Cambodia News

រាជធានីភ្នំពេញ ៖ ជាងប៉ះកង់រថយន្ដម្នាក់ ត្រូវរថយន្ដដឹកដីធុនធំ១គ្រឿងកិនក្បាលស្លាប់ ក្នុងពេល គេលូនចូលដកយកដែកដូយចេញវិញ បន្ទាប់ពីប៉ះកង់រថយន្ដនោះរួច ហើយចៃដន្យអ្នកបើកបរបញ្ជារថយន្ដ របស់ខ្លួនទៅមុខ ។ ហេតុការណ៍នោះកើតឡើង កាលពីវេលាម៉ោង៥និង៣០នាទីព្រឹកថ្ងៃទី៥ ខែមិថុនា ឆ្នាំ២០០៧ នៅតាមបណ្ដោយផ្លូវចោមចៅ ក្នុងភូមិជ្រៃកោង សង្កាត់ចោមចៅ ខណ្ឌដង្កោ ក្រុងភ្នំពេញ។

ជនរងគ្រោះឈ្មោះកែវ ពៅ អាយុ១៩ឆ្នាំ មានស្រុកកំណើតនៅភូមិពភ្លា ឃុំសង្ឃ័រ ស្រុកស្វាយទាប ខេត្ដស្វាយរៀង ។ ចំណែករថយន្ដដឹកដីធុនធំនោះម៉ាកហ៊ីណូពណ៌ខ្មៅ ពាក់ស្លាកលេខក៩៦៨៨ភព៣ តែអ្នកបើកបរមិនស្គាល់ឈ្មោះទេ ព្រោះក្រោយពេលដឹងថា កិនមនុស្សស្លាប់បានគេចបាត់ ។

តាមសាក្សីឱ្យដឹងថា បន្ទាប់ពីប៉ះកង់រថយន្ដរួចរាល់ឈ្មោះកែវ ពៅ បានលូនចូលទៅដកយកដុំដូយចេញ វិញស្របពេលអ្នកបើកបរបញ្ជារថយន្ដទៅមុខដោយពុំបានដឹងមានមនុស្សនៅក្រោមរថយន្ដ ឯអ្នកប៉ះកង់ រថយន្ដថយចេញមិនទាន់ត្រូវកង់រថយន្ដក្រោយផ្នែកខាងឆ្វេងកិនបែកក្បាលស្លាប់ភ្លាម។ នៅពេលដឹងកើត មានហេតុការណ៍នោះទាំងអ្នកបើកបរ និងព្រូនាំគ្នាគេចខ្លួនបាត់។ ពេលគេចបាត់ហើយនោះ ពួកគេ បានទូរស័ព្ទប្រាប់ថៅកែឱ្យទៅយករថយន្ដ ព្រមទាំងនិយាយថា មុននឹងចេញដំណើរពួកគេមើលសព្វគ្រប់ អស់ហើយ ប៉ុន្ដែបែរជាកើតមានគ្រោះថ្នាក់បែបនេះទៅវិញ ។ សាក្សីបន្ដថា ការនិយាយតាមទូរស័ព្ទ ប្រាប់ថៅកែបែបនោះគ្រាន់តែជាពាក្យដោះសាប៉ុណ្ណោះ តាមការពិតអ្នកបើកបរពុំបានចុះពីលើរថយន្ដទេ គឺឱ្យព្រូចុះមើលពេលជាងប៉ះកង់នោះ ។ ពេលចេញដំណើរពួកគេពុំបានមើលជុំវិញទេ រថយន្ដទើប គ្រោះថ្នាក់កើតឡើងបែបនោះ។

មានព័ត៌មានឱ្យដឹងដែរថា រថយន្ដមួយគ្រឿងនេះធ្លាប់បុកគេពីរលើករួចមកហើយ ប៉ុន្ដែពុំត្រូវសមត្ថកិច្ច តាមចាប់បានទេ ព្រោះតែងតែបើកគេចចូលទៅក្នុងចំណតរបស់ខ្លួន នៅចំងាយប្រមាណជាង២០០ម៉ែត្រ ពីកន្លែងកើតហេតុនោះ ។

Labels: ចរាចរណ៍

By Hang Meas
On Wednesday, June 6, 2007
At 9:30 PM
Comments :

កូនមន្ដ្រីសំបូរលុយបាញ់គ្នានៅមុខរដ្ឋសភាថ្មី

រាជធានីភ្នំពេញ ៖ យ៉ាងហោចណាស់ក៏មានយុវជន៣នាក់បានរងរបួសយ៉ាងធ្ងន់ធ្ងរ ក្នុងអំពើបាញ់ប្រហារ គ្នាដ៏សាហាវមួយ ដែលបានកើតឡើងនៅមុខរដ្ឋសភាថ្មី ដែលមានទីតាំងស្ថិតនៅក្នុងសង្កាត់ទន្លេបាសាក់ ខណ្ឌចំការមន កាលពីវេលាម៉ោង៣ និង ១៥នាទីរសៀលថ្ងៃទី៤ មិថុនា ឆ្នាំ២០០៧។

យុវជនរងគ្រោះក្នុងហេតុការណ៍ខាងលើ ១-ឈ្មោះសូ គុណ អាយុ២០ឆ្នាំ រស់នៅភូមិទ្រា សង្កាត់ ស្ទឹងមានជ័យ ខណ្ឌមានជ័យ រងរបួសជើង ទាំងសងខាង ដោយគ្រាប់កាំភ្លើងចំនួន២គ្រាប់, ២-ឈ្មោះហួន រ៉ាឌី អាយុ ១៧ឆ្នាំ រស់នៅសង្កាត់ទឹកល្អក់៣ ខណ្ឌទួលគោក (រងរបួសភ្លៅឆ្វេង និងក្រោមក្លៀក ខាងឆ្វេង ត្រូវគ្រាប់កាំភ្លើង២គ្រាប់) និង៣-ឈ្មោះហូ សុងរតនា អាយុ២០ឆ្នាំ ស្នាក់នៅសង្កាត់ស្រះចក ខណ្ឌដូនពេញ ជាសិស្សវិទ្យាល័យវត្ដភ្នំ (រងរបួសក្បាល និងក្បាលជង្គង់ខាងស្ដាំ) ។

ទាក់ទិននឹងអំពើបាញ់ប្រហារគ្នាបណ្ដាលឱ្យភាគីម្ខាងរងរបួសធ្ងន់ធ្ងរទាំងអស់គ្នានេះ បើតាមប្រភពព័ត៌មាន ពីឈ្មោះហូ សុងរតនា បាននិយាយនៅក្នុងបន្ទប់សង្គ្រោះនៃមន្ទីរពហុព្យាបាលតុងស៊ីងថា កាលពីល្ងាច ថ្ងៃទី៣ មិថុនា ខ្លួនបានទូរស័ព្ទទៅអតីតសង្សារម្នាក់ ឈ្មោះបុប្ពា ក្នុងគោលបំណងសួរសុខទុក្ខនាង ។ ខណៈពេលកំពុងនិយាយទូរស័ព្ទមិនបានប្រមាណ១នាទីផង នាងបុប្ពាបានបិទទូរស័ព្ទចោលមុនពេលចប់ការ សន្ទនាគ្នាតាមទូរស័ព្ទ ។ ដោយមានចំងល់រូបគេ (ហូ សុង រតនា) ក៏ទូរស័ព្ទទៅនាងបុប្ពាម្ដងទៀត។ ពេលទូរស័ព្ទទៅលើកទី២នោះ ស្រាប់តែសំលេងមនុស្សប្រុសជាអ្នកទទួលទៅវិញ។ ប្រភពដដែលបន្ដ ទៀតថា ការដែលមនុស្សប្រុសម្ខាងទៀតនិយាយទូរស័ព្ទជាមួយខ្លួន (សុងរតនា) នោះគេប្រាប់ថា “អញ” ឈ្មោះ អាស៊ិញ ។ ខណៈពេលកំពុងនិយាយទូរស័ព្ទជាមួយគ្នានោះ ឈ្មោះស៊ិញបានណាត់ខ្លួន (សុងរតនា) ឱ្យមកជួបគ្នានៅរសៀលថ្ងៃទី៤ មិថុនា នៅលើសួនច្បារមុខរដ្ឋសភាថ្មី ដើម្បីនិយាយគ្នាឱ្យច្បាស់លាស់។ ឈ្មោះ សុងរតនា និយាយទៀតថា ឈ្មោះ ស៊ិញ នោះបានបោះពាក្យសំដីតាមទូរស័ព្ទថា បើអាណា អត់មកជួបគឺឆ្កែ។ ដើម្បីកុំឱ្យភាគីម្ខាងចាត់ទុកខ្លួនថាសត្វឆ្កែ ខ្លួនក៏បានជិះរថយន្ដម៉ាកប្រាដូមួយគ្រឿង មានគ្នា៣នាក់ គឺអ្នករងរបួសទាំងអស់គ្នាតែម្ដង ។ សុងរតនា ក៏ដូចមិត្ដភក្ដិ២នាក់ទៀតដែរ បាននិយាយថា ខ្លួនកំពុងឈរចាំជួបដែលណាត់គ្នានៅលើសួនច្បារមុខរដ្ឋសភា ស្រាប់តែមានភាគីម្ខាងទៀតទំនងជាភាគី ឈ្មោះស៊ិញ បានបើករថយន្ដស៊េរីទំនើប ពណ៌ខ្មៅមួយគ្រឿង ពាក់ស្លាកលេខ ខ.ម មកបានបាញ់រះលើពួក ខ្លួនបណ្ដាលឱ្យរងរបួសរដូករណែលទាំង៣នាក់តែម្ដង ។

ទាក់ទិននឹងសកម្មភាពបាញ់ប្រហារគ្នាខាងលើនេះ នៅរសៀលថ្ងៃដដែលមានន័យថា ក្រោយពីមានស្នូរ អាវុធនៅសួនច្បាររួច ប៉ូលិសខណ្ឌចំការមនបានទទួលពាក្យបណ្ដឹងពីក្រុមយុវជន១ក្រុមមានគ្នា៤នាក់ ដែល ២នាក់ គឺជាក្មួយមន្ដ្រីម្នាក់ រីឯ២នាក់ទៀតជាអង្គរក្សតាមការពារ បានជិះរថយន្ដស៊េរីទំនើបមួយគ្រឿង ចូលទៅប្ដឹងសមត្ថកិច្ចថា មានគេបាញ់ប្រហារមកលើពួកខ្លួន ក្នុងករណីប៉ុនប៉ងធ្វើឃាត ។ មន្ដ្រីប៉ូលិស ខណ្ឌចំការមនបានបង្ហើបឱ្យដឹងថា អ្នកដែលមកប្ដឹងសមត្ថកិច្ចថា មានគេបាញ់ពួកខ្លួននោះអាចជាប់ពាក់ព័ន្ធ ជាមួយភាគីក្រុមអ្នករងរបួសខាងលើ។ ប៉ូលិសបង្ហើបថា ភាគីដែលមកប្ដឹងសមត្ថកិច្ចនោះបានសារភាពថា ខ្លួនបានបាញ់រះនៅកន្លែងកើតហេតុខាងលើមែន ប៉ុន្ដែខណៈពេលនៃការបាញ់ប្រហារគ្នានោះ គឺបាញ់ទៅវិញ ទៅមកប្រៀបដូចសមរភូមិប្រយុទ្ធគ្នាមួយ ។

សាក្សីនៅកន្លែងកើតហេតុនិយាយថា ភាគីទាំងសងខាងម្ខាងៗមានគ្នាមិនតិចឡើយ ហើយសុទ្ធសឹងជាកូន អ្នកធំ មានលុយ មានអំណាច ។ អ្នកខ្លះជាកូនគយ ខ្លះទៀតជាកូននាយទាហាន មានបុណ្យស័ក្ដិធំៗ ។

ជុំវិញហេតុការណ៍ផ្ទុះអាវុធខាងលើនេះ សមត្ថកិច្ចបានសន្និដ្ឋានជំហានដំបូងថា ក្រុមយុវជនទាំង២ក្រុម បានណាត់គ្នាបាញ់គ្នាផ្គើនសមត្ថកិច្ចតែម្ដង។ ករណីខាងលើនេះ ប៉ូលិសក្រុងភ្នំពេញ បានសហការជាមួយ ប៉ូលិសខណ្ឌចំការមនដាក់កំលាំងយាមកាមអ្នករបួសយ៉ាងដិតដល់ នៅមន្ទីរពេទ្យតុងស៊ីង រីឯអ្នកដែល ក្លាហានជិះរថយន្ដចូលប្ដឹងប៉ូលិសនោះ ប៉ូលិសព្រហ្មទណ្ឌក្រុងភ្នំពេញសំរេចឃាត់ខ្លួន បណ្ដោះអាសន្ននៅ ការិយាល័យនគរបាលព្រហ្មទណ្ឌក្រុងភ្នំពេញដើម្បីធ្វើការស្រាវជ្រាវ ។

នេះគឺជាបាតុភាពដ៏អាក្រក់ និងគួរឱ្យស្អប់ខ្ពើមបំផុតថ្មីមួយទៀត ដែលក្រុមយុវជនឈាមរាវជើងខ្លាំង បានបង្កការបាញ់ប្រហារគ្នាទាំងថ្ងៃ បន្ទាប់ពីរឿងរ៉ាវដ៏លាមកមួយបានកើតឡើងកាលពីខែមុន នៅមុខក្លឹប រាត្រីមួយ ដោយមានការបាញ់គ្នាផង និងបើកឡានបុកគ្នាផង ។

Labels: ចរាចរណ៍, សណ្ដាប់ធ្នាប់, សន្តិសុខ

By Hang Meas
On Tuesday, June 5, 2007
At 2:59 PM
Comments :

បុរសជនជាតិកូរ៉េស្រវឹងដល់.កបើកអាក្ដាមត្របាក់ទ្វារផ្ទះគេទាំងយប់

រាជធានីភ្នំពេញ ៖ នៅវេលាម៉ោង៩និង៤៥នាទីយប់ ថ្ងៃទី២ មិថុនា បុរសជនជាតិកូរ៉េម្នាក់ ដែលមានអាការៈស្រវឹងស្រាខ្លាំង បានបើករថយន្ដជ្រុលចង្កូតទៅបុកទ្វារផ្ទះគេ បណ្ដាលឱ្យខូចខាតទាំង រថយន្ដយ៉ាងដំណំ ។ បុរសជនជាតិកូរ៉េនោះមានឈ្មោះជិន គុនវ័ន អាយុ៥៣ឆ្នាំ ជាប្រធានរោងចក្រកាត់ដេរ ឈ្មោះហ្វាញ ជីស ស្ថិតនៅភូមិព្រៃទា សង្កាត់ចោមចៅ ខណ្ឌដង្កោ រាជធានីភ្នំពេញ ហើយរថយន្ដ ដែលបង្កគ្រោះថ្នាក់នោះម៉ាក LEXUS ពណ៌សំបកឪឡឹក ពាក់ស្លាកលេខ 2D 7367 ភ្នំពេញ។

ទាក់ទិននឹងហេតុការណ៍នេះ នគរបាលខណ្ឌ៧មករា មិនទាន់បានបំភ្លឺរឿងអ្វីទាំងអស់ ដោយគ្រាន់តែ បញ្ជាក់តាមសាក្សីនៅកន្លែងកើតហេតុថា នៅវេលាម៉ោងកើតហេតុខាងលើគេបានឃើញរថយន្ដមួយ គ្រឿង ម៉ាកម៉ុងហ្គោ ចតនៅលើផ្លូវលេខ១៦១ កំពុងទំលាក់ទំនិញដាក់ចូលផ្ទះលេខ169AEo ក្នុង សង្កាត់អូរឫស្សីទី២ ខណ្ឌ៧មករា ។ ខណៈពេលរថយន្ដនោះកំពុងដាក់ទំនិញ ក៏ស្រាប់តែរថយន្ដម៉ាក LEXUS បើកបរដោយជនជាតិកូរ៉េដែលស្រវឹងជោកជាំ មិនដឹងជាចេញពីហាងណាទេ បើកទៅបុកគូទ រថយន្ដនោះពេញទំហឹង ហើយរេចង្កូតទៅបុកទ្វារផ្ទះលេខ១៦៩នោះបន្ដទៀត។ ពេលរថយន្ដ LEXUS នោះបុកទ្វារផ្ទះ គេបានឃើញអ្នកបើកបររថយន្ដបង្ហើបកញ្ចក់អើត.កចេញមកក្រៅនិយាយភាសាកូរ៉េ ឱ្យគេជួយ ថែមទាំងមានឈាមហូរពេញមាត់ ប៉ុន្ដែភ្លាមនោះគ្មានអ្នកណាចូលក្បែរបានទេ ព្រោះធុំក្លិនស្រា ជះខ្លាំងពេក គឺបានត្រឹមតែទាក់ទងទៅសមត្ថកិច្ចឱ្យនាំរថយន្ដនោះ ទៅរក្សាទុកនៅអធិការដ្ឋាន នគរបាលខណ្ឌ៧មករាដើម្បីរង់ចាំធ្វើការដោះ ស្រាយប៉ុណ្ណោះ ។

នគរបាលខណ្ឌ៧មករាបានឱ្យដឹងទៀតថា ពេលយករថយន្ដ និងអ្នកបើកបរទៅដល់អធិការដ្ឋាន ក៏ត្រូវមិត្ដ ភក្ដិបងប្អូនអ្នកបើកបរមកធានាយកបុរសនោះទៅផ្ទះជាបណ្ដោះអាសន្នសិន ដើម្បីព្យាបាលរបួស ព្រោះថា ពេលនេះនិយាយគ្នាក៏និយាយមិនកើតដែរ ដោយសារអ្នកបើកបររូបនោះធ្លាក់ភ្នែកខ្លាំងពេក ។

Labels: ចរាចរណ៍, សណ្ដាប់ធ្នាប់

By Hang Meas
On
At 2:49 PM
Comments :

យុវជនជំទង់ម្នាក់ត្រូវរថយន្ដកិនស្លាប់យ៉ាងអាណោចអាធ័ម

រាជធានីភ្នំពេញ ៖ យុវជនម្នាក់បានស្លាប់និង២នាក់ទៀតរងរបួសស្រាល ខណៈពួកគេជិះម៉ូតូមួយគ្រឿង ម៉ាកវ៉េវ ជ្រុលចង្កូតទៅបុករទេះលក់ខ្ចៅ បណ្ដាលឱ្យដួលម៉ូតូ ហើយអ្នកជិះពីក្រោយបានខ្ទាតចូលកង់ រថយន្ដកូរ៉េ។ គ្រោះថ្នាក់ចរាចរណ៍នេះបានកើតឡើងកាលពីវេលាម៉ោង១០ និង៣០នាទី ព្រឹកថ្ងៃទី៤ មិថុនា នៅមុខក្រសួងធម្មការតាមវិថីព្រះស៊ីសុវត្ថិ ស្ថិតក្នុងសង្កាត់ជ័យជំនះ ខណ្ឌដូនពេញ ក្រុងភ្នំពេញ ។

ប្រភពព័ត៌មាននៅកន្លែងកើតហេតុនិយាយឱ្យសមត្ថកិច្ចដឹងថា យុវជន៣នាក់នោះជិះម៉ូតូវ៉េវ ផលិតនៅ ប្រទេសវៀតណាម ពណ៌ខៀវ ក្នុងល្បឿនលឿនតាមបណ្ដោយវិថីព្រះស៊ីសុវត្ថិឆ្ពោះទៅទិសខាងជើង។ ពេលទៅដល់កន្លែងកើតហេតុស្រាប់តែម៉ូតូពួកគេបុករទេះលក់ខ្ចៅបណ្ដាលឱ្យរទេះនោះ ដួលក្រឡាប់បះកង់ ឡើងលើ ឯម៉ូតូក៏ដួលដែរ។ ពេលដួលនោះ យុវជនឈ្មោះចិត្រ ដែលអង្គុយក្រោយគេបានខ្ទាតទៅ ចំណែកផ្លូវម្ខាងទៀតស្របពេលមានរថយន្ដធុនកូរ៉េមួយតោនកន្លះដឹកឈើមកដល់ បើកកិនត្រង់កង់ ក្រោយចំមួយចំហៀងខ្លួនតែម្ដង។ បន្ទាប់ពីរថយន្ដនោះបើកទៅបាត់ យុវជន២នាក់ទៀតដែលរបួសស្រាល នាំគ្នាសែងឈ្មោះចិត្រ ដាក់លើចិញ្ចើមផ្លូវជួយរឹតឱ្យដឹងខ្លួនវិញ ប៉ុន្ដែដោយសារឈាមហូរចេញតាម មាត់ច្រើនពេកគេបានដាច់ខ្យល់ស្លាប់មុនរថយន្ដសាមុយទៅដល់ ។

យុវជនឈ្មោះវ៉ាន់ រដ្ឋា ហៅសារាយ ទី អាយុ១៨ឆ្នាំ មានលំនៅក្នុងសង្កាត់ច្បារអំពៅ២ ខណ្ឌមានជ័យ ក្រុងភ្នំពេញ ដែលរបួសស្រាលនិងជាអ្នកបើកម៉ូតូបាននិយាយឱ្យសមត្ថកិច្ចដឹងថា ពួកគេមានគោលបំណង ទៅផ្សារឃ្លាំងរំសេវ ប៉ុន្ដែជិះម៉ូតូកំសាន្ដកាត់តាមមុខព្រះបរមរាជវាំងសិន។ ពេលពួកគេជិះទៅដល់ ចំណុចកើតហេតុ ស្រាប់តែមានរថយន្ដកូរ៉េដឹកឈើបុករទេះលក់ខ្ចៅស្ងោរ បណ្ដាលឱ្យក្រឡាប់រទេះ កំពប់ខ្ចៅពេញថ្នល់ ហើយបន្ទាប់មករថយន្ដនោះជ្រុលមកបុកម៉ូតូរបស់គេពីក្រោយថែមទៀត ។ ពេលនោះ មិត្ដភក្ដិគេឈ្មោះចិត្រ ដែលអង្គុយក្រោយគេ បានខ្ទាតចូលកង់រថយន្ដទើបរងគ្រោះថ្នាក់ដល់ស្លាប់បែប នេះ។

ប៉ូលិសការិយាល័យចរាចរណ៍ជើងគោក ក្រុងភ្នំពេញបានទៅធ្វើការវាស់វែង និងយកសពទៅតំកល់ទុក នៅឈាបនដ្ឋានវត្ដព្រះពុទ្ធ រង់ចាំក្រុមគ្រួសារ ។ ទោះជាយ៉ាងណារថយន្ដកូរ៉េនោះបានបើកគេចបាត់។

Labels: ចរាចរណ៍, សណ្ដាប់ធ្នាប់

By Hang Meas
On
At 2:39 PM
Comments :

រថយន្ដកាមរីបុករះម៉ូតូទាំងព្រឹកអស់៥គ្រឿងនិងរបួសធ្ងន់ម្នាក់

រាជធានីភ្នំពេញ ៖ បុរសម្នាក់បានដួលសន្លប់ស្ដូកស្ដឹង និងម៉ូតូស៊េរីថ្មីចំនួន៥គ្រឿង ក៏ទទួលរងនូវការ ខូចខាតដែរ ខណៈពេលដែលរថយន្ដមួយគ្រឿងម៉ាកកាមរីស៊េរី៩១ ដែលបើកបរដោយបុរសចំណាស់ ម្នាក់បានជ្រុលចង្កូតទៅបុកទាំងកំរោលទំនងជាខូចក្រឡប្រេងហ្វ្រាំង ទើបចាប់ហ្វ្រាំងមិនស៊ី ។ គ្រោះថ្នាក់ នេះបានកើតឡើងនៅចំណុចរង្វង់មូលរមណីយដ្ឋានវត្ដភ្នំផ្នែកខាងទិសឦសាន ស្ថិតក្នុងសង្កាត់វត្ដភ្នំ ខណ្ឌ ដូនពេញ ក្រុងភ្នំពេញ កាលពីវេលាម៉ោង៨ព្រឹកថ្ងៃទី៤ មិថុនា ឆ្នាំ២០០៧ ។

ម្ចាស់រថយន្ដកាមរីស៊េរី៩១ ពណ៌ទឹកប្រាក់ ពាក់ស្លាកលេខង៨៨៤៥ ភព២ នោះ ឈ្មោះជា សារ៉ាវុទ្ធី អាយុ៥០ឆ្នាំ ជាមន្ដ្រីប៉ូលិសផ្នែកសណ្ដាប់ធ្នាប់ស្រុកតាខ្មៅ ខេត្ដកណ្ដាល ។ លោកបានរៀបរាប់ឱ្យសមត្ថកិច្ច ដឹងថាមុនពេលកើតហេតុ លោកបានបើកបររថយន្ដពីស្រុកតាខ្មៅ ឆ្ពោះទៅមន្ទីរពេទ្យកាល់ម៉ែតដើម្បី មើលកូនប្រុស ដែលរងគ្រោះថ្នាក់ចរាចរ ហើយកំពុងសំរាកព្យាបាលនៅទីនោះ ។ ខណៈពេលបើករថយន្ដ មកដល់ចំណុចខាងលើ ស្រាប់តែជ្រុលចង្កូតទៅបុកម៉ូតូអ្នកដំណើរដែលចតនៅលើចិញ្ចើមផ្លូវជាបន្ដបន្ទាប់ រហូតដល់៥គ្រឿង ហើយក្នុងហេតុការណ៍នោះក៏បានបណ្ដាលឱ្យបុរសម្នាក់ទទួលរងរបួស រហូតសន្លប់ ស្ដូកស្ដឹង ដោយសាររថយន្ដកៀប ។

លោកជា សារ៉ាវុទ្ធី បានបញ្ជាក់ថា រថយន្ដរបស់លោកជាន់ហ្វ្រាំងមិនស៊ីទំនងជាខូចក្រឡហ្វ្រាំង ហើយ កន្លងមកមិនដែលមានហេតុការណ៍បែបនេះឡើយ ។ ប៉ូលិសមូលដ្ឋាននិយាយថា ម៉ូតូខូចខាតមានធុន C125 ចំនួន៣គ្រឿង វីវ៉ា១គ្រឿង និងវ៉េវមួយគ្រឿង រីឯបុរសម្នាក់ដែលរងគ្រោះនោះមិនទាន់ស្គាល់ឈ្មោះ នៅឡើយទេ ហើយកំពុងសំរាកព្យាបាលនៅមន្ទីរពេទ្យព្រះកេតុមាលា ។

Labels: ចរាចរណ៍, សណ្ដាប់ធ្នាប់

By Hang Meas
On
At 2:37 PM
Comments :

ខ្យល់និងព្រះពិរុណមួយមេធំនៅភ្នំពេញរំលំពោធិ៍មួយដើមទាំងឫស

រាជធានីភ្នំពេញ ៖ ដើមពោធិ៍ដ៏ធំមួយដើមដែលដុះនៅចំណុចផ្លូវលេខ៣៨៨ កែងផ្លូវព្រះមុនីរ៉េត ស្ថិតក្នុងសង្កាត់ទួលស្វាយព្រៃទី២ ខណ្ឌចំការមន បានដួលរលំលើកំណាត់ផ្លូវលេខ៣៨៨ បណ្ដាល ឱ្យការធ្វើដំណើរលើកំណាត់ផ្លូវនោះពុំអាចឆ្លងកាត់បានអស់រយៈពេលមួយថ្ងៃពេញទៅហើយ នៅតែពុំទាន់ ឃើញអាជ្ញាធរឬមន្ដ្រីជំនាញចុះកាប់ចេញពីលើទ្រូងផ្លូវឡើយ។ ដើមពោធិ៍ដ៏ចំណាស់នេះ បានដួលរលំ ទៅលើដងផ្លូវកាលពីវេលាម៉ោង៦និង៤៥នាទីល្ងាចថ្ងៃទី២ មិថុនា ក្រោយពេលមានភ្លៀងមួយមេ និង ព្យុះកំណាចយ៉ាងធំមួយបោកបក់ក្នុងទីក្រុងភ្នំពេញ ។

ទាក់ទិននឹងឧប្បត្ដិហេតុខាងលើនេះ បើតាមប្រភពព័ត៌មានពីបុរសចំណាស់ម្នាក់ អាយុប្រហែល៨០ឆ្នាំ ដែល មានលំនៅឋានក្បែរកន្លែងដែលដើមពោធិ៍រលំនោះ បាននិយាយប្រាប់អាជ្ញាធរសង្កាត់ទួលស្វាយព្រៃទី២ថា ចាប់តាំងពីគាត់ធំដឹងក្ដីកាលណាមក គឺឃើញដើមពោធិ៍ដ៏ធំនេះមានទំហំស្ទើរប៉ុននឹងកង់រទេះគោទៅហើយ មានម្លប់ត្រឈឹងត្រឈៃ ។ ដូច្នេះបើប្រៀបធៀបពីអាយុកាល គឺដើមពោធិ៍ខាងលើមានអាយុមិនក្រោមពី ១០០ឆ្នាំឡើយ។ មានការលើកឡើងថា នេះជាសំណាងល្អមួយក្នុងមួយពាន់សំណាងហើយ ដែលដើមពោធិ៍ រលំនោះពុំមានមនុស្សឆ្លងកាត់លើដងវិថីនៅពេលមានហេតុការណ៍កើតឡើង បើសិនជាពេលនោះមាន មនុស្សឆ្លងកាត់វិញ ប្រាកដជាចៀសមិនផុតពីទទួលរងគ្រោះដល់ជីវិតជាពុំខានឡើយ ។ ទោះជាយ៉ាងនេះ ក្ដី គេបានសង្កេតឃើញផ្ទះបើកហាងលក់កាហ្វេមួយកន្លែងនៅក្បែរដើមពោធិ៍ធំនោះ បានទទួលរងនូវការ ខូចខាតបាក់បែកសំយាបផ្ទះមួយចំនួនផងដែរ ដោយសារចុងដើមពោធិ៍រលំទៅប៉ះគ្របពីលើ ។ មនុស្សជា ច្រើននាក់ដែលទៅអង្គុយហូបកាហ្វេនៅហាងកាហ្វេនេះបានលាន់មាត់គ្រប់ៗគ្នាថា បើសិនជាហាងកាហ្វេពុំ មែនជាផ្ទះថ្មរឹងមាំទេ ម្ល៉េះសមនឹងត្រូវបាក់ស្រុតដោយសារដើមពោធិ៍រលំសង្កត់នោះពុំខានឡើយ ។ ជុំវិញ ឧប្បត្ដិហេតុខាងលើនេះ មហាជនភាគច្រើនបានធ្វើការរិះគន់ទៅអាជ្ញាធរក្រុងភ្នំពេញ ពិសេសមន្ទីរ សាធារណការរាជធានីភ្នំពេញថា ពុំបានគិតគូរច្បាស់លាស់អំពីអាយុកាលរបស់ដើមឈើនៅក្នុងក្រុងភ្នំពេញ ដើម្បីធ្វើការកាប់ផ្ដួលចោលមុនឧប្បត្ដិហេតុកើតឡើង ទើបពុំបណ្ដាលឱ្យមានការផលប៉ះពាល់ដល់ជីវិតរស់ នៅរបស់ប្រជាពលរដ្ឋ ។

ប្រជាពលរដ្ឋបានលើកឡើងទៀតថា នៅមានដើមឈើចំណាស់ៗជាច្រើនដើមដុះនៅអមដងវិថីនានា ក្នុង ក្រុងភ្នំពេញកំពុងប្រឈមមុខនឹងការដួលរលំ ឬបាក់ធ្លាក់មកលើផ្លូវ ហើយនៅពុំទាន់ឃើញមន្ដ្រីជំនាញ ចុះធ្វើការសិក្សាគិតគូរមុនពេលមានឧប្បត្ដិហេតុកើតឡើងឡើយ ។ គេបានកត់សំគាល់ថា កន្លងមក ធ្លាប់មានប្រជាពលរដ្ឋខ្លះទទួលរងនូវការខូចខាតយានយន្ដគ្រប់ប្រភេទ ដោយសារដើមឈើរលំសង្កត់ ពិសេសគឺក្នុងរដូវវស្សា។ ដើម្បីទប់ស្កាត់គ្រោះថ្នាក់ជាយថាហេតុទៅថ្ងៃខាងមុខទៀត មន្ដ្រីជំនាញគួរ ធ្វើការសិក្សាឱ្យបានច្បាស់លាស់ឡើងវិញ ចៀសវាងមានការដួលរលំដើមឈើមកលើដងផ្លូវ បង្កការលំបាក និងគ្រោះមហន្ដរាយដល់ប្រជាពលរដ្ឋនៅពេលមានព្យុះភ្លៀងម្ដងៗ ។

Labels: ចរាចរណ៍, បរិស្ថាន, សណ្ដាប់ធ្នាប់

By Hang Meas
On Monday, June 4, 2007
At 11:48 AM
Comments :

ឆក់ខ្សែ.កជិះម៉ូតូរត់បុកគេដួលប្រកាច់២នាក់ជាប់ខ្នោះដៃលើគ្រែពេទ្យ

រាជធានីភ្នំពេញ ៖ ជនសង្ស័យជាចោរឆក់ចំនួន២នាក់ដែលធ្វើសកម្មភាពឆក់ខ្សែ.ក និងទូរស័ព្ទពីអ្នក ដំណើរបានសំរេច បានព្យាយាមជិះម៉ូតូគេចខ្លួន ប៉ុន្ដែបានចំងាយប្រមាណ១០០ម៉ែត្រ ក៏ជ្រុលទៅបុកអ្នក ដើរបណ្ដាលឱ្យដួលខ្លួនឯងបែកមុខ បាក់ធ្មេញ និងត្រូវចាប់ខ្លួនវាយខ្នោះជាប់គ្រែដេកនៅពេលបញ្ជូនទៅ កាន់មន្ទីរពេទ្យពហុព្យាបាលចន្ទ្រា។ នៅក្នុងហេតុការណ៍នេះបណ្ដាលឱ្យអ្នកដំណើរម្នាក់បាក់ភ្លៅម្ខាង ប៉ុន្ដែ គេពុំបានស្គាល់អត្ដសញ្ញាណឡើយ ។

ហេតុការណ៍ឆក់ខ្សែ.កនេះ បានកើតឡើង កាលពីវេលាម៉ោង៦ និង៥០នាទីល្ងាចថ្ងៃទី១ មិថុនា នៅមុខ ផ្ទះលេខ19H ផ្លូវលេខ២៧១ សង្កាត់បឹងសាឡាង ខណ្ឌទួលគោក ។ ឯជនសង្ស័យដែលត្រូវចាប់ខ្លួន ម្នាក់ឈ្មោះចាន់ ធា ភេប្រុស អាយុ២២ឆ្នាំ ជាជាងសំណង់ មានទីលំនៅផ្ទះលេខ១០៧០ ផ្លូវចោមចៅ ភូមិបឹងក្រពើ សង្កាត់ស្ទឹងមានជ័យ និងម្នាក់ទៀត ឈ្មោះហុង ឧស្សាហ៍ ភេទប្រុស អាយុ១៨ឆ្នាំ ជាជាង សំណង់ដែរ មានទីលំនៅភូមិសុខសាន្ដ សង្កាត់ទំនប់ទឹក ខណ្ឌចំការមន ។ ជនទាំងពីរនាក់បានរង របួសបែកមុខ បាក់ធ្មេញ និង រលាត់ដៃជើង ហើយត្រូវសមត្ថកិច្ចបញ្ជូន ទៅព្យាបាលនៅមន្ទីរពហុព្យាបាល ចន្ទ្រា ដោយដៃដាក់ខ្នោះជាប់គ្រែព្រោះខ្លាចរត់ ។

មន្ដ្រីប៉ូលិសខណ្ឌទួលគោកឱ្យដឹងថា ជនជាប់ចោទទាំង២នាក់បានរងរបួសធ្ងន់ធ្ងរ បន្ទាប់ពីជិះម៉ូតូហុងដា C125 ស៊េរី២០០៧ មួយគ្រឿង ឆក់យកខ្សែ.កប្លាទីន ទម្ងន់៣ជី និងទូរស័ព្ទដៃពីស្ដ្រីម្នាក់ឈ្មោះកែ សុភា អាយុ៥៤ឆ្នាំ មានទីលំនៅក្នុងសង្កាត់ទំនប់ទឹក ខណ្ឌចំការមន បានសំរេចហើយក៏ជិះគេចខ្លួន តែបានជ្រុល ទៅបុកអ្នកដើរ បណ្ដាលឱ្យដួលម៉ូតូ ។ មន្ដ្រីប៉ូលិសដដែលបន្ដទៀតថា នៅមុនពេលកើតហេតុស្ដ្រីឈ្មោះ កែ សុធា ព្រមទាំងចៅតូចៗចំនួន២នាក់បានជិះម៉ូតូឌុប ធ្វើដំណើរពីសង្កាត់ទឹកថ្លាក្នុងគោលបំណង ទៅផ្ទះ ដោយធ្វើដំណើរតាមផ្លូវលេខ២៧១ មកពីទិសខាងជើង ។ នៅពេលធ្វើដំណើរមកដល់ចំណុចខាងលើ ជនជាប់ចោទទាំងពីរនាក់ដោយឈ្មោះចាន់ ធា ជាអ្នកបើកម៉ូតូ បានមកក្បែរហើយជនម្នាក់ឈ្មោះ ហុង ឧស្សាហ៍ បានឆក់យកខ្សែ.កប្លាទីទំងន់៣ជី និងទូរស័ព្ទម៉ាកណូគៀ ពីស្ដ្រីរងគ្រោះបានសំរេច ។

នៅក្នុងសកម្មភាពនេះបណ្ដាលឱ្យម៉ូតូឌុប និងម៉ូតូជនជាប់ចោទដួលបោកទៅលើថ្នល់ ហើយជនជាប់ចោទ ទាំងពីរនាក់បានលើកម៉ូតូរបស់ខ្លួនជិះត្រឡប់ទៅទិសខាងជើងវិញ ប៉ុន្ដែដោយព្រះពុំជួយក៏ជ្រុលទៅបុក បុរសម្នាក់កំពុងដើរឆ្លងផ្លូវបណ្ដាលឱ្យដួលខ្លួនឯងបែកមុខ បាក់ធ្មេញសន្លប់លើទ្រូងផ្លូវ ។ ចំណែកបុរស ដែលឆ្លងផ្លូវបានរងរបួសបាក់ភ្លៅម្ខាង ប៉ុន្ដែពុំត្រូវបានគេស្គាល់អត្ដសញ្ញាណឡើយ ។ ភ្លាមៗនោះប៉ូលិស ខណ្ឌទួលគោកចុះទៅដល់កន្លែងកើតហេតុ ហើយដោយសារតែជនជាប់ចោទមានរបួសធ្ងន់ធ្ងរ ក៏បញ្ជូន ទៅកាន់មន្ទីរពេទ្យពហុព្យាបាលចន្ទ្រា រួចបន្ទាប់ពីដឹងខ្លួនក៏បានដាក់ខ្នោះដៃជាប់គ្រែដើម្បីកុំឱ្យរត់។ ទោះជា យ៉ាងណាខ្សែ.កនិងទូរស័ព្ទបានបាត់នៅពេលដួលម៉ូតូ ។

Labels: ចរាចរណ៍, សណ្ដាប់ធ្នាប់, សន្តិសុខ

By Hang Meas
On
At 11:47 AM
Comments :

ប៉ូលិសយីអ៊ុនដាក់ទាំងព្រឹក ប្រុងផាករកកាហ្វេគុយទាវបែរជាសងថ្លៃខូចសោម៉ូតូ

ខេត្ដបាត់ដំបង ៖ “ចង់ចំណេញ បែរជាដាច់ចំណង” ប៉ូលិសសណ្ដាប់ធ្នាប់ផ្សារបឹងឈូកខេត្ដបាត់ដំបង កាលពីព្រឹកថ្ងៃទី៣០ ឧសភាកន្លងមកនេះ ប៊ិះវ័ណ្ឌ.កដោយសារចង់ផាកពិន័យម៉ូតូមួយគ្រឿង ដែលជាប់ សោ.កចតចោលនៅកន្លែងហាមឃាត់នៅខាងត្បូងផ្សារ ហើយក្រុមប៉ូលិសទាំងនោះ បានយកសោមួយបាច់ ទៅចាក់ឆ្កឹះឆ្កៀលសោ.កម៉ូតូគេទាល់តែខូចអស់ រួចក៏អូសម៉ូតូនោះ យកមកទុកនៅប៉ុសិ៍្ដយាមផ្សារ បឹងឈូក ដើម្បីរង់ចាំធ្វើការផាកពិន័យពីម្ចាស់ម៉ូតូ... លុះពេលម្ចាស់ម៉ូតូមកឃើញសោ.កម៉ូតូខ្លួនខូចខ្ទេច ខ្ទីអស់បែបនេះ ស្រាប់តែសាប់ប៉ូលិសមួយរយៗឡើងប៉ូលិសស្លេកមុខ ដោយសារតែស្ដ្រីម្ចាស់ម៉ូតូខឹង ប៉ូលិសធ្វើឱ្យខូចសោ.ក ម៉ូតូគាត់ ហើយចង់ប្ដឹងប៉ូលិសនោះថា ប៉ុនប៉ងលួចម៉ូតូគាត់ ទើបប៉ូលិសសុខចិត្ដ ទទួលកំហុស ហើយមិនធ្វើការផាកពិន័យទេ ថែមទាំងធ្វើសោ.កឱ្យស្ដ្រីនោះវិញយ៉ាងតក់ក្រហល់បំផុត។

បើតាមសាក្សីជាច្រើនដែលឃើញហេតុការណ៍នេះនិយាយថា ដំបូងគេឃើញស្ដ្រីនោះ ជិះម៉ូតូម៉ាក ហុងដា សេ១០០ ពណ៌ខ្មៅ ស៊េរីឆ្នាំ២០០២ មកចតនៅលើផ្លូវខាងត្បូងផ្សារបឹងឈូក វេលាម៉ោងជិត៧ព្រឹក ថ្ងៃទី៣០ ឧសភា ហើយស្ដ្រីនោះដើរចូលផ្សារបាត់ លុះមួយសន្ទុះដើរចេញមកវិញ មិនឃើញម៉ូតូ ក៏ឆោឡោឡើងតែត្រូវគេប្រាប់ថា ឃើញប៉ូលិសយកសោមួយបាច់មកចាក់អូសយកទៅទុកនៅប៉ុសិ៍្ដ ដោយ ចោទថា (ស្ដ្រីម្ចាស់ម៉ូតូ) ចតនៅកន្លែងហាមឃាត់ ។ ភ្លាមនោះគេឃើញស្ដ្រីម្ចាស់ម៉ូតូដើរទៅកន្លែងប៉ុសិ៍្ដ ហើយត្រូវប៉ូលិសស្ដីបន្ទោសយ៉ាងចាស់ដៃ ដោយសារតែស្ដ្រីនោះចតម៉ូតូនៅកន្លែងហាមឃាត់ ។ សាក្សី បានបន្ដទៀតថា បន្ទាប់ពីត្រូវប៉ូលិសស្ដីបន្ទោសរួចហើយ ស្ដ្រីនោះបានឃើញសោ.កម៉ូតូគាត់ខូចខ្ទេចខ្ទីអស់ ក៏ចាប់ផ្ដើមខឹងឆេវតែម្ដង ហើយសាប់ប៉ូលិសមួយរយៗវិញថា ប៉ូលិសបានធ្វើឱ្យខូចសោ.កម៉ូតូគាត់ ដូច្នេះត្រូវតែធ្វើសងគាត់វិញ បើមិនធ្វើទេ គាត់នឹងប្ដឹងចោទថា ប៉ូលិសជាចោរលួចម៉ូតូគាត់ក៏បាន ព្រោះ ម៉ូតូគាត់ជាប់សោ.ក ហេតុអ្វីមិនលើកម៉ូតូគាត់មកតាមសំរួល បែរជាកាច់សោ.កម៉ូតូគាត់ខូចខ្ទេចខ្ទីអស់។ សាក្សីថា ពេលឮស្ដ្រីនោះគំរាមបែបនេះ ទំនងប៉ូលិសដឹងថា ខ្លួនខុសក៏លែងហ៊ានផាកពិន័យស្ដ្រីនោះ ហើយថែមទាំងយកម៉ូតូនោះទៅធ្វើសោ.កសងវិញយ៉ាងលឿនទៀតផង ។

ទាក់ទិននឹងការចោទប្រកាន់ខាងលើនេះ លោកអនុសេនីយ៍ទោរឹម រ៉េត មេប៉ូលិសសណ្ដាប់ធ្នាប់ផ្សារ បឹងឈូកបានប្រាប់កោះសន្ដិភាពថា ម៉ូតូនោះចតនៅកន្លែងហាមឃាត់ ហើយកំលាំរបស់លោកឃើញបានផ្លុំ កញ្ចែចំនួន៣ដង ដើម្បីសួររកម្ចាស់ តែមិនឃើញ ទើបកំលាំងរបស់លោកយកសោទៅចាក់សោ.ក ហើយ អូសយកមកទុកនៅប៉ុសិ៍្ដដើម្បីអប់រំម្ចាស់ កុំឱ្យចតនៅកន្លែងហាមឃាត់ទៀត ប៉ុន្ដែលោកមិនដឹងថា ខូច សោ.កម៉ូតូគេនោះទេ ហើយទោះជាយ៉ាងណាលោកបានធ្វើសងម្ចាស់ម៉ូតូនោះវិញហើយ។ កងសន្ដិសុខ ក្នុងសំលៀកបំពាក់ឈុតពណ៌ទឹកប៊ិចម្នាក់និយាយថា នៅតាមដងផ្លូវជុំវិញផ្សារបឹងឈូក មិនអនុញ្ញាត ឱ្យម៉ូតូ ឬកង់ចតទេ ព្រោះប៉ះពាល់សណ្ដាប់ធ្នាប់ ប៉ុន្ដែបើដាក់លក់ទំនិញលើទ្រូងផ្លូវនោះបានម៉ាសេរី ឱ្យតែបង់លុយ ។

ក្រុមអ្នករត់ម៉ូតូឌុបប្រចាំផ្សារបឹងឈូក បានរិះគន់ថា ការដាក់ស្លាកសញ្ញាហាមចតនោះ គ្រាន់តែជាលេស ឆ្លៀតឱកាសរកលុយតែប៉ុណ្ណោះ ។ បើនិយាយពីរឿងខូចសណ្ដាប់ធ្នាប់វិញ គេសូមសួរថា កន្លែងដែល ប៉ូលិសបើកឱ្យគេដាក់ទំនិញគ្រប់ប្រភេទលក់រញ៉េរញ៉ៃពេញលើថ្នល់ និងយកថ្នល់ហ៊ុមរបងធ្វើកន្លែងផ្ញើ ម៉ូតូកង់ស្ទើររកកន្លែងដើរគ្មាននោះ ម៉េចក៏ប៉ូលិសមិនថាប៉ះពាល់សណ្ដាប់ធ្នាប់លើផ្លូវសាធារណៈផងទៅ? ហេតុអ្វីក៏ប៉ូលិសតាមរករឿងម៉ូតូ១គ្រឿង ឬ២គ្រឿងដែលចតក្បែរអ្នកលក់មួយភ្លែតៗនោះទៅវិញ? ឬក៏ ប៉ូលិសចង់បានប្រាក់៥ពាន់រៀលលើការផាកពិន័យម៉ូតូដែលចតកន្លែងហាមឃាត់នោះ?

ក្រុមអ្នករត់ម៉ូតូឌុបទាំងនោះរិះគន់បន្ថែមទៀតថា កន្លងមក គេតែងឃើញប៉ូលិសសណ្ដាប់ធ្នាប់ ទាំងនោះ មានសោមួយបាច់ដើរចាក់សោ.កម៉ូតូណា ដែលចតនៅកន្លែងហាមឃាត់ រួចអូសយកមកធ្វើការផាកពិន័យ ម្ចាស់ម៉ូតូនោះ៥ពាន់រៀល ចំណែកអ្នកលក់ដូរនៅលើទ្រូងថ្នល់ត្រូវបង់លុយតាមកន្លែងតូច ឬ ធំ... ដូច្នេះ ហើយ បើអ្នកលក់ចង់យកទំនិញភោគផលមកដាក់លក់ពេញថ្នល់យ៉ាងណា ក៏អត់ទើសភ្នែកប៉ូលិសដែរ ឱ្យតែបង់លុយ តែបើម៉ូតូចតនៅកន្លែងនោះមួយភ្លែតក៏ដោយ ម្ចាស់ដើរចេញមិនទាន់ផង ប៉ូលិសយក សោមករុកឆ្កៀលសោ.កម៉ូតូនោះអូសយកទៅប៉ុសិ៍្ដបាត់ ។

ឆ្លើយតបទៅនឹងការរិះគន់របស់អ្នករត់ម៉ូតូឌុបលោកស័ក្ដិ២ រឹម រ៉េត បានបំភ្លឺឱ្យដឹងថា ផ្សារបឹងឈូក ជាផ្សារវិនិយោគរបស់ក្រុមហ៊ុនឯកជន ដែលមានលោកថៅកែឈុនជាអ្នកគ្រប់គ្រង ដូច្នេះគាត់មានសិទ្ធិ យកថ្នល់ឱ្យគេដាក់លក់អីវ៉ាន់ ឬធ្វើកន្លែងផ្ញើកង់ ម៉ូតូ អ៊ីចឹងហើយ ហើយការធ្វើបែបនេះ ក៏មានការ អនុញ្ញាតពីលោកចៅហ្វាយខេត្ដផងដែរ មិនមែនលោកជាអ្នកធ្វើដោយចិត្ដឯងនោះទេ ។

Labels: ចរាចរណ៍, សណ្ដាប់ធ្នាប់

By Hang Meas
On Friday, June 1, 2007
At 10:49 AM
Comments :

កូនមេគយកំពតបើកឡង់គ្រីស្ស័រដេញគ្នាបុកផ្អើលពេញក្រុង

រាជធានីភ្នំពេញ ៖ រថយន្ដឡង់គ្រីស្ស័រមួយគ្រឿងពណ៌សំបកឪឡឹក ពាក់ស្លាកលេខ ភ្នំពេញ 2F 6847 ត្រូវ ប៉ូលិសប៉ុស្ដិ៍រដ្ឋបាលចតុមុខឃាត់ទុកនៅតាមផ្លូវលេខ២២៨ ស្ថិតក្នុងសង្កាត់ចតុមុខ ខណ្ឌដូនពេញ ក្រុង ភ្នំពេញ កាលពីវេលាម៉ោង១១និង៤០នាទីព្រឹកថ្ងៃទី៣១ ខែឧសភា ២០០៧ បន្ទាប់ពីរថយន្ដនោះ បើក ប្រដេញគ្នាធ្វើឱ្យជ្រុលទៅបុកស្ដ្រីម្នាក់ និងម៉ូតូ១គ្រឿងបន្ទាប់មកបុករថយន្ដកាមរី១គ្រឿងទៀត ហើយ ព្យាយាមបើកគេចទាំងបែកកង់ផ្នែកខាងមុខ។ បន្ទាប់ពីចាប់រថយន្ដឡង់គ្រីស្ស័រនោះបាន ទើបដឹងថា អ្នកបើកបរជាកូនលោកមេគយខេត្ដកំពត ។

អ្នករត់ម៉ូតូឌុបម្នាក់ដែលឃើញហេតុការណ៍បានប្រាប់សមត្ថកិច្ចថា គាត់ឃើញរថយន្ដម៉ាកឡង់គ្រីស្ស័រនោះ ដែលបើកដោយយុវជនអាយុប្រហែលក្រោម២០ឆ្នាំ ប្រដេញគ្នាជាមួយរថយន្ដកាមរីឆ្លាមតាមបណ្ដោយវិថី ព្រះសុធារស ពីត្បូងទៅជើង។ ពេលប្រដេញគ្នាទៅដល់ម្ដុំនាគបាញ់ទឹក រថយន្ដឡង់គ្រីស្ស័រជ្រុលចង្កូត ទៅបុកម៉ូតូមួយគ្រឿងម៉ាកស៊ុយហ្ស៊ុយគីស្មាស់ ពណ៌ខ្មៅ បន្ទាប់មកជ្រុលទៅបុកស្ដ្រីជាអ្នកបោសសំរាម ម្នាក់បណ្ដាលឱ្យដួលបែកក្បាលយ៉ាងដំណំ។ ក្នុងពេលព្យាយាមបើកគេចរថយន្ដដដែលនោះ បានបុករថយន្ដ កាមរីមួយគ្រឿងទៀត រហូតបែកកង់មុខខាងឆ្វេង ទៅមុខលែងរួច នៅលើផ្លូវលេខ២២៨ ស្ថិតក្នុងសង្កាត់ ចតុមុខ ហើយត្រូវសមត្ថកិច្ចឃាត់ទុកដើម្បីឱ្យប៉ូលិសចរាចរណ៍ជើងគោកក្រុងភ្នំពេញដោះស្រាយ ។

ប៉ូលិសនិយាយថា ម៉ូតូដែលត្រូវរថយន្ដនោះបុកបណ្ដាលឱ្យខូចខាត ម្ចាស់ឈ្មោះទេព តុលា ភេទប្រុស អាយុ២៣ឆ្នាំ រីឯស្ដ្រីបោសសំរាមរងរបួសក្បាលឈ្មោះសុខ សុវ៉ែន អាយុ៤៥ឆ្នាំ ស្នាក់នៅផ្ទះជួល ក្នុងសង្កាត់បឹងកក់២ ខណ្ឌទួលគោក ។ ដោយឡែកម្ចាស់រថយន្ដកាមរីមិនទាន់ស្គាល់ឈ្មោះទេ ។

ប្រភពដដែលប្រាប់ថា អ្នកបើករថយន្ដឡង់គ្រីស្ស័រឈ្មោះជា សម្បត្ដិ អាយុ១៧ឆ្នាំ ស្នាក