្សាសម្ដេច ជា ស៊ីម និងជាប្រធានសហព័ន្ធកីឡាប្រដាល់កម្ពុជាស្ម័គ្រចិត្ដ បានឱ្យដឹងថា វិស័យកីឡាកំពុងមានការអភិវឌ្ឍន៍ក្រោមការយកចិត្ដទុកដាក់ របស់ប្រមុខរាជរដ្ឋាភិបាល ដូច្នេះប្អូនៗកីឡាករទាំងអស់ត្រូវព្យាយាមហ្វឹកហាត់ឱ្យបានល្អ ដើម្បីឱ្យក្លាយជាអ្នកប្រដាល់ល្បីឈ្មោះ ។ នៅពេលប្អូនៗល្បីឈ្មោះនឹងបានចេញទៅប្រកួតនៅក្រៅប្រទេស ហើយពេលនោះនឹងទទួលបានកំរៃ ច្រើន។ នៅដើមខែមិថុនាខាងមុខនេះកីឡាករប្រដាល់ក្បាច់ខ្មែរបុរាណរបស់យើងចំនួន៣រូបមានអូត ភូថង ក្លឹបកងយោធពលខេមរភូមិន្ទ, ជ័យ កុសល ក្លឹបព្រះខន័រាជ្យរបស់កងរាជអាវុធហត្ថលើផ្ទៃប្រទេស និងនួន សូរិយា ក្លឹបក្រសួងមហាផ្ទៃនឹងត្រូវចេញទៅប្រកួតនៅសហរដ្ឋអាមេរិកដែលដឹកនាំដោយ លោកទ្រឿង សុសសាយ ប្រធានក្លឹបព្រះខ័នរាជ្យ។ នៅចុងខែមិថុនានោះដែរនឹងមានអ្នកប្រដាល់១ក្រុមទៀត ត្រូវចេញ ទៅប្រកួតនៅប្រទេសបារាំងដែលដឹកនាំដោយលោកឧត្ដមសេនីយ៍ តែម ម៉ឺន អនុប្រធានសហព័ន្ធកីឡា ប្រដាល់កម្ពុជាស្ម័គ្រចិត្ដ ។

លោកឧកញ៉ាប្រធានសហព័ន្ធក៏បានរំលឹកដល់កីឡាករប្រដាល់ទាំងអស់ ឱ្យយកចិត្ដទុកដាក់ក្នុងការប្រកួត ដណ្ដើមខ្សែក្រវាត់ស្រាសាច់ដុំពិសេសខាងមុខនេះធ្វើយ៉ាងណាត្រូវប្រកួតឱ្យអស់ពីសមត្ថភាព និងមិនត្រូវ ទទួលសំណូកពីមជ្ឈដ្ឋានខាងក្រៅនោះទេ ។

ចំពោះកីឡាករដែលត្រូវចូលរួមប្រកួតដណ្ដើមខ្សែក្រវាត់នាពេលនេះ គឺប្រភេទទម្ងន់៦០គីឡូក្រាមមាន ១-សឹង ប៊ុនណាត ក្លឹបតាម៉ឺនមានរិទ្ធខេត្ដបាត់ដំបង, ២-ឡៅ ស៊ីណាត ក្លឹបកងពលតូចឆត្រយោង៩១១, ៣-ផៃ ប៊ុនជឿ ក្លឹបក្រសួងមហាផ្ទៃ, ៤-សារឹម វ៉ាន់ថន សមាគមកីឡាកងយោធពលខេមរភូមិន្ទ, ៥-ហ៊ុន សោភ័ណ្ឌ ក្លឹបតាខ្មៅមានរិទ្ធ ខេត្ដកណ្ដាល, ៦-អ៊ឹង បូរិន ក្លឹបព្រះខន័រាជ កងរាជអាវុធហត្ថលើផ្ទៃប្រទេស, ៧-ជ័យ រ៉ាក់ធន់ ក្លឹបឃ្លាំងមឿង និង៨-នួន មុន្នី ក្លឹប កងទ័ពជើងគោក ។

ចំពោះប្រភេទទម្ងន់៦៣,៥០គីឡូក្រាម មាន១-កែវ ប៊ុនហេង ក្លឹបសិង្ហកីឡា, ២-ចាន់ រះ កងទ័ពជើងទឹក, ៣-ខុង បូរី ក្លឹបអេភូថងទន្លេបាសាក់, ៤-ពេជ្រ សម្បត្ដិ សមាគមកីឡាកងយោធពលខេមរភូមិន្ទ, ៥-ពៅ ស័ក្ដិសិទ្ធិ ក្លឹបក្រសួងមហាផ្ទៃ, ៦-វង្ស ស៊ីធាន ក្លឹបកងពលតូចលេខ៧០, ៧-វ៉ន សាវី ក្លឹបឃ្លាំងមឿង និង៨-ផល សុផាត ក្លឹបកង រាជអាវុធហត្ថរាជធានីភ្នំពេញ ។

ចំពោះរូបមន្ដនៃការប្រកួតក្នុងចំណោម៨នាក់ត្រូវចែកជា២ពូល ក្នុង១ពូលមាន៤នាក់ ត្រូវប្រកួតជំរុះយក លេខ១ និងលេខ២ ហើយត្រូវទៅប្រកួតខ្វែងជាមួយលេខ១ និងលេខ២ នៃពូលមួយទៀតនៅក្នុងវគ្គ ពាក់កណ្ដាលផ្ដាច់ព្រ័ត្រ ។ បន្ទាប់មកអ្នកឈ្នះត្រូវជួបជាមួយអ្នកឈ្នះយកលេខ១ ហើយអ្នកចាញ់ត្រូវជួប អ្នកចាញ់យកលេខ៣ ។ ការប្រកួតត្រូវចាប់ផ្ដើមពីថ្ងៃទី៣ មិថុនា ខាងមុខនេះរៀងរាល់រសៀលថ្ងៃ អាទិត្យដែលត្រូវប្រកួត២គូ ក្នុងនោះប្រភេទទម្ងន់៦០គីឡូក្រាម១គូ និង ៦៣,៥០គីឡូក្រាម១គូ។ បើតាម គំរោងត្រូវប្រើរយៈពេលជាង៤ខែ គឺត្រូវបញ្ចប់នៅចុង ខែកញ្ញា ឆ្នាំ២០០៧ ។

ពានរង្វាន់ដែលត្រូវទទួលទាំង២ប្រភេទទម្ងន់គឺចំណាត់ថ្នាក់លេខ១ ម៉ូតូម៉ាក WAVE ALFA ស៊េរីថ្មី ផលិតនៅប្រទេសថៃ១គ្រឿង, ទឹកប្រាក់១,៥លានរៀល, ខ្សែក្រវាត់១ និងពាន១ ។ ចំណាត់ថ្នាក់លេខ២ ទូរទស្សន៍ពណ៌ ២១អីីុញ១គ្រឿង ប្រាក់១លានរៀល និងពាន១ ។ ចំណាត់ថ្នាក់លេខ៣ ទូរទស្សន៍ពណ៌ ១៤អ៊ីញ១គ្រឿង ទឹកប្រាក់៦០ម៉ឺនរៀល និង ពាន១។ ចំណាត់ថ្នាក់លេខ៤ទូរទស្សន៍ពណ៌ ១៤អ៊ីញ១គ្រឿង ទឹកប្រាក់៤០ម៉ឺនរៀល និង ពាន១ ។

Labels: កីឡា

By Hang Meas
On
At 2:33 PM
Comments :

ខឹងយកឈ្មោះកងពលមកប្រើដើម្បីដឹកឈើ...ចាប់ព្រមានម្ដង

ខេត្ដសៀមរាប ៖ រថយន្ដកង់១០ដឹកឈើប្រណីត១គ្រឿង ត្រូវកងកំលាំងកងពលធំអន្ដរាគមន៍លេខ២ ប្រដាប់ដោយអាវុធគ្រប់ដៃចាប់នាំយកទៅរក្សាទុកក្នុងទីបញ្ជាការរបស់ខ្លួន ។ ហេតុការណ៍នេះបានកើត ឡើងកាលពីថ្ងៃទី២៦ ឧសភា ឆ្នាំ២០០៧ នៅភូមិកំព្រំ ឃុំឈុនរៀម ស្រុកបន្ទាយស្រី ខេត្ដសៀមរាប។ ប្រភពព័ត៌មានច្បាស់ការណ៍មួយបានឱ្យដឹងថា រថយន្ដដឹកឈើនោះ ម៉ាកហ៊ីណូ ពណ៌ត្រួយចេក គ្មាន ស្លាកលេខ ។

រថយន្ដនោះដឹកឈើប្រណីតពីស្រុកត្រញំងប្រាសាទ ខេត្ដឧត្ដរមានជ័យ ឆ្លងកាត់ផ្លូវជាតិលេខ៦៧ តែពុំ បានឈប់ឱ្យមន្ដ្រីរដ្ឋបាលព្រៃឈើនៃសង្កាត់នីមួយៗតាមដងផ្លូវត្រួតពិនិត្យទេ។ ពេលទៅដល់ចំណុចកើត ហេតុនោះក៏ត្រូវមេព្រៃសង្កាត់ថ្នាលរង្វាស់ និងផ្នែករដ្ឋបាលព្រៃឈើបន្ទាយស្រីស្ទាក់ចាប់ ក្នុងនោះក៏មាន លោកឧត្ដមសេនីយ៍ត្រី ឈន ឆន មេបញ្ជាការរងកងពលធំអន្ដរាគមន៍លេខ២ ជិះរថយន្ដពីក្រោយផងដែរ។ ខណៈនោះឃើញទាហានម្នាក់ឈ្មោះសៀ រឿន ដែលជាអ្នករត់ការយកលិខិតអនុញ្ញាតច្បាប់មកបង្ហាញ លោកមេព្រៃនិងលោកមេបញ្ជាការរងកងពល ។ ក្រោយពីទទួលបានលិខិតនោះ លោកឧត្ដមសេនីយ៍ ត្រីបានបើករថយន្ដទៅបាត់ លុះមួយសន្ទុះក្រោយមកឃើញកងកំលាំងទាហានប្រដាប់ដោយកាំភ្លើងវែង គ្រប់ដៃមករឹបអូសរថយន្ដដឹកឈើប្រណីតពីសមត្ថកិច្ចមេព្រៃ យកទៅរក្សាទុកនៅទីបញ្ជាការកងពលធំ អន្ដរាគមន៍លេខ២ ។

ទាហានម្នាក់សូមមិនឱ្យបញ្ចេញឈ្មោះ បានឱ្យដឹងថា លោកមេបញ្ជាការរងខឹងខ្លាំងណាស់ ព្រោះមួយរយៈ កន្លងមកមានរថយន្ដដឹកឈើជាច្រើនបានយកឈ្មោះកងពលមកប្រើ សំរាប់ការដឹកឈើល្មើសច្បាប់របស់ពួក គេដែលធ្វើឱ្យមានការប៉ះពាល់ដល់កិត្ដិយសកងពលយ៉ាងខ្លាំង ដូច្នេះត្រូវតែចាប់ដើម្បីបញ្ជាក់ពីភាពស្អាត ស្អំ ។

តាមបុរសឈ្មោះសៀ រឿន ដែលជាអ្នករត់ការឱ្យដឹងថា ឈើប្រណីតនៅក្នុងរថយន្ដ ហ៊ីណូនោះមានចំនួន ៥ម៉ែត្រគូប បានដឹកមកពីស្រុកត្រញំងប្រាសាទ ខេត្ដឧត្ដរមានជ័យ ឆ្ពោះទៅផ្ទះមួយនៅក្នុងសង្កាត់ស្រះចក ខណ្ឌដូនពេញ ក្រុងភ្នំពេញ ។ ឈើនេះជាឈើរបស់លោកពេជ្រ គឹមស្រាង មានចំនួនសរុប២០ម៉ែត្រគូប ត្រូវដឹក៣រថយន្ដ ក្នុងនោះរថយន្ដដែលបានចាប់នេះ ដឹក៥ម៉ែត្រគូប ។ ដោយឡែករថយន្ដ២គ្រឿងទៀតគឺ មួយគ្រឿងដែលទៅមុនបាត់ផ្ទុកឈើ១០ម៉ែត្រគូប និងរថយន្ដចុងក្រោយដឹក៥ម៉ែត្រគូបទៀត ។ អ្នករត់ ការអះអាងថា គេចាប់ទៅណាក៏ចាប់ទៅ ព្រោះឈើមានច្បាប់ ណាមួយឈើលោកធំផង (Sic) ។

ប្រជាពលរដ្ឋឆ្ងល់ថា គេបានច្បាប់ដឹកឈើមកពីណា បានជាដឹកម្ដងៗពី២ទៅ៣រថយន្ដបែបនេះ តើព្រៃ សម្បទានស្រុកខ្មែរនៅមានទៀតឬ? បើនិយាយពីឈើសាលក្រមមិនដឹងជាដាក់ដេញថ្លៃលក់ឡៃឡុង ប៉ុន្មានម៉ឺនម៉ែត្រគូបមកហើយទេ តែឈើសាលក្រមនៅតែមានដដែល។ គេឆ្ងល់ទៀតថាតើអធិការដ្ឋាន រដ្ឋបាលព្រៃឈើខាងជើងបឹងទន្លេសាប ដែលមានលោកវណ្ណ សុផាណ្ណា ជាប្រធាន បានឈើពីណាច្រើន ដល់ថ្នាក់ហ្នឹងមកដាក់ឱ្យដេញថ្លៃម្ដងហើយម្ដងទៀតនោះ។ ទោះបីជាយ៉ាងណា ជុំវិញការចាប់ឈើលើក ក្រោយនេះពុំទាន់មានប្រភពព័ត៌មានណាមួយច្បាស់ការណ៍អះអាងថា លោកឧត្ដមសេនីយ៍ត្រីឈន ឆន មេបញ្ជាការរងកងពលធំអន្ដរាគមន៍លេខ២ ដោះស្រាយយ៉ាងនោះទេ ព្រោះពុំអាចសុំទាក់ទងបាន។

Labels: បរិស្ថាន, សណ្ដាប់ធ្នាប់, សន្តិសុខ

By Hang Meas
On
At 10:22 AM
Comments :

សមាសភាពប្រដាល់នៅ TV5 ជឹម សារ៉ាត់ នៅតែបន្ដវ៉ៃ ជួបជាមួយ យឹម ឌៀប

រាជធានីភ្នំពេញ ៖ ជឹម សារ៉ាត់ អ្នកប្រដាល់នៃក្លឹបក្រសួងមហាផ្ទៃ បានណាត់ជួប យឹម ឌៀប អ្នក ប្រដាល់របស់សមាគមកីឡាកងយោធពលខេមរភូមិន្ទ ដើម្បីប្រកួតគ្នានៅលើសង្វៀនប៉ុស្ដិ៍លេខ៥ នាល្ងាច ថ្ងៃសុក្រ ទី១ ខែមិថុនា ខាងមុខ ។ គូនេះមិនដែលធ្លាប់បានជួបប្រកួតគ្នាពីមុនមកទេ ហើយសំរាប់ការ ជួបគ្នារវាងគេទាំង២ជាលើកទី១នេះ អ្នកមើលភាគច្រើនប្រាកដជាមានជំនឿចិត្ដលើ យឹម ឌៀប ហើយ ពីព្រោះគេឃើញកំពស់របស់សារ៉ាត់ទាបជាងយឹម ឌៀប ឆ្ងាយពេក។ ប៉ុន្ដែទោះបីជាយ៉ាងណា ក៏សារ៉ាត់ មិនងាយចុះចាញ់យឹម ឌៀប ងាយៗនោះដែរ ពីព្រោះរូបគេជាអ្នកប្រដាល់ដែលពូកែស៊ូទ្រាំនឹងការឈឺចាប់ គួបផ្សំនឹងមានកម្លាំងស៊ុហ្វដ៏រឹងមាំថែមទៀត ។ ដូច្នេះមុននឹងចាញ់យឹម ឌៀប នោះប្រហែលជាសារ៉ាត់ អាចទុកស្នាមអនុស្សាវរីយ៍ដ៏ឈឺចាប់ខ្លះឱ្យយឹម ឌៀប ជាមិនខាន ។

ធី ណារិន ក្លឹបបង្ក្រាបគ្រឿងញៀន ត្រូវជួបប្រកួតជាមួយលាភ សំណាង ក្លឹបកងពលតូចលេខ៧០ ។ គូនេះធ្លាប់ជួបគ្នាពីរបីលើករួចមកហើយ គឺមានចាញ់មានឈ្នះដូចគ្នា ។ ប៉ុន្ដែសំរាប់ការជួបប្រកួតគ្នា លើកនេះ ម្នាក់ៗមិនហ៊ានធ្វើការអះអាងថា ខ្លួនជាអ្នកឈ្នះ ឬជាអ្នកចាញ់នោះឡើយ ពីព្រោះថ្វីដៃប្រយុទ្ធ របស់គេទាំង២ប្រហាក់ប្រហែលគ្នា ។ ណារិន មិនត្រឹមតែមានចិត្ដសឿងប៉ុណ្ណោះទេ តែស្នៀតប្រយុទ្ធ របស់គេក៏គ្រាន់បើណាស់ដែរ ហើយការបានជួបប្រកួតជាមួយសំណាងនេះ គេមិនសូវមានការព្រួយបារម្ភ ប៉ុន្មានទេ ដោយសារតែគេធ្លាប់ដឹងពីក្បាច់គុនរបស់សំណាងពីរបីលើករួចមកហើយ ។

ក្រៅពីគូប្រកួតពិសេស២គូនេះ ក៏នៅមានអ្នកប្រដាល់ជើងថ្មីល្អៗជាច្រើនគូឡើង ប្រកួតគ្នាដែរ ដូចជា ឡុង គង្គា ក្លឹបសាលវ័ន្ដ ត្រូវជួបជាមួយពេជ្រ រស្មី សមាគមកីឡាកងយោធពលខេមរភូមិន្ទ ។ ឯសរ សារ៉ាន់ ក្លឹប អេភូថង ទន្លេបាសាក់ ត្រូវជួបប្រកួតជាមួយ គឹម វណ្ណឌី ក្លឹបខេមរកីឡា ។

Labels: កីឡា

By Hang Meas
On
At 10:21 AM
Comments :

ក្រុមព្រះអង្គម្ចាស់ត្រូវបានចោទប្រកាន់ទៅតុលាការក្រុង

រាជធានីភ្នំពេញ ៖ សមត្ថកិច្ចនគរបាលខណ្ឌ៧មករាបានធ្វើការបង្ហាញមុខ និង ទំលាយរឿងរ៉ាវរបស់ ក្រុមព្រះអង្គម្ចាស់ជាប់ចោទពីបទប្រើប្រាស់អាវុធ(ដាវ)ខុសច្បាប់ ដែលពួកគេប្រមូលផ្ដុំគ្នា ហើយត្រូវ បានឃាត់ខ្លួនកាលពីរសៀលថ្ងៃទី២៨ ឧសភា នោះ ។ នៅរសៀលថ្ងៃទី២៩ ឧសភា នគរបាលខណ្ឌ ៧មករាបានបង្ហាញមុខព្រះអង្គម្ចាស់១អង្គ និងរាស្ដ្រសាមញ្ញ៨នាក់ ដែលបានធ្វើការឃាត់ខ្លួននៅផ្ទះជួល មួយកន្លែងក្នុងសង្កាត់បឹងព្រលឹត ។ មនុស្សទាំង៩នាក់នោះ មាន១-ឈ្មោះនរោត្ដម ចារូច្រ័ក ភេទប្រុស អាយុ២២ឆ្នាំ ជាមន្ដ្រីនគរបាលនាយកដ្ឋានអង្គរក្ស ស្នាក់នៅផ្ទះជួលលេខ54Eo ផ្លូវលេខ១១៥ សង្កាត់ បឹងព្រលឹត ខណ្ឌ៧មករា, ៣-ឈ្មោះម៉ម សាវី ភេទប្រុស អាយុ១៨ឆ្នាំ ជាសិស្សថ្នាក់ទី១១C1 វិទ្យាល័យ បឹងកេងកងមានទីលំនៅក្នុងភូមិចំការដូង ខណ្ឌដង្កោ, ៤-ឈ្មោះ វាសនា ដារិន ភេទប្រុស អាយុ១៧ឆ្នាំ ជាសិស្សថ្នាក់ទី១១C2 វិទ្យាល័យទួលទំពូង ស្នាក់នៅផ្ទះលេខ៩៩Eo ផ្លូវលេខ២ សង្កាត់បឹងទំពុន ខណ្ឌមានជ័យ, ៥-ឈ្មោះឈុន ប៊ុនណា ភេទប្រុស អាយុ១៧ឆ្នាំ ជាសិស្សថ្នាក់ទី9B វិទ្យាល័យសំពៅមាស ស្នាក់នៅផ្ទះលេខ១០១Eo វិថីព្រះសុធារស សង្កាត់ទន្លេបាសាក់ ខណ្ឌចំការមន, ៦-ឈ្មោះ អ៊ឹង វិទូ ភេទប្រុស អាយុ១៩ឆ្នាំ មុខរបរមិនពិតប្រាកដ មានទីលំនៅក្នុងភូមិស្លក្រាម ខេត្ដសៀមរាប សព្វថ្ងៃ ស្នាក់នៅផ្ទះសំណាក់លុច្ស អូរឫស្សីបន្ទប់លេខ៣០៣ សង្កាត់បឹងព្រលឹត ៧-ឈ្មោះវាសនា ដារិទ្ធ ភេទប្រុស អាយុ១៧ឆ្នាំ ជាសិស្សថ្នាក់ទី១០Az វិទ្យាល័យទួលទំពូង ស្នាក់នៅផ្ទះលេខ៩៩Eo ផ្លូវលេខ២ សង្កាត់ បឹងទំពុន ខណ្ឌមានជ័យ, ៨-ឈ្មោះជា សុថានិត្យ ភេទប្រុស អាយុ១៦ឆ្នាំ មុខរបរគ្មាន ស្នាក់នៅ ផ្ទះលេខ៩៤Eo ផ្លូវជាតិលេខ៥ សង្កាត់ទួលសង្កែ ខណ្ឌឫស្សីកែវ និង៩-ឈ្មោះសម ស្រីពេជ្រ ភេទស្រី អាយុ១៨ឆ្នាំ មុខរបរគ្មាន ស្នាក់នៅផ្ទះលេខ4E1 ផ្លូវ៣៩៨ សង្កាត់បឹងកេងកងទី១ ខណ្ឌចំការមន ។

ការបង្ហាញមុខយុវជន និងយុវនារីទាំង៩នាក់នោះ ត្រូវបានលោកវរសនីយ៍ត្រីយឹម ស៊ីមុនី អធិការនគរបាល ខណ្ឌ៧មករាឱ្យដឹងថា សមត្ថកិច្ចនឹងកសាងសំណុំរឿងបញ្ជូនខ្លួនពួកគេ រួមទាំងព្រះអង្គម្ចាស់ម្នាក់ផងឡើង តុលាការក្រុងភ្នំពេញ ដោយបានធ្វើការចោទប្រកាន់ពីបទប្រើប្រាស់អាវុធ (ដាវ) ខុសច្បាប់ និងប្រមូល ផ្ដុំក្រុមបងតូចបងធំ ។ លោកអធិការបានបន្ដថា រយៈពេលជាង៣ខែនេះ ដែលមានឈ្មោះព្រះអង្គម្ចាស់ នរោត្ដម ចារូច័ក្រ បានទៅជួលផ្ទះលេខ៥៤Eo និងE1 នៅផ្លូវ១១៥ ក្នុងសង្កាត់បឹងព្រលឹតស្នាក់នៅ ឃើញថា មានក្រុមក្មេងស្ទាវពពាក់ពពូនគ្នាចេញចូលរហេតរហូតគ្មានសណ្ដាប់ធ្នាប់ទេ ។ ពេលស្នាក់នៅ អ្នកជួលបានធ្វើកិច្ចសន្យាជា មួយម្ចាស់ផ្ទះដែលបានរាយការណ៍ឱ្យសមត្ថកិច្ចមូលដ្ឋានដឹង គឺមានតែមនុស្ស ៣នាក់ប៉ុណ្ណោះ តែក្រោយពីជួលហើយមានក្មេងស្ទាវប្រុសស្រីច្រើននាក់ចេញចូលខុសពីកិច្ចសន្យា ។ លោកអធិការមានប្រសាសន៍ ឱ្យដឹងទៀតថា ដោយឃើញសកម្មភាពក្មេងស្ទាវប្រុសស្រីចូលស្នាក់នៅ ពពាក់ពពូនពេលយប់ព្រលប់យ៉ាងដូច្នេះហើយទើបលោកឱ្យនគរបាលមូលដ្ឋានហៅម្ចាស់ផ្ទះ និងអ្នកជួល មកធ្វើការអប់រំណែនាំ ប៉ុន្ដែការណែនាំរបស់សមត្ថកិច្ចមូលដ្ឋានមិនត្រូវបានគេគោរពនោះទេ គឺគេថែមទាំង ផ្គើនមកលើសមត្ថកិច្ចទៀតផង។ ដោយសារទង្វើយ៉ាងដូច្នេះហើយ លោកបានស្នើសុំទៅថ្នាក់លើដែល មានតំណាងព្រះរាជអាជ្ញាអមតុលាការក្រុងភ្នំពេញផងនោះធ្វើការឆែកឆេរដើម្បីរកវត្ថុតាង និងបទល្មើស ហើយជាក់ស្ដែងសមត្ថកិច្ចយើងឃាត់ខ្លួនក្រុមក្មេងស្ទាវបាន៩នាក់ និងដាវដែលជាអាវុធខុសច្បាប់ចំនួន ៥ដើម។ ក្រោយពីមានការឃាត់ខ្លួនតាមចម្លើយរបស់យុវជនម្នាក់ឈ្មោះជា សុថានិត្យ បានសារភាពថា អាវុធទាំងអស់នេះខ្លួនបានទិញពីមនុស្សម្នាក់នៅម្ដុំផ្សារទួលទំពូង ដើម្បីទុកយកទៅប្រើប្រាស់ទប់ទល់ ជាមួយសត្រូវរបស់ខ្លួន ។ ឈ្មោះជា សុថានិត្យ កាលពីប៉ុន្មានខែមុនត្រូវក្រុមក្មេងស្ទាវមួយក្រុម ដែល នគរបាលខណ្ឌដង្កោចាប់ខ្លួនបានចំនួន១២នាក់នោះ ដេញកាប់រូបគេឱ្យមានរបួសដេរជាង៤០ថ្នេរ ។ បន្ទាប់ពី ស្នាមរបួសត្រូវបានជាសះស្បើយឈ្មោះជា សុថានិត្យ បានដាក់ពាក្យប្ដឹងដល់ក្រុមជនបង្កនោះទៅក្រសួង មហាផ្ទៃដើម្បីឱ្យជួយរកចាប់ខ្លួនជនដៃដល់ ។ ជាមួយនឹងការប្ដឹងឱ្យសមត្ថកិច្ច ស្វែងរកចាប់ខ្លួនជន ដៃដល់នោះ ឈ្មោះជា សុថានិត្យ បានប្រមែប្រមូលបក្សពួក និងទិញដាវបំរុងទៅប្រយុទ្ធជាមួយក្រុមម្ខាង នោះវិញ ។ ក៏ប៉ុន្ដែសកម្មភាព និងគំរោងការដែលគេបំរុងប្រព្រឹត្ដនោះ ត្រូវបានសមត្ថកិច្ចនគរបាល ខណ្ឌ៧មករាទប់ស្កាត់ទាន់ កុំអីឈាមត្រូវហូរជោកដី ។

ជាមួយនឹងការបកស្រាយពីសំណាក់លោកអធិការយឹម ស៊ីមុនី ត្រូវបានព្រះអង្គម្ចាស់នរោត្ដម ចារូច្រ័ក ប្រាប់ឱ្យដឹងថា គេបានជួលផ្ទះខាងលើនេះ ស្នាក់នៅជាង៣ខែពិតមែន ដោយក្នុង១ខែតម្លៃ១៨០ដុល្លារ។ រឿងពួកស្ទាវ និងដាវសាមូរ៉ៃរូបព្រះអង្គម្ចាស់មិនបានពាក់ព័ន្ធទេ ព្រោះពួកនោះគេមិនដឹងថាមកពីណាផង ពេលគេកំពុងដេកនៅខាងលើស្រាប់តែមាននគរបាលចូលមកចាប់ខ្លួន ។
គួរបញ្ជាក់ថា ក្នុងពិធីបង្ហាញមុខក្រុមព្រះអង្គម្ចាស់ជាប់ចោទនោះនគរបាលខណ្ឌ៧មករា បានដាក់ខ្នោះដៃ ប្រតែងគ្នាទាំងអស់ មិនគិតថា ព្រះអង្គម្ចាស់ ឬក្មេងស្ទាវធម្មតានោះឡើយ ពីព្រោះថា នោះជាការងារការ ពារសន្ដិសុខរបស់សមត្ថកិច្ច ។

Labels: សណ្ដាប់ធ្នាប់, សន្តិសុខ

By Hang Meas
On
At 10:20 AM
Comments :

ជនស្ទាវអ្នកលេងដាវសាមូរ៉ៃ៣នាក់ប៉េអឹមចាប់កោរត្រងោល

ក្រុងព្រះសីហនុ ៖ ក្រុមយុវជនអ្នកលេងដាវសាមូរ៉ៃចំនួន៣នាក់ ត្រូវបានកងរាជអាវុធហត្ថខណ្ឌមិត្ដភាព ធ្វើការឃាត់ខ្លួនយកមកកោរត្រងោលអប់រំព្រមានកុំឱ្យតាំងខ្លួនជាជនពាល ប៉ះពាល់ដល់សណ្ដាប់ធ្នាប់ សាធារណៈសង្គមជាតិ ក្រោយពីក្រុមជនអន្ធពាលទាំងនេះធ្វើសកម្មភាពដេញកាប់ចាក់គេឯងរួចមក ។ ការ ឃាត់ខ្លួននេះបានធ្វើឡើងកាលពីយប់ថ្ងៃទី២៧ ឧសភា វេលាម៉ោង២២និង៣៥នាទីយប់ នៅត្រង់ចំណុច ផ្ទះជួលមួយកន្លែងក្នុងតំបន់រោងចក្រយូស៊ីនស្ថិតនៅក្រុមទី៧ ភូមិ១ សង្កាត់លេខ១ ខណ្ឌមិត្ដភាព ក្រុងព្រះសីហនុ ។

លោកអនុសេនីយ៍ឯក ហ៊ត សីហា មេបញ្ជាការកងរាជអាវុធហត្ថខណ្ឌមិត្ដភាពបានឱ្យដឹងថា ជនអន្ធពាល ទាំង៣នាក់នេះ មាន ១-ឈ្មោះមុត ភាស់ អាយុ២១ឆ្នាំ គ្មានមុខរបរពិតប្រាកដ មានស្រុកកំណើតនៅ ស្រុកឈូក ខេត្ដកំពត ។ ២-ឈ្មោះសែន ផានិត អាយុ១៨ឆ្នាំ គ្មានមុខរបរពិតប្រាកដ មានស្រុក កំណើតនៅស្រុកត្រាំកក់ ខេត្ដតាកែវ និង៣-ឈ្មោះឆេង ឌឿន អាយុ២៨ ឆ្នាំ គ្មានមុខរបរពិតប្រាកដ មានស្រុកកំណើត នៅស្រុកអង្គរជ័យ ខេត្ដកំពត បច្ចុប្បន្នអ្នកទាំង៣ស្នាក់នៅផ្ទះជួលខាងលើ ។ លោក អនុសេនីយ៍ឯកហ៊ត សីហា បានបន្ដថា នៅមុនពេលកើតហេតុ ជនទាំង៣នាក់នេះនាំគ្នាអង្គុយផឹកស្រា ថ្នាំនៅមុខផ្ទះជួលដែលពួកគេស្នាក់នៅតាំងពីរសៀល ថ្ងៃទី ២៧ ឧសភា ។ លុះដល់ម៉ោង២២យប់ ខណៈ ពេលកំពុងផឹកស៊ីស្រាប់តែឃើញជនរងគ្រោះម្នាក់ឈ្មោះ សៀង វណ្ណៈ ភេទប្រុស អាយុ២១ឆ្នាំ ជាជាង សំណង់ មានស្រុកកំណើតនៅស្រុកឈូក ខេត្ដកំពត ទើបត្រឡប់មកពីធ្វើការដើរកាត់មុខពួកគេ “ជនអន្ធពាល”។ ពេលនោះឈ្មោះ មុត ភាស់ ក៏ស្ទុះទៅវាយទាត់ធាក់លើជនរងគ្រោះយ៉ាងចាស់ដៃ មិនតែ ប៉ុណ្ណោះក្រុមនេះបានរត់ចូលទៅក្នុងបន្ទប់ផ្ទះជួលរបស់ខ្លួន រួចទាញយកដាវសាមូរ៉ៃបំរុងកាប់ចាក់ទៅលើ ជនរងគ្រោះ ប៉ុន្ដែពេលនោះជនរងគ្រោះក៏រត់គេចទៅសម្ងំលាក់ខ្លួនក្នុងបន្ទប់ផ្ទះជួល ហើយមួយសន្ទុះ ក្រោយមកជនអន្ធពាលទាំង៣នាក់ក៏ត្រូវសមត្ថកិច្ចកងរាជអាវុធហត្ថចុះទៅឃាត់ខ្លួន យកមកទីបញ្ជាការ ដើម្បីអប់រំកុំឱ្យធ្វើខ្លួនជាជនអន្ធពាលទៀត។

Labels: សណ្ដាប់ធ្នាប់, សន្តិសុខ

By Hang Meas
On
At 10:18 AM
Comments :

លទ្ធផលការប្រកួតកីឡាប្រណាំងរទេះសំរាប់ជនពិការឆ្នាំ ២០០៧

រាជធានីភ្នំពេញ ៖ កាលពីថ្ងៃសៅរ៍ ទី២៦ ឧសភា កន្លងមកថ្មីៗនេះ អង្គការសម្ព័ន្ធកីឡាបាល់ទះ ជនពិការជាតិកម្ពុជាបានរៀបចំធ្វើកម្មវិធីប្រណាំងរទេះសំរាប់ជនពិការឆ្នាំ២០០៧ នៅឯសួនច្បារសម្ដេច ហ៊ុន សែន ក្រោមអធិបតីភាពលោកសែម សុខា អនុរដ្ឋលេខាធិការក្រសួងសង្គមកិច្ច អតីតយុទ្ធជន និងយុវនីតិសម្បទា ។ តំណាងសម្ព័ន្ធកីឡាបាល់ទះជនពិការជាតិកម្ពុជាបានមានប្រសាសន៍ឱ្យដឹងថា ការ ប្រកួតលើកនេះមានកីឡាករ៣០នាក់មកពីក្រុមចំនួន៥ចូលរួមប្រកួត ក្នុងនោះមានក្រុមភ្នំពេញ, ក្រុម AAR1, ក្រុម AAR2, ក្រុមកំពង់ស្ពឺ និងក្រុមកំពង់ឆ្នាំង ។ វិញ្ញាសាដែលត្រូវដាក់ឱ្យប្រកួតមាន២ គឺទី១-សម្រាប់បុរស-នារីប្រណាំង១ជុំមានចម្ងាយ៥០០ម៉ែត្រ និងទី២-សម្រាប់បុរស-នារីមាន១០ជុំ ចម្ងាយ ៥.០០០ម៉ែត្រ ។

ការប្រកួតនៅថ្ងៃនោះទោះបីជាមានភ្លៀងធ្លាក់ក៏ដោយ ក៏កីឡាករ-កីឡាការិនី នៅតែធ្វើការប្រកួតយ៉ាង ស្វិតស្វាញដដែល។ ចំពោះលទ្ធផលបច្ចេកទេស លើវិញ្ញាសាចំងាយ៥០០ម៉ែត្រសំរាប់នារី ចំណាត់ថ្នាក់ លេខ១ បានទៅលើកីឡាការិនីទូច ណារី, លេខ២ កីឡាការិនី ថុន សុខុន និងលេខ៣ កីឡាការិនីលុន ង៉ែត។

ចំណែកលទ្ធផលប្រណាំងចំងាយ៥០០ម៉ែត្រ ផ្នែកបុរសវិញ លេខ១កីឡាករកន កាន, លេខ២ កីឡាករ សឿង វណ្ណា និងលេខ ៣ កីឡាករ យឹម សុផល ។ ឯលទ្ធផលចំណាត់ថ្នាក់ចំងាយ៥.០០០ម៉ែត្រផ្នែកបុរស លេខ១ បានទៅលើកីឡាករ សឿង វណ្ណា, លេខ២ កីឡាករជឹម សុផាន់ណា និងលេខ៣ កីឡាករ យឹម សុផល ។ ផ្នែកនារីលេខ១ កីឡាការិនី ទូច ណារី, លេខ២ កីឡាការិនី លុន ង៉ែត និងលេខ៣ កីឡាការិនី ថុន ។

Labels: កីឡា

By Hang Meas
On
At 10:18 AM
Comments :

អាជ្ញាធរសំរេចផ្អាកការអនុវត្ដន៍សាលក្រមរុះរើផ្ទះ ខណៈអ្នកតវ៉ាត្រៀមកំលាំងទប់ទល់នៅប៉ោយប៉ែត

ខេត្ដបន្ទាយមានជ័យ ៖ អាជ្ញាធរដែលមានគំរោងធ្វើការរុះរើលំនៅឋានប្រជាពលរដ្ឋ ចំនួន២០០គ្រួសារ ដែលរស់នៅលើដីសមាគមអភិវឌ្ឍកសិកម្មជាតិ ចំណុចដើមចាមរីបានសំរេចចិត្ដផ្អាកតាមសំណើ របស់ លោកមេឃុំប៉ោយប៉ែតបន្ទាប់ពីមានប្រតិកម្មឆោឡោ តវ៉ាពីសំណាក់ប្រជាពលរដ្ឋជំទាស់ទៅនឹងការរុះរើផ្ទះ សំបែងរបស់ពួកគាត់រហូតដល់ព្រមានថា សុខចិត្ដស្លាប់ និងមិនចាកចេញពីដីនេះឡើយ ។

នៅព្រឹកថ្ងៃទី២៩ ឧសភា ដែលជាថ្ងៃមានការជូនដំណឹងពីការអនុវត្ដន៍សាលក្រមនោះ ប្រជាពលរដ្ឋប្រមាណ ២០០គ្រួសាររស់នៅលើដីសមាគមអភិវឌ្ឍកសិកម្មជាតិក្នុងភូមិប៉ាលិលេយ្យ ឃុំប៉ោយប៉ែត ស្រុកអូរជ្រៅ ខេត្ដបន្ទាយមានជ័យ បាននាំគ្នាបះបោរដុតកង់រថយន្ដត្រៀមចាំប្រឆាំងនឹងការអនុវត្ដន៍សាលក្រម របស់ តុលាការ ឱ្យរុះរើផ្ទះរបស់ពួកគាត់ ។

តាមការរៀបរាប់ពីប្រជាពលរដ្ឋរស់នៅលើដីនោះបានឱ្យដឹងថា ពួកគាត់ស៊ូស្លាប់មិនព្រមឱ្យនរណាមករុះរើ ផ្ទះសំបែងរបស់ពួកគាត់ចេញឡើយ ។ ចំពោះដីនេះ គឺពួកគាត់បានមករស់នៅរយៈពេលជាង១ឆ្នាំមក ហើយៗពួកគាត់មិនបានមកចាប់ដីនេះរស់នៅជារបៀបអនាធិបតេយ្យឡើយ គឺពួកគាត់បានទទួលពីមនុស្ស ចំនួន៤ទៅ៥នាក់ដែលសម្បទានឱ្យពួកគាត់ត្រឹមត្រូវ ហើយកន្លងមក គឺខាងគណៈកម្មាធិការចុះមកត្រួត ពិនិត្យម្ដងរួចមកហើយដែលដឹកនាំឱ្យលោក សុខ សារ៉េត អភិបាលរងខេត្ដបន្ទាយមានជ័យបានសំរេច ឱ្យពួកគាត់រស់នៅលើដីនេះ ហើយដីនៅចំណុចដើមចាមរីនេះ គឺពួកគាត់បានរស់នៅដោយមានលិខិត កាន់កាប់អាជ្ញាធរឃុំទទួលស្គាល់ទៀតផង ។

ក្រុមប្រជាពលរដ្ឋដែលរស់នៅលើដីនេះ ក្នុង១គ្រួសារមានទំហំ៥គុណ២០ម៉ែត្រ និង ខ្លះទៀត បាន១០ គុណ ២០ម៉ែត្រតែប៉ុណ្ណោះ ហើយនៅថ្ងៃទី២៩ ឧសភា នេះ មានការសំរេចអនុវត្ដសាលក្រម របស់តុលាការ ឱ្យរុះរើផ្ទះសំបែងរបស់ពួកគាត់ចេញពីលើដីនេះទៅវិញ ដូច្នេះពួកគាត់បានធ្វើការតស៊ូត្រៀមប្រឆាំង មិន ឱ្យមកអនុវត្ដសាលក្រមរបស់តុលាការរុះរើផ្ទះរបស់ពួកគាត់ឡើយ ។

នៅព្រឹកថៃទី២៩ ឧសភា នោះដែរ ក្រោយពីមានពលរដ្ឋប្រមាណ២០០គ្រួសារ បាននាំគ្នាបះបោរដុត កង់ឡានត្រៀមប្រឆាំងនឹងការអនុវត្ដន៍សាលក្រមឱ្យចុះរើផ្ទះពួកគេនោះ មិនឃើញមានកម្លាំងសមត្ថកិច្ច និងអាជ្ញាធរមូលដ្ឋានទៅអនុវត្ដសាលក្រមនៅលើចំណុចដីទំនាស់នោះឡើយ ។ លោកសាន ស៊ានហូ មេឃុំប៉ោយប៉ែត ដែលទើបជាប់ឆ្នោតថ្មីនោះបានឱ្យកោះសន្ដិភាពដឹងថា ចំពោះការអនុវត្ដន៍សាលក្រម នៅថ្ងៃនេះ គឺមិនអាចអនុវត្ដទៅបាននោះទេ ដោយលោកបានស្នើសុំទៅថ្នាក់លើឱ្យផ្អាកសិន រួចហើយនឹង រកដំណោះស្រាយណាមួយឱ្យបានប្រសើរជាងនេះ និងឱ្យបានសមស្របជាមួយពលរដ្ឋទាំងអស់ ។ លោក សាន ស៊ានហូ មេឃុំប៉ោយប៉ែតបានបន្ដថា នៅព្រឹកថ្ងៃទី២៩ ឧសភាដដែល ខាងគណៈកម្មាធិការបានចុះ មកដោះស្រាយគ្នានៅទីស្នាក់ការប៉ូលិសការពារព្រំដែនគោកលេខ៩១១ ដែលមានទីតាំងជិតនោះ ហើយ និងហៅខាងភាគីប្រជាពលរដ្ឋទាំងអស់នោះឱ្យចូលរួមដោះស្រាយគ្នា ។

ប្រជាពលរដ្ឋប្រមាណ២០០គ្រួសារ ដែលកំពុងតែប្រឆាំងតវ៉ាចំពោះការអនុវត្ដន៍សាលក្រម ឱ្យរុះរើផ្ទះនោះ បានសុំឱ្យថ្នាក់ដឹកនាំ ស្រុក និងខេត្ដ ព្រមទាំងនាយករដ្ឋមន្ដ្រីហ៊ុន សែន មេត្ដាជួយរកដំណោះស្រាយ ណាមួយសំរាប់ពួកគាត់ផង ពីព្រោះពួកគាត់គ្មានដីសំរាប់រស់នៅក្រៅពីដីនេះឡើយ ។

ជុំវិញបញ្ហាទាំងអស់នេះ កោះសន្ដិភាពមិនទាន់ទទួលព័ត៌មានដែលគណៈកម្មាធិការចុះមកដោះស្រាយ ជាមួយពលរដ្ឋបំភ្លឺបែបណានោះទេ... តែឮប្រភពមួយពីពលរដ្ឋបានឱ្យដឹងថា នៅពេលដែលខាងគណៈ កម្មាធិការ ចុះមកដោះស្រាយនៅកន្លែងស្នាក់ការប៉ូលិសការពារព្រំដែន៩១១នោះ គេបានកោះហៅពលរដ្ឋ ១០នាក់ឱ្យចូលរួមស្ដាប់ តែប្រជាពលរដ្ឋភ័យខ្លាចមានការចាប់ឃុំខ្លួន ។

មុននេះកាលពីថ្ងៃទី២៥ ឧសភា ប្រជាពលរដ្ឋប្រមាណ២០០គ្រួសារដែលរស់នៅលើដីសមាគមអភិវឌ្ឍ កសិកម្មជាតិចំណុចដើមចាមរី បានលើកគ្នាទៅសាលាឃុំ ដើម្បីតវ៉ាសុំឱ្យអាជ្ញាធរឃុំជួយធ្វើការ ដោះស្រាយរួចមកហើយដែលកាលណោះលោកសាន ស៊ានហូ បានណែនាំឱ្យប្រជាពលរដ្ឋទាំងអស់វិល ត្រឡប់ទៅកាន់លំនៅឋានវិញ ហើយនៅវេលាម៉ោង១០ព្រឹកថ្ងៃដដែលនោះ លោកមេឃុំប៉ោយប៉ែត បានដឹកនាំកំលាំងរួមមានសមត្ថកិច្ចប៉ូលិសប៉ុស្ដិ៍រដ្ឋបាលឃុំ និងសមត្ថកិច្ចប៉ូលិសការពារព្រំដែនគោកវរៈ ៩១១ ចុះទៅចំណុចដីសមាគមកសិកម្មជាតិ ហើយបានប្រមូលប្រជាពលរដ្ឋទាំងអស់មកជុំគ្នា ។ លោក បាននិយាយនៅចំពោះមុខប្រជាពលរដ្ឋថា ចំពោះដីកាដែលតម្រូវឱ្យរុះរើផ្ទះសម្បែងនៅថ្ងៃទី២៩ ឧសភា នោះ គឺពិតជាមានមែន ប៉ុន្ដែលោកបានសុំឱ្យផ្អាកការអនុវត្ដសិន។ ដោយឡែកលោកសុំឱ្យប្រជាពលរដ្ឋ ជួយសហការជាមួយអាជ្ញាធរមូលដ្ឋានស្រង់ស្ថិតិឱ្យបានច្បាស់លាស់ រួចលោកនឹងស្នើសុំទៅថ្នាក់លើឱ្យជួយ ទាក់ទិននឹងបញ្ហានេះ ។

លោកមេឃុំបន្ដថា ពលរដ្ឋទាំងអស់ត្រូវបញ្ជាក់ឱ្យច្បាស់ថា តើដីដែលកំពុងរស់នៅនេះ បានមកពីទិញ ឬជាដីសម្បទានមកពីខាងណា ។ លោកក៏បានស្ដីបន្ទោសដល់មនុស្ស៤ទៅ៥នាក់ថា ជាមេខ្យល់ និងសូមឱ្យ ច្បាប់ផ្ដន្ទាទោស ។

Labels: សណ្ដាប់ធ្នាប់

By Hang Meas
On
At 10:17 AM
Comments :

ច្រកសំរាប់នរោត្ដម រណឫទ្ធិលោកយូ ហុកគ្រី ជំរុញឱ្យសម្ដេចក្រុមព្រះទទួលស្គាល់ទោស១៨ខែសិន

រាជធានីភ្នំពេញ ៖ លោកយូ ហុកគ្រី ដែលទើបបង្ហាញមុខនៅក្នុងពិធីប្រកាសតែងតាំងជាអគ្គលេខាធិការ បស់គណបក្ស នរោត្ដម រណឫទ្ធិ កាលពីថ្ងៃទី២៩ ខែឧសភា បានថ្លែងថា “ការលើកលែងទោសទាល់តែ ទទួលទោសជាមុនសិន ហើយរឿងនេះមិនទាន់ចប់ឧទ្ធរណ៍នៅឡើយទេ ព្រោះវាត្រូវមានសាលក្រមមួយ ជាស្ថាពរទទួលស្គាល់ទោស ឬមិនទទួលស្គាល់ទោស ហើយសាលក្រមនោះគេអាចយកទៅធ្វើជាសំអាង”។ លោកថ្លែងទៀតថា គណបក្សនរោត្ដម រណឫទ្ធិ នឹងបន្ដប្ដឹងទៅឧទ្ធរណ៍ទៀត ដើម្បីបញ្ចប់រឿង តែលោក មិនបញ្ជាក់ពីនីតិវិធីនោះនៅឡើយទេ ។ លោកយូ ហុកគ្រី បានថ្លែងបែបនេះ នៅក្នុងពិធីមួយ ដែលលោកត្រូវបានសម្ដេចក្រុមព្រះតែងតាំងជាអគ្គលេខាធិការរបស់គណបក្សនរោត្ដម រណឫទ្ធិ នៅឯ ខុទ្ទកាល័យគណបក្ស ស្ថិតក្នុងខណ្ឌចំការមន រាជធានីភ្នំពេញ ។

សម្ដេចក្រុមព្រះនរោត្ដម រណឫទ្ធិ ដែលកំពុងស្នាក់នៅឯបរទេស បានសំរេចតែងតាំង លោកយូ ហុកគ្រី ជាអគ្គលេខាធិការ ជាសមាជិកគណៈកម្មាធិការនាយក និងជាសមាជិកក្រុមប្រឹក្សាភិបាលនៃគណបក្ស នរោត្ដម រណឫទ្ធិ តាមរយៈលិខិតចុះថ្ងៃទី២៧ ឧសភា ឆ្នាំ ២០០៧ ។ ជាមួយគ្នានេះដែរ សម្ដេចក្រុមព្រះ ក៏បានសំរេចតែងតាំងលោកឈឹម សៀកឡេង ជាអនុប្រធាននៃគណបក្ស នរោត្ដម រណឫទ្ធិផងដែរ។ ទោះបី ជាយ៉ាងណាក៏ដោយ មន្ដ្រីគណបក្សនរោត្ដម រណឫទ្ធិ បានឱ្យដឹងទៀតថា រហូតមកដល់ពេលនេះ គណបក្សនេះមានអគ្គលេខាធិការមួយរូប និងអគ្គលេខាធិការរង៤រូប ឯអនុប្រធានពីររូប ។

លោកយូ ហុកគ្រី បានឱ្យដឹងទៀតថា មានការស្នើសុំពីប្រជាពលរដ្ឋធ្វើញត្ដិទូលថ្វាយព្រះមហាក្សត្រ រួចហើយ តែនៅមិនទាន់មានចំលើយពីសម្ដេចនាយករដ្ឋមន្ដ្រីនៅឡើយទេ ។ លោកបន្ដថា “យើងនឹង ចាំមើលតទៅទៀតសិនថា តើការវិវត្ដន៍វាទៅដល់ណា ហើយយើងនឹងត្រៀមដំណើរសមស្របមួយ ទៀត”។ លោកបន្ដថា រឿងនេះវាមិនចប់នៅឡើយទេ ព្រោះនៅមានបណ្ដឹងឧទ្ធរណ៍ទៀត។ គេនៅចាំ បានថា កាលពីថ្ងៃទី១២ ឧសភា គណៈកម្មការមួយក្រុមរបស់គណបក្សនរោត្ដម រណឫទ្ធិ បានចូលគាល់ ព្រះមហាក្សត្រសម្ដេចព្រះបរមនាថ នរោត្ដម សីហមុនី ក្នុងការស្វែងរកការលើកលែងទោស ពីព្រះមហាក្សត្រថ្វាយដល់សម្ដេចក្រុមព្រះ ។

សម្ដេចក្រុមព្រះ បានសំរេចតែងតាំង លោកឈឹម សៀកឡេង ជាអនុប្រធានគណបក្សនរោត្ដម រណឫទ្ធិ តាមរយៈលិខិតចុះ ថ្ងៃទី២៤ ឧសភា ឆ្នាំ២០០៧។ លោកឈឹម សៀកឡេង បានថ្លែងថា សម្ដេចក្រុមព្រះ បានតែងតាំងរូបលោកជាអនុប្រធានគណបក្ស នរោត្ដម រណឫទ្ធិ ក្នុងគោលបំណងកែលំអរចនាសម្ព័ន្ធដឹកនាំ ការគ្រប់គ្រងគណបក្ស នរោត្ដម រណឫទ្ធិ ដែលទើបតែប្រសូតថ្មី ឱ្យកាន់តែមានភាពរឹងមាំជាបណ្ដើរៗ ដើម្បី ឈានឆ្ពោះទៅចូលរួមប្រកួតប្រជែងក្នុងការបោះឆ្នោតសាកលឆ្នាំ២០០៨នាពេលខាងមុខ ។

លោកឈឹម សៀកឡេង បន្ដថា “ការប្រមូលសមាជិក សមាជិកា ដែលមានភក្ដីភាព និងគាំទ្រចំពោះ សម្ដេចក្រុមព្រះ មានការលំបាកណាស់ ព្រោះមានការប្រទាញប្រទង់ពីពួកបក្សប្រហារ ។ មុនការបោះឆ្នោត ជ្រើសរើសក្រុមប្រឹក្សាឃុំ-សង្កាត់ ក៏មានស្ថានភាពស្មុគស្មាញដោយសារការរារាំងមិនឱ្យសម្ដេចក្រុមព្រះ យាងចូលមាតុភូមិវិញដែរ ដែលធ្វើឱ្យអគ្គលេខាធិការដ្ឋាន និងខុទ្ទកាល័យមានភារកិច្ចមមាញឹកក្នុងការតវ៉ា ទាមទាររកយុត្ដិធម៌ថ្វាយព្រះអង្គ” ។

លោកយូ ហុកគ្រី បានថ្លែងទៀតថា ចំពោះមុខតំណែងរបស់សម្ដេចមហិស្សរា នរោត្ដម ច័ក្រពង្ស់ នៅតែ ជាអនុប្រធានទី១ នៃគណបក្សដដែល ហើយមិនទាន់មានការផ្លាស់ប្ដូរទេ ។ លោកបន្ដថា លោកនឹងរៀបចំ រចនាសម្ព័ន្ធផ្ទៃក្នុងគណបក្សឱ្យបានច្បាស់លាស់ថា តើអ្នកណាត្រូវធ្វើអ្វីខ្លះ ហើយត្រូវជ្រើសរើសអ្នកដែល មានសមត្ថភាពត្រឹមត្រូវដឹកនាំនៅក្នុងការិយាល័យនីមួយៗ ។ បើយើងមានតែរចនាសម្ព័ន្ធ មានតែតួនាទី និងភារកិច្ច ប្រសិនបើយើងគ្មានមនុស្សដែលមានសមត្ថភាពសមស្រប ក៏យើងមិនអាចដំណើរការទៅ បានល្អដែរ។ លោកអះអាងថា “ខ្ញុំថាការងារនេះវាលំបាក តែខ្ញុំត្រូវតែខិតខំពុះពារ ដើម្បីឱ្យអគ្គលេខា ធិការដ្ឋាននេះដើរទៅមុខស្រួល...” ។

លោកយូ ហុកគ្រី បានរំលឹកអំពីអតីតកាលដែលរូបលោកត្រូវបានដកតំណែងពីអនុ ប្រធានទី២ ដែលតួនាទី នេះមិនអាចដកបានទេ តែគេបានរកគ្រប់វិធីដកលោកហើយ ពេលនោះក្រោយសមាជ អគ្គលេខាធិការ ញឹក ប៊ុនឆៃ សួរលោកថា គាំទ្រសមាជថ្ងៃទី១៨ តុលា ឆ្នាំ២០០៦ ឬអត់? បើមិនគាំទ្រដកតំណែង អនុប្រធានទី២។ លោកបន្ដថា “...នៅស្នាក់ការហ្វ៊ុនស៊ិនប៉ិចនោះ អគ្គលេខាធិការហ្វ៊ុនស៊ិនប៉ិចថា ត្រូវដក ចេញហើយ។ ខ្ញុំបានលាឈប់ពីអនុប្រធាន ហើយខ្ញុំមិនចង់អង្គុយនៅកន្លែងដែលគ្មានកិត្ដិយសនោះទេ”។

លោកនូវ សុវត្ថិរ៉ូ អ្នកនាំពាក្យគណបក្សហ្វ៊ុនស៊ិនប៉ិច បានមានប្រសាសន៍ថា លោកយូ ហុកគ្រី ត្រូវ បានគណបក្សហ្វ៊ុនស៊ិនប៉ិចសំរេចបណ្ដេញចេញកាលពីថ្ងៃទី១១ ឧសភា កន្លងទៅរួចមកហើយ ។ លោក បន្ដថា “លោកយូ ហុកគ្រី មិនក្លាហានចេញមុខប្រកាសដូចនេះ ក្រោយពេលសមាជថ្ងៃទី១៨ តុលា ឆ្នាំ២០០៦ ហើយលោកទើបតែមកប្រកាសនៅពេលលោកបានទទួលតំណែងជាអគ្គលេខាធិការ របស់ គណបក្ស នរោត្ដម រណឫទ្ធិ នៅពេលនេះ ដែលវាហាក់ដូចជាអណ្ដើកក្នុងស្នូកអ៊ីចឹងដែរ...” ។ លោកបានបន្ដ ទៀតថា ក្រៅពីលោកយូ ហុកគ្រី គណបក្សហ្វ៊ុនស៊ិនប៉ិចមិនមានគំរោងបណ្ដេញសមាជិកណាផ្សេងទៀតទេ បើទោះបីជាយើងបានដឹងថា មានអ្នកមួយចំនួនជាមុខសញ្ញាក្ដី តែយើងទុកឱ្យពួកគាត់កែប្រែខ្លួន ។

សម្ដេចក្រុមព្រះបានមានបន្ទូលតាមរយៈលិខិតចុះថ្ងៃទី២២ ឧសភា ថា “ខ្ញុំមិនដែលបានទទួលស្គាល់ លទ្ធផល នៃការផ្លាស់ប្ដូររចនាសម្ព័ន្ធចាត់តាំងដឹកនាំគណបក្សហ្វ៊ុនស៊ិនប៉ិច ដែលកើតចេញពីព្រឹត្ដិការណ៍ ថ្ងៃទី១៨ តុលា ឆ្នាំ២០០៦ ដែលបានរំលោភលើលក្ខន្ដិកៈ និងបទបញ្ជាផ្ទៃក្នុងគណបក្សហ្វ៊ុនស៊ិនប៉ិច នោះទេ ”។ ព្រះអង្គបន្ដថា លោកកែវ ពុទ្ធរស្មី បានថ្លែងថា សម្ដេចក្រុមព្រះនៅតែជាអគ្គមគ្គុទេសក៍ ប្រវត្ដិសាស្ដ្រនៃគណបក្សហ្វ៊ុនស៊ិនប៉ិច ដែលគ្មាននរណាអាចដកហូតបានឡើយ ។ ព្រះអង្គបានឱ្យដឹងទៀត ថា ដើម្បីចៀសវាងការខូចខាតដែលព្រះអង្គនឹងអាចទទួលពីការបំភាន់មតិសាធារណៈ ដូច្នេះគណបក្ស ហ្វ៊ុនស៊ិនប៉ិចត្រូវរៀបចំសមាជយ៉ាងយូរ៣០ថ្ងៃ ដើម្បីដកការតែងតាំងព្រះអង្គជាមគ្គុទេសក៍ប្រវត្ដិសាស្ដ្រ របស់គណបក្សហ្វ៊ុនស៊ិនប៉ិច ហើយបើសិនមិនអនុវត្ដតាមការស្នើសុំទេ ព្រះអង្គនឹងស្នើឱ្យមានវិធានការ ផ្លូវច្បាប់ ។

លោកមុត ចន្ថា អ្នកនាំពាក្យគណបក្ស នរោត្ដម រណឫទ្ធិ បានមានប្រសាសន៍ថា តាមរយៈមេធាវីរបស់ គណបក្សបានដាក់ពាក្យបណ្ដឹងឧទ្ធរណ៍រួចរាល់ហើយ ចំពោះករណីសម្ដេចក្រុមព្រះ បន្ទាប់ពីតុលាការ ក្រុងភ្នំពេញបានកាត់ទោសព្រះអង្គឱ្យជាប់ពន្ធនាគារ១៨ខែ និងសងជំងឺចិត្ដ១៥ម៉ឺនដុល្លារ ទៅគណបក្ស ហ្វ៊ុនស៊ិនប៉ិច កាលពីថ្ងៃ ទី១៣ មីនា ឆ្នាំ២០០៧ ដោយកំបាំងមុខព្រះអង្គ ។

Labels: នយោបាយ

By Hang Meas
On
At 10:13 AM
Comments :

ស្រុកទេសកើតចោរហារយ លក់ដីបានជាង៧ពាន់ដុល្លារ៣ថ្ងៃក្រោយចោរបិទមុខចូលប្លន់

ខេត្ដពោធិ៍សាត់ ៖ បុរសម្នាក់ដែលទើបតែលក់ដីបានលុយ៧.១០០ដុល្លារថ្មីៗ ត្រូវក្រុមចោរបិទមុខចូល ប្លន់យកអស់គ្មានសល់ មិនតែប៉ុណ្ណោះត្រូវក្រុមចោរវាយនឹងស្វាយកាំភ្លើងចេញក្អួតស្ទើររស់ស្ទើរស្លាប់ និង បែកក្បាលហូរឈាមរហូតសន្លប់ ។ បុរសរងគ្រោះត្រូវក្រុមគ្រួសារដឹកទៅកាន់មន្ទីរពេទ្យទាំងយប់។ ហេតុការណ៍នេះបានកើតឡើងនៅផ្ទះជនរងគ្រោះជាប់ផ្លូវជាតិលេខ៥ ស្ថិតក្នុងភូមិតាកែវ ឃុំបឹងកន្ដួត ស្រុកក្រគរ កាលពីវេលាម៉ោង១រំលងអធ្រាត្រឈានចូលថ្ងៃទី២៩ ឧសភា ២០០៧ ។

លោកមាស ម៉ុល មន្ដ្រីប៉ូលិសព្រហ្មទណ្ឌខេត្ដឱ្យដឹងថា បុរសរងគ្រោះឈ្មោះ ម៉ី ហុន អាយុ៤៥ឆ្នាំ និង ប្រពន្ធឈ្មោះចាន់ សាវ៉ាត អាយុ៤៥ឆ្នាំ ។ ជនរងគ្រោះត្រូវក្រុមចោរវាយនឹងស្វាយកាំភ្លើង កាប់នឹង ដាវសាមូរ៉ៃបណ្ដាលឱ្យរបួសក្បាល មុខ និងដៃជាច្រើនកន្លែង ពេលនេះកំពុងសំរាកព្យាបាលនៅមន្ទីរពេទ្យ ខេត្ដពោធិ៍សាត់ ។

បើតាមអ្នកស្រីចាន់ សាវ៉ាត ជាភរិយា ប្រាប់កោះសន្ដិភាពឱ្យដឹងថា កាលពីថ្ងៃទី២៥ ឧសភា គ្រួសាររបស់ គាត់បានលក់ដីស្រែមួយ ក្បែរផ្ទះទំហំមួយហិកតាក្នុងតំលៃ៧១០០ដុល្លារ ទៅឱ្យឈ្មោះម៉ៅ វ៉ាត ភេទប្រុស នៅភូមិពាលញែក១ ឃុំផ្ទះព្រៃ ។ ដីនេះជាចំណែករបស់កូនពាក់កណ្ដាល ហើយការលក់នេះ ដើម្បីយកលុយមកចែកគ្នាធ្វើដើមទុនរកស៊ី ។ លុយលក់ដីនេះបានដកទិញម៉ូតូ C125 ស៊េរី២០០៤ មួយគ្រឿង នៅសល់៦១០០ដុល្លារទៀតមិនទាន់បានចែកគ្នាផង ក៏ត្រូវចោរប្លន់យកអស់តែម្ដង ។

អ្នកស្រីឱ្យដឹងទៀតថា នៅយប់នោះរូបគាត់ កូនប្រសា និងកូនៗដេកលើផ្ទះ ឯប្ដីគាត់ដេកនៅក្រោមផ្ទះ ម្នាក់ឯង។ នៅម៉ោង១រំលងអធ្រាត្រស្រាប់តែក្រុមចោរមានគ្នា៤នាក់រុំមុខជិតប្រដាប់ដោយកាំភ្លើងវែង មួយដើម និងខ្លីពីរដើមចូលមកប្លន់។ ខណៈនោះជន២នាក់ចាប់ប្ដីរបស់គាត់វាយនឹងស្វាយកាំភ្លើង កាប់ នឹងដាវសាមូរ៉ៃរហូតសន្លប់ក្នុងថ្លុកឈាម ។ ឯពីរនាក់ទៀតបានធាក់ទ្វារឡើងទៅលើផ្ទះ ដោយយក កាំភ្លើីងខ្លីភ្ជង់ និងចុចពិលដាក់មុខគាត់ និងកូនៗគំរាមមិនឱ្យស្រែក ។ ពួកគេសួររកលុយលក់ដីនៅឯណា ហើយបញ្ជាឱ្យយកមកឱ្យពួកគេទាំងអស់ទើបរួចខ្លួន ។ គាត់ និងកូនៗប្រាប់ថា លុយគេមិនទាន់ឱ្យទេ តែពួកចោរគំហកថា “កុំកុហកលុយគេឱ្យអស់ហើយ” ។ ទន្ទឹមនោះពួកគេដើរឆែកឆេររកឃើញលុយ ដាក់ក្នុងការុងកប់ក្បែរក្រង់ស្រូវចំនួន៦.១០០ដុល្លារ និងលុយលក់ក្របីចំនួន៣០០.០០០រៀលទៀត គឺយក ទាំងអស់តែម្ដង ។

ប្រភពដដែលបន្ដថា ពេលពួកចោរចេញពីផ្ទះគាត់បានប្រហែល៤០ម៉ែត្របានបាញ់ចំនួន២គ្រាប់ ធ្វើឱ្យផ្អើល ដល់ប៉ូលិសប៉ុស្ដិ៍ មេឃុំ មេភូមិ និងប្រជាពលរដ្ឋដែលនៅក្នុងភូមិនោះ ។ ក្រុមចោរសុទ្ធតែបិទមុខមាឌធំៗ ដុះក្បាលពោះ និងសំបុរ.សមើលទៅមិនសមជាអ្នកក្រីក្រទេ។ ពេលប្លន់រួចពួកគេដើរចេញទៅដោយ ពុំជិះម៉ូតូ ឬរថយន្ដទេ ។

សមត្ថកិច្ចបានរុករកក្រុមចោរទាំងយប់ដែរ ប៉ុន្ដែរហូតមកដល់ពេលនេះនៅមិនទាន់មានពន្លឺទេ ។ ទោះបី ជាបែបណាសកម្មភាពចោរបានទុកដានរួចទៅហើយ គឺបិទមុខមិនឱ្យស្គាល់ មានន័យថា ចោរនោះជាអ្នក ដឹងថា អ្នករងគ្រោះមានលុយលក់ដី តើនរណាដឹងខ្លះ?

Labels: សន្តិសុខ

By Hang Meas
On
At 10:12 AM
Comments :

ក្មេងអន្ធពាល៣នាក់ជំរិតទារលុយពីសិស្ស១១នាក់បាន២,៥០០រៀល

ខេត្ដកំពង់ចាម ៖ ក្រោមបញ្ជារបស់ លោកឯម កុសល អធិការប៉ូលិសស្រុកមេមត់ កម្លាំងប៉ុស្ដិ៍រដ្ឋបាល ឃុំមេមត់បានចេញប្រតិបត្ដិការបង្ក្រាបក្មេងអន្ធពាល១ក្រុមមានគ្នា៣នាក់ ដែលសំឡុតជំរិតទារប្រាក់ពី សិស្សវិទ្យាល័យប៊ុន រ៉ានី ហ៊ុន សែន មេមត់ចំនួន២.៥០០រៀល រួចនាំមកកាន់អធិការដ្ឋានស្រុក ដើម្បី សួរនាំកាលពីល្ងាចថ្ងៃទី២៧ ឧសភា ។ មន្ដ្រីប៉ូលិសស្រុកមេមត់បានឱ្យដឹងថា ជនអន្ធពាលទាំង៣នាក់ នោះរួមមាន១-ឈ្មោះ ឈឿន វុទ្ធី ភេទប្រុស អាយុ១៩ឆ្នាំ នៅភូមិមេមត់កណ្ដាល ឃុំមេមត់ (ជាមុខសញ្ញាទើបដោះលែងចេញពីពន្ធនាគារ) ២-ឈ្មោះ លាភ ឡាយ ភេទប្រុស អាយុ១៩ឆ្នាំ នៅភូមិ មេមត់ផ្សារ ឃុំមេមត់ និង៣-ឈ្មោះអាង អ៊ិត ភេទប្រុស អាយុ២២ឆ្នាំ ស្នាក់នៅបណ្ដោះអាសន្ន ក្នុងឃុំមេមត់ ។

ប្រភពដដែលបន្ដថា កាលពីវេលាម៉ោង៥និង៣០នាទីល្ងាច ថ្ងៃទី២៧ ឧសភា ២០០៧ នៅក្នុងបរិវេណ វិទ្យាល័យប៊ុន រ៉ានី ហ៊ុន សែន មេមត់ មានសិស្ស១ក្រុមមានគ្នាចំនួន១១នាក់ កំពុងនាំគ្នាលេងបាល់បោះ។ ខណៈនោះស្រាប់តែមានក្មេងអន្ធពាល១ក្រុមជិះម៉ូតូ២គ្រឿង មានគ្នា៤នាក់ មកសំឡុតគំរាមជំរិតទារប្រាក់ បានចំនួន២.៥០០រៀល បន្ទាប់មកក៏នាំគ្នាបំរុងគេចទៅក្រៅវិញ។ យ៉ាងណាក៏ដោយ ពេលនោះមានសិស្ស ខ្លះបានទៅប្ដឹងប៉ូលិសប៉ុស្ដិ៍ទាន់ពេល ទើបឈានទៅធ្វើការឃាត់ខ្លួនបាន៣នាក់ ដូចមានរាយឈ្មោះខាងលើ ឯម្នាក់ទៀតឈ្មោះប៉េង ក្រួច ភេទប្រុស ជាអ្នកប្រមូលលុយពីសិស្សបានរត់គេចខ្លួនបាត់ ។

ជនឈ្មោះឈឿន វុទ្ធី បានឆ្លើយសារភាពថា នៅវេលាម៉ោង៥ល្ងាច ថ្ងៃទី២៧ ឧសភា រូបគេនិង ឈ្មោះឡាយ ព្រមទាំងបក្សពួក២នាក់ទៀត បាននាំគ្នាផឹកស្រានៅផ្ទះឈ្មោះមុំ ភេទស្រី នៅភូមិមេមត់ផ្សារ ឃុំមេមត់ ។ បន្ទាប់មកពេលនាំគ្នាទៅវិទ្យាល័យប៊ុន រ៉ានី ហ៊ុន សែន មេមត់ឃើញឈ្មោះឆៃ ហ៊ាន ក៏សុំ លុយ៥០០រៀល ខណៈនោះឈ្មោះក្រួចស្រែកថា “មិនបាច់សុំទេ យកតែម្ដងទៅ” ។ ពេលនោះឈ្មោះហ៊ាន ក៏ឈប់លេងបាល់ព្រោះភ័យខ្លាចគេវាយ និងឱ្យលុយចំនួន៥០០រៀល ទៅឈ្មោះក្រួច ចំណែករូបគេ បានឌុបឈ្មោះ អ៊ិត ចេញពីក្នុងបរិវេណវិទ្យាល័យ ឯចំពោះរឿងអ្វីផ្សេងទៀតពុំបានដឹងទេ ។

នៅក្នុងពាក្យបណ្ដឹងរបស់យុវសិស្ស ឈ្មោះពេញ សុវិទ្យា អាយុ១៦ឆ្នាំ បញ្ជាក់ថា នៅល្ងាចថ្ងៃទី២៧ ឧសភា ខណៈពេលរូបគេនិងមិត្ដភក្ដិ១០នាក់ទៀត នាំគ្នាលេងបាល់បោះ ស្រាប់តែមានមនុស្ស៤នាក់ ជិះម៉ូតូ២គ្រឿង ចូលមកអុកឡុកក្នុងតារាងបាល់ ហើយស្រែកសំឡុតតំរូវឱ្យលុយម្នាក់ៗ៥០០ បើមិន បានទេនោះនឹងវាយ។ ពេលនោះដោយខ្លួនភ័យពេកក៏ឱ្យអស់១.០០០រៀល ឯឈ្មោះឯម វឌ្ឍនា ឱ្យ ៥០០រៀល និង២នាក់ទៀតក៏ឱ្យដែរ សរុបចំនួន២.៥០០រៀល បន្ទាប់មកឈ្មោះប៉េង ក្រួច ដែលជាមេខ្លោង ប្រមូលលុយបានគេចខ្លួនបាត់ ។

មន្ដ្រីប៉ូលិសបានបន្ថែមថា ជនទាំង៣នាក់ត្រូវបានបញ្ជូនមកស្នងការដ្ឋានខេត្ដដើម្បីចាត់ការបន្ដតាមច្បាប់។

Labels: សណ្ដាប់ធ្នាប់, សន្តិសុខ

By Hang Meas
On
At 10:11 AM
Comments :

កម្ពុជាបានចុះកិច្ចព្រមព្រៀងអាកាសចរណ៍ជាមួយប្រទេសចំនួន២៨

រាជធានីភ្នំពេញ ៖ លោកឧបនាយករដ្ឋមន្ដ្រីសុខ អាន បានមានប្រសាសន៍ថា នៅដើមខែមិថុនា ខាងមុខនេះ រាជរដ្ឋាភិបាលកម្ពុជានឹងរៀបចំកិច្ចប្រជុំពេញអង្គមួយនៅក្នុងតុលាការ ពិសេសកាត់ទោសអតីតមេដឹកនាំ ខ្មែរក្រហម ដើម្បីពិភាក្សានិងបោះឆ្នោតបង្កើតបទបញ្ជាផ្ទៃក្នុងរបស់តុលាការវិសាមញ្ញនេះ ហើយលោក សង្ឃឹមថា នៅពេលនោះនឹងមានការឯកភាពគ្នាក្នុងការរៀបចំបទបញ្ជាផ្ទៃក្នុងឱ្យចេញជាស្ថាពរ ។

លោកឧបនាយករដ្ឋមន្ដ្រីសុខ អាន បានមានប្រសាសន៍បែបនេះប្រាប់លោក Katsu-hiro SHINOHARA ឯកអគ្គរាជទូតជប៉ុន ប្រចាំកម្ពុជា ក្នុងជំនួបពិភាក្សាកាលពីថ្ងៃទី ២៨ ឧសភា នៅទីស្ដីការគណៈរដ្ឋមន្ដ្រី។ លោកបានបន្ដថា យោងតាមស្មារតី នៃកិច្ចព្រមព្រៀងរវាងអង្គការសហប្រជាជាតិ និងកម្ពុជានោះ បាននិយាយថា ជនជាប់ចោទទាំងអស់មានសិទ្ធិជ្រើសរើសមេធាវីបានតាមតែគេពេញចិត្ដ ។ ដូច្នេះហើយ ទើបពេលនេះកម្ពុជាបានខិតខំធ្វើយ៉ាងណាឱ្យមានការឯកភាពគ្នារវាងមេធាវីបរទេស និងគណៈមេធាវី នៃ ព្រះរាជាណាចក្រកម្ពុជា ដើម្បីអាចទទួលយកបាននូវការបង់កំរៃមួយដែលសមរម្យ ។

លោកសុខ អាន បានជំរាបជូនលោកឯកអគ្គរាជទូតជប៉ុនថា យោងតាមតំរូវការរបស់អង្គការពាណិជ្ជកម្ម ពិភពលោក បានតំរូវឱ្យកម្ពុជាបង្កើតឱ្យមានតុលាការពាណិជ្ជកម្មមួយដែលបច្ចុប្បន្ន កម្ពុជាកំពុងរៀបចំ ដូចជាច្បាប់ពាណិជ្ជកម្មសភាបានអនុម័តរួចហើយ រួមមានទាំងក្រមរដ្ឋប្បវេណីផងដែរ ។ ដូច្នេះនៅសល់ តែការសំរបសំរួលរវាងក្រុមប្រឹក្សា កំណែទំរង់ច្បាប់ និងប្រព័ន្ធតុលាការ និង ក្រសួងយុត្ដិធម៌ទៀតទេ ដើម្បីធ្វើយ៉ាងណា ឱ្យច្បាប់ស្ដីពីការបង្កើតតុលាការពាណិជ្ជកម្មនេះមានភាពរលូនស៊ីសង្វាក់គ្នាទៅនឹងច្បាប់ ពាណិជ្ជកម្ម ហើយនិងច្បាប់រដ្ឋប្បវេណី ។
លោកឧបនាយករដ្ឋមន្ដ្រីសុខ អាន បានស្នើសុំឱ្យលោកឯកអគ្គរាជទូតជួយជំរុញអ្នកវិនិយោគជប៉ុនឱ្យមក វិនិយោគនៅកម្ពុជាឱ្យបានច្រើន ពីព្រោះបន្ដិចទៀតកម្ពុជានឹងមានភាពរឹងមាំក្នុងការរៀបចំច្បាប់ ពាណិជ្ជកម្មហើយ។ ក្រៅពីនេះលោកសុខ អាន បានសុំឱ្យជប៉ុនជួយជំរុញឱ្យបានឆាប់ក្នុងការចាប់ផ្ដើម សាងសង់ស្ពានអ្នកលឿងតាមតែអាចធ្វើទៅបាន។ ចំណែកឯលោកឯកអគ្គរាជទូតជប៉ុនវិញ បានតបថា រាជរដ្ឋាភិបាលជប៉ុនត្រូវការពេលវេលាច្រើនណាស់ក្នុងការសាងសង់ស្ពានអ្នកលឿងនេះ ពីព្រោះស្ពាននេះ វែង គឺមានប្រវែងជាង២ពាន់ម៉ែត្រឯណោះ និងចំណាយទឹកប្រាក់រហូតដល់ជាង៧០លានដុល្លារ ។

លោកសុខ អាន បានជំរាបជូនលោកឯកអគ្គរាជទូតបន្ដថា កន្លងមកចំនួនអ្នកទេសចរជប៉ុននៅកម្ពុជា ទទួលបានចំណាត់ថ្នាក់លេខមួយ តែបច្ចុប្បន្នចំណាត់ថ្នាក់នេះបានធ្លាក់ចុះទៅហើយ ដូច្នេះលោកបានស្នើ សុំឱ្យជប៉ុនធ្វើការពិចារណារៀបចំកិច្ចព្រមព្រៀងមួយថ្មី ដើម្បីទំនាក់ទំនងខាងអាកាសចរណ៍ជាមួយ កម្ពុជា។ បច្ចុប្បន្នកិច្ចព្រមព្រៀងនេះ ភាគីទាំងពីរបានរៀបចំដូចគ្នារួចរាល់អស់ ហើយប៉ុន្ដែមិនទាន់មាន ការពិនិត្យរួមគ្នានៅឡើយ ។

លោកសុខ អាន បានបញ្ជាក់ថា កិច្ចព្រមព្រៀងទ្វេភាគីស្ដីអំពីបញ្ហាអាកាសចរណ៍នេះ កម្ពុជាបានចុះ កិច្ចព្រមព្រៀងជាមួយប្រទេសចំនួន២៨រួចហើយ ហើយកម្ពុជាក៏ចង់បានកិច្ចព្រមព្រៀងបែបនេះជាមួយ ប្រទេសជប៉ុនដែរ ព្រោះជាមហាអំណាចសេដ្ឋកិច្ចដ៏ធំនៅអាស៊ី ។

Labels: សេដ្ឋកិច្ច

By Hang Meas
On
At 10:11 AM
Comments :

ប៉ូលិសចរាចរណ៍ត្រួតពិនិត្យមធ្យោបាយធ្វើដំណើរមិនស្របច្បាប់

ក្រុងព្រះសីហនុ ៖ ប៉ូលិសចរាចរណ៍ក្រុងព្រះសីហនុ ដឹកនាំដោយលោកវរសេនីយ៍ត្រី ព្រហ្ម ពៅ ប្រធាន ការិយាល័យចរាចរណ៍ផ្លូវគោក នៃស្នងការដ្ឋានក្រុងបានដាក់កម្លាំងនៅតាមផ្លូវសាធារណៈ ក្នុងទីប្រជុំជន ក្រុង ដើម្បីត្រួតពិនិត្យរកមើលបទល្មើសនៅលើយានយន្ដគ្រប់ប្រភេទ ទាំងរថយន្ដ និងម៉ូតូ ដែលការត្រួត ពិនិត្យនេះចាប់ផ្ដើមនៅថ្ងៃទី២៨ ខែឧសភា ។

មន្ដ្រីប៉ូលិសចរាចរណ៍ដែលធ្វើការនេះឱ្យដឹងថា ការត្រួតពិនិត្យគឺផ្ដោតរកមើលបទល្មើសផ្សេងៗមាន ដូចជា ការបំពាក់ស្លាកលេខពុំត្រឹមត្រូវ យានយន្ដគ្មានស្លាកលេខ យានយន្ដពាក់ស្លាកលេខ ន.ប ខុសគោលការណ៍ ព្រមទាំងហាមឃាត់រថយន្ដដឹកកុងតឺន័រធំៗចូលក្រុង ដែលផ្ទុយនឹងសេចក្ដីជូនដំណឹងរបស់សាលាក្រុង ព្រះសីហនុ ។

មន្ដ្រីប៉ូលិសចរាចរណ៍រូបនោះឱ្យដឹងទៀតថា សមត្ថកិច្ចក៏ចាត់វិធានការផងដែរចំពោះជនបរទេសដែលជួល យានយន្ដបើកបរដោយខ្លួនឯងបង្កភាពអនាធិបតេយ្យក្នុងក្រុង។ មហាជននៅក្រុងព្រះសីហនុបានអបអរ សាទរចំពោះការហាមឃាត់ជនបរទេសមិនឱ្យបើកម៉ូតូ ឬយានយន្ដផ្សេងទៀតដោយខ្លួនឯងនៅក្នុងក្រុង ព្រោះថាកន្លងមកមានជនបរទេសមួយចំនួនជិះម៉ូតូរោទ៍ម៉ាស៊ីន រំខានការរស់នៅរបស់ប្រជាពលរដ្ឋ ទាំង ពេលយប់ និងពេលថ្ងៃ ។ ចំពោះអ្នកខ្លះទៀតបើកបរលឿនបង្កឱ្យមានគ្រោះថ្នាក់ចរាចរណ៍ជាញឹកញាប់។

Labels: ចរាចរណ៍, សណ្ដាប់ធ្នាប់, សន្តិសុខ

By Hang Meas
On
At 10:10 AM
Comments :

កូរ៉ូណាធ្លាក់ភ្នែកបើកបុកគល់អំពិលទឹកក្រឡាប់បះជើងសង្កត់រោងទឹកអំពៅ

ខេត្ដកំពង់ចាម ៖ រថយន្ដម៉ាកកូរ៉ូណា ពណ៌ត្រាវ១គ្រឿង ពាក់ស្លាកលេខ ក ៦២៩៨ ភព២ ស៊េរី៨៥ បានបោះពួយយ៉ាងលឿនលើកំណាត់ផ្លូវលំក្នុងភូមិដូនម៉ៅលើ ឃុំទន្លេបិទ ស្រុកត្បូងឃ្មុំ និងបានបុកគល់ អំពិលទឹកបណ្ដាលឱ្យបះជើងទ្រមេឃ និងសង្កត់លើរោងលក់ទឹកអំពៅ ។ ប្រភពពីនារីឈ្មោះឌី សុខភី អាយុ១៧ឆ្នាំ រស់នៅភូមិដូនម៉ៅលើ បានប្រាប់ថា នៅវេលាម៉ោង១២និង៣០នាទី ថ្ងៃត្រង់ ថ្ងៃទី២៧ ឧសភា ២០០៧ ខណៈពេលនាងកំពុងតែអង្គុយនៅក្នុងរោងលក់ទឹកអំពៅ ស្រាប់តែមានរថយន្ដ កូរ៉ូណា១គ្រឿង បោះពួយយ៉ាងលឿនចេញមកពីទិសខាងជើង ។

នារីរូបនេះបន្ដថា ខណៈពេលស្ថិតនៅចម្ងាយពីរោងលក់ទឹកអំពៅប្រហែល២០ម៉ែត្រ រថយន្ដនេះក៏បានរេ ចង្កូតមកបុករបងផ្ទះរបស់ប្រជាពលរដ្ឋ ហើយជ្រុលមកបុកគល់ដើមអំពិលទឹកទៀត ជាហេតុបណ្ដាលឱ្យ រថយន្ដក្រឡាប់និងផ្លោងមកធ្លាក់សង្កត់លើរោង។ នៅក្នុងឧប្បត្ដិហេតុនេះនាងបានរត់ចេញពីក្នុងរោង មកក្រៅ និងមិនមានគ្រោះថ្នាក់អ្វីទេ ប៉ុន្ដែភ័យណាស់ ព្រលឹងនៅចុងសក់ ។ បន្ដិចក្រោយមក នាងឃើញបុរសអ្នកបើកបររថយន្ដឈ្មោះឃី រស់នៅភូមិព្រែកជីក ឃុំទន្លេបិទដែរ វារចេញពីក្នុងរថយន្ដ តាមទ្វារតែមិនឃើញរបួសអ្វីទេ ។

លោកនាយប៉ុស្ដិ៍រដ្ឋបាលឃុំទន្លេបិទមានប្រសាសន៍ថា បុរសអ្នកបើកបររថយន្ដបានផឹកស្រាស្រវឹងធ្លាក់ភ្នែក ហើយបើកចេញពីផ្សារទន្លេបិទឆ្ពោះទៅផ្ទះរបស់ខ្លួននៅភូមិព្រែកជីក ប៉ុន្ដែដោយពុំអាចគ្រប់គ្រងស្មារតី បានទើបរេចង្កូតទៅបុករបងផ្ទះ និងរោងលក់ទឹកអំពៅ ។ នេះចាត់ទុកជាសំណាងមួយដែលពុំមាន ប្រជាពលរដ្ឋនៅភូមិដូនម៉ៅលើរងគ្រោះ។

ស្ដ្រីឈ្មោះប្រាក់ សុខុម អាយុ៤១ឆ្នាំ ជាម្ចាស់រោងប្រាប់ថា មុនកើតហេតុគាត់អង្គុយនៅក្នុងរោងនោះ មើលកូនស្រីលក់ទឹកអំពៅ បន្ទាប់មកស្រាប់តែមានរថយន្ដនេះរេចង្កូតមកបុករបងផ្ទះ ។ ពេលនោះ គាត់ហាក់បីដូចជាភ្លឹកស្មារតីរកក្រោកគេចចេញពុំទាន់ ទាល់តែរថយន្ដផ្លោងបះជើងសង្កត់លើរោង ទើប ស្ទុះចេញទៅក្រៅ ឯចំពោះសម្ភារៈខូចខាតមានធុងទឹកអំពៅ គ្រឿងកំប៉ុង និងរបស់មួយចំនួនទៀត ហើយគាត់បានដាក់ពាក្យប្ដឹងចូលប៉ូលិសប៉ុស្ដិ៍ទាមទារសំណងចំនួន២០០ដុល្លារ ។ លោកនាយប៉ុស្ដិ៍ បានបន្ថែមថា ក្រោយពីកើតហេតុគ្រោះថ្នាក់នេះបុរសអ្នកបើកបរឈ្មោះមាស សុខឃី អាយុ៣២ឆ្នាំ បានគេចបាត់មិនឃើញចូលខ្លួនមកដោះស្រាយទេ ឯស្ដ្រីម្ចាស់រោងនិយាយថា បើប្ដឹងទារ២០០ដុល្លារមិន បាន ហើយបានត្រឹមតែ១០០ដុល្លារក៏សុខចិត្ដទទួលយកដែរ គ្រាន់បើជាងអត់។

Labels: សន្តិសុខ

By Hang Meas
On
At 10:09 AM
Comments :

ការបង្កើតបណ្ដាញទូរស័ព្ទសង្គ្រោះកុមារឥតគិតថ្លៃដំបូងនៅកម្ពុជា

រាជធានីភ្នំពេញ ៖ យោងតាមសេចក្ដីប្រកាសព័ត៌មានរបស់អង្គការទស្សនៈពិភពលោកថ្ងៃទី៣១ ឧសភា បានឱ្យដឹងថា សព្វថ្ងៃនេះ មានបញ្ហាលំបាកជាច្រើនដែលកុមារកម្ពុជាកំពុងតែប្រឈមមុខ ។ ជាញឹកញាប់ យើងតែងតែដោះស្រាយបញ្ហាដែលយើងអាចមើលឃើញក្នុងចំណោមកុមារដែលក្រីក្របំផុត និងកុមារ ដែលងាយរងគ្រោះ។ ទោះជាយ៉ាងនេះក៏ដោយ ក៏នៅមានកុមារក្នុងក្រុមផ្សេងជាច្រើននាក់ទៀតកំពុង ប្រឈមមុខនឹងសេចក្ដីអន្ដរាយ និងគ្រោះថ្នាក់ពីបញ្ហាដែលយើងមើលមិនឃើញផងដែរ។

យើងមានបំណងផ្ដល់អំណាចដល់កុមារគ្រប់ៗរូបក្នុងសង្គមស៊ីវិល ដើម្បីឱ្យពួកគេមានលទ្ធភាពទទួលការ ជួយសង្គ្រោះតាមរយៈបណ្ដាញទូរស័ព្ទសង្គ្រោះកុមារ តែយើងនឹងអាចសំរេចគោលបំណងនេះបាន លុះត្រា តែមានកិច្ចសហការយ៉ាងជិតស្និទ្ធ ក្នុងចំណោមជនដែលមានលំដាប់ខ្ពស់ និងអង្គការនៅគ្រប់ជាន់ថ្នាក់ ទាំងថ្នាក់ជាតិ និងថ្នាក់អន្ដរជាតិ ។ បណ្ដាញទូរស័ព្ទសង្គ្រោះកុមារ ត្រូវបានបង្កើតឡើងដោយឈរ នៅលើជំនឿថា កុមារ និងជនដែលមានវ័យក្មេងគ្រប់រូបមានសិទ្ធិ ហើយពួកគេអាចមានលទ្ធភាពវែកញែក ពីបញ្ហាដែលកើតឡើងលើពួកគេបាន។ វាផ្ដល់ដល់កុមារ និងជនក្មេងៗនូវឱកាស ដែលពួកគេអាចសំដែង ប្រាប់ពីកង្វល់របស់ពួកគេ និងអាចនិយាយប្រាប់ពីបញ្ហាដែលប៉ះពាល់ដល់ពួកគេផ្ទាល់ ។ កាលពីឆ្នាំ១៩៩២ រាជរដ្ឋាភិបាលកម្ពុជាបានចុះហត្ថលេខាលើសន្ធិសញ្ញាសហប្រជាជាតិ ស្ដីពីសិទ្ធិកុមារនេះផងដែរ ។ សន្ធិ សញ្ញាសហប្រជាជាតិស្ដីពីសិទ្ធិកុមារ បានព្យាយាមផ្ដល់អនុសាសន៍ក្នុងជួររាជរដ្ឋាភិបាលនៅជុំវិញ ពិភព លោក ឱ្យបង្កើតនូវបណ្ដាញទូរស័ព្ទសង្គ្រោះកុមារនេះ។ បណ្ដាញទូរស័ព្ទសង្គ្រោះកុមារនេះត្រូវបានបញ្ចូល ក្នុងគំរោងការយុទ្ធសាស្ដ្ររបស់អង្គការយូនីសេហ្វ ដែលធ្វើឱ្យការស្ថាបនា និងទ្រទ្រង់បណ្ដាញទូរស័ព្ទ សង្គ្រោះកុមារជុំវិញ ពិភពលោកក្លាយជាអាទិភាពចម្បងរបស់អង្គការនេះ ។

ក្នុងមួយឆ្នាំៗ មានកុមារ និងជនវ័យក្មេងជាង១១,៣លាននាក់ នៅពាសពេញពិភពលោកទូរស័ព្ទមកកាន់ បណ្ដាញទូរស័ព្ទសង្គ្រោះកុមារ នៅពេលដែលពួកគេជួបវិបត្ដិ ដែលត្រូវការអន្ដរាគមន៍ ការស្ដារទឹកចិត្ដ ការពិគ្រោះយោបល់ ឬត្រូវការនរណាម្នាក់ ដើម្បីនិយាយជាមួយ ។ បណ្ដាញទូរស័ព្ទទាំងនេះផ្ដល់ អំណាចឱ្យកុមារហ៊ាននិយាយ និងធ្វើការផ្លាស់ប្ដូរជីវិតរបស់ពួកគេ ។ ដូច្នេះវាជាការសំខាន់ដែល ប្រទេសនីមួយៗត្រូវដាក់ទុនក្នុងជីវិតរបស់កុមារដែលរស់នៅក្នុង ប្រទេសរបស់គេ ។

ជាមួយនឹងទស្សនវិស័យបែបនេះ ក្រុមសកម្មជនដែលមកពីអង្គការក្រៅរដ្ឋាភិបាលចំនួន១០ បានធ្វើការ រួមគ្នាដើម្បីអភិវឌ្ឍន៍នូវ បណ្ដាញទូរស័ព្ទសង្គ្រោះកុមារដោយឥតគិតថ្លៃ ។
នៅថ្ងៃទី៣១ ឧសភា នឹងមានប្រារឰពិធីពិគ្រោះយោបល់ថ្នាក់ជាតិ នៅក្នុងសណ្ឋាគារកាំបូឌីយ៉ាណា ដែលមានការចូលរួមពីតំណាងរាជរដ្ឋាភិបាល អង្គការក្រៅរដ្ឋាភិបាលដែលធ្វើការជាមួយកុមារ និងយុវជន ព្រមទាំងកុមារខ្លួនគេផ្ទាល់ផងដែរ ។ នៅក្នុងអង្គប្រជុំនេះ នឹងមានបង្ហាញផងដែរនូវលទ្ធផលពីការប៉ាន់ ប្រមាណពីតំរូវការ ដែលបានធ្វើឡើងដោយអង្គការក្រៅរដ្ឋាភិបាលនានានៅដំណាច់ឆ្នាំ២០០៦ ក្រោម ជំនួយពីកុមារជាង៤០០នាក់ និងយុវជនជាង១០០នាក់ ដើម្បីបំពេញនូវកំរងសំណួរ ។

នៅក្នុងអង្គប្រជុំនេះនឹងមានវត្ដមានពីតំណាងរបស់កុមារ និងយុវជន ជាអ្នកចូលរួម និងដឹកនាំការពិគ្រោះ យោបល់ក្នុងចំណោមភាគីសំខាន់ៗដោយសង្ឃឹមថា នឹងអាចទទួលបានមកវិញនូវព័ត៌មានច្បាស់លាស់ និង ជាក់លាក់សំរាប់រៀបចំគំរោងការ និងដំណើរការ សរសេរគំរោងសំរេចរបស់ពួកគេ។

Labels: សណ្ដាប់ធ្នាប់, សន្តិសុខ

By Hang Meas
On
At 10:07 AM
Comments :

រថយន្ដដឹកអ្នកដំណើរ៨គ្រឿង ប៉ូលិសចោទថាចតគ្មានសណ្ដាប់ធ្នាប់

រាជធានីភ្នំពេញ ៖ រថយន្ដទួរីសប្រភេទ១២កៅអី និង២៥កៅអីចំនួន៨គ្រឿងដែលរកស៊ីដឹកភ្ញៀវទេសចរ ត្រូវបាននគរបាលខណ្ឌ៧មករា ចាប់យកទៅធ្វើការអប់រំកាលពីវេលាម៉ោង៨ព្រឹកថ្ងៃទី២៨ ឧសភា ដោយ សារតែការចតគ្មានគោលដៅ និងគ្មានសណ្ដាប់ធ្នាប់ ។ សមត្ថកិច្ចនគរបាលខណ្ឌ៧មករា បានឱ្យដឹងថា ក្នុងចំណោមរថយន្ដទួរីសទាំង៨គ្រឿងនេះ មានប្រភេទ១២កៅអីចំនួន៦គ្រឿង និងប្រភេទ២៥កៅអី ២គ្រឿង រថយន្ដទាំងនេះបានទៅចតនៅតាមផ្លូវមួយខាងក្រោយក្រសួងអភិវឌ្ឍន៍ជនបទ ដើម្បីរង់ចាំ ដឹកភ្ញៀវដោយគ្មានសណ្ដាប់ធ្នាប់ ។

ទាក់ទិននឹងការចាប់ឃាត់រថយន្ដទួរីសសំរាប់ដឹកភ្ញៀវនោះ ត្រូវបានអ្នកបើកបររថយន្ដម្នាក់ រៀបរាប់ឱ្យដឹង ថា ពួកគេទទួលបានការណែនាំកាលពី៤-៥ថ្ងៃមុនដោយមាននគរបាលដើរប្រាប់មិនឱ្យចតរថយន្ដ នៅតាមដង ផ្លូវលេខ១៦៩ និងផ្លូវជុំវិញក្រសួងអភិវឌ្ឍន៍ជនបទទេ ព្រោះសំអាងថា ធ្វើឱ្យប៉ះពាល់ដល់រថយន្ដរបស់ មន្ដ្រីក្រសួងអភិវឌ្ឍន៍ជនបទចេញចូលបំរើការងារ ។

ក្រុមអ្នកបើកបរបានពន្យល់ថា ពួកគេបានបើករថយន្ដទៅទទួលទានអាហារពេលព្រឹក នៅខាងក្រោយ ក្រសួងអភិវឌ្ឍន៍ជនបទ ព្រោះជាទម្លាប់ពួកគេធ្លាប់ជួបជុំគ្នានៅទីនោះ ប៉ុន្ដែនៅពេលគេចតនោះ ក៏ត្រូវ នគរបាលទៅចាប់បង្ខំឱ្យពួកគេបើករថយន្ដទៅកាន់់អធិការដ្ឋាននគរបាលខណ្ឌ៧មករា ដោយចោទប្រកាន់ថា រឹងទទឹងនឹងការណែនាំ។ អ្នកបើកបរដដែលនិយាយទៀតថា ពួកគេរកស៊ីបើករថយន្ដដឹកភ្ញៀវទេសចរនេះ យូរឆ្នាំហើយ ដែលកន្លងមកច្រើនទៅចតចាំដឹកភ្ញៀវនៅមុខសណ្ឋាគារកាំបូឌីយ៉ាណា ប៉ុន្ដែមួយរយៈនេះ ត្រូវបានគេដេញឱ្យចេញពីកន្លែងនោះ ទើបនាំគ្នាទៅចតនៅតាមផ្លូវលេខ១៦៩នេះ ។

ទាក់ទិននឹងហេតុការណ៍នេះដែរ មន្ដ្រីនគរបាលខណ្ឌ៧មករាបានឱ្យដឹងថា កន្លងមកសមត្ថកិច្ចធ្លាប់បានណែនាំ អ្នករកស៊ីដឹកភ្ញៀវនោះញឹកញាប់ហើយមិនឱ្យចតនៅទីនោះទេ ព្រោះខាងក្រសួងអភិវឌ្ឍន៍ជនបទគេប្ដឹង តែពួកគាត់មិនស្ដាប់ ទើបបានជាមានបទបញ្ជាពីថ្នាក់លើឱ្យនាំរថយន្ដដែលរឹងរូសទៅធ្វើការអប់រំ ។ មួយ រយៈនេះគេបានឃើញរថយន្ដទួរីសប្រភេទ១២កៅអី ២៥កៅអី រហូតដល់៣៥កៅអីក៏មាន បានទៅចត ហូរហែចាំដឹកភ្ញៀវនៅក្បែរក្រសួងអភិវឌ្ឍន៍ជនបទ សង្កាត់វាលវង់ ខណ្ឌ៧មករា ដែលគេនិយាយថា រថយន្ដទាំងនោះត្រូវគេដេញពីមុខសណ្ឋាគារកាំបូឌីយ៉ាណា ក្នុងទឹកដីខណ្ឌដូនពេញមក។ លុះឥឡូវនេះ ត្រូវនគរបាលខណ្ឌ៧មករាមិនឱ្យទៅចតនៅទីនោះទៀត ដូច្នេះពួកគេត្រូវតែបង្ខំចិត្ដទៅរកកន្លែងផ្សេង ដោយគ្មានការកំណត់។

Labels: សណ្ដាប់ធ្នាប់

By Hang Meas
On
At 10:03 AM
Comments :

Featured news

A Casino Night (also called Vegas Nights, Las Vegas Night, Monte Carlo Night) is an entertainment event with a casino theme. Casino Nights can be tied to a fundraiser to raise money for a specific cause (such as cancer research, community services, youth organizations, etc.) by having each participant purchase a ticket for the event. Each participant receives a specific amount of fun money that can be used to purchase gaming chips at the gambling tables. When the participants have lost their chips they may purchase additional fun money, increasing the amount of funds raised for the charity. The participants engage in various casino games (such as blackjack, roulette, baccarat, craps, poker, wheel of fortune, etc.) in the attempt to accumulate the largest amount of gaming chips. At the end of the evening the participant who managed to win the most chips may receive a prize, which is often awarded by a representative of the charity. When a casino night party is just for entertainment it usually works in the same way as a fundraiser casino night except that guests are given the fun money free of charge. Casino Nights function strictly as entertainment events with no real monetary gambling involved.

Cambodia News

ព្រះសង្ឃតំណាងពុទ្ធបរិស័ទខ្មែរនៅប្រទេសញូវហ្សេឡែន ពេញព្រះទ័យចំពោះការកសាង ពុទ្ធមណ្ឌលកម្ពុជា

ខឹងយកឈ្មោះកងពលមកប្រើដើម្បីដឹកឈើ...ចាប់ព្រមានម្ដង

សមាសភាពប្រដាល់នៅ TV5 ជឹម សារ៉ាត់ នៅតែបន្ដវ៉ៃ ជួបជាមួយ យឹម ឌៀប

ក្រុមព្រះអង្គម្ចាស់ត្រូវបានចោទប្រកាន់ទៅតុលាការក្រុង

ជនស្ទាវអ្នកលេងដាវសាមូរ៉ៃ៣នាក់ប៉េអឹមចាប់កោរត្រងោល

លទ្ធផលការប្រកួតកីឡាប្រណាំងរទេះសំរាប់ជនពិការឆ្នាំ ២០០៧

អាជ្ញាធរសំរេចផ្អាកការអនុវត្ដន៍សាលក្រមរុះរើផ្ទះ ខណៈអ្នកតវ៉ាត្រៀមកំលាំងទប់ទល់នៅប៉ោយប៉ែត

ច្រកសំរាប់នរោត្ដម រណឫទ្ធិលោកយូ ហុកគ្រី ជំរុញឱ្យសម្ដេចក្រុមព្រះទទួលស្គាល់ទោស១៨ខែសិន

ស្រុកទេសកើតចោរហារយ លក់ដីបានជាង៧ពាន់ដុល្លារ៣ថ្ងៃក្រោយចោរបិទមុខចូលប្លន់

ក្មេងអន្ធពាល៣នាក់ជំរិតទារលុយពីសិស្ស១១នាក់បាន២,៥០០រៀល

កម្ពុជាបានចុះកិច្ចព្រមព្រៀងអាកាសចរណ៍ជាមួយប្រទេសចំនួន២៨

ប៉ូលិសចរាចរណ៍ត្រួតពិនិត្យមធ្យោបាយធ្វើដំណើរមិនស្របច្បាប់

កូរ៉ូណាធ្លាក់ភ្នែកបើកបុកគល់អំពិលទឹកក្រឡាប់បះជើងសង្កត់រោងទឹកអំពៅ

ការបង្កើតបណ្ដាញទូរស័ព្ទសង្គ្រោះកុមារឥតគិតថ្លៃដំបូងនៅកម្ពុជា

រថយន្ដដឹកអ្នកដំណើរ៨គ្រឿង ប៉ូលិសចោទថាចតគ្មានសណ្ដាប់ធ្នាប់

Featured news

Recent Posts

Archives

Blogroll

Searching

Subscribe & Bookmark

Readers's Community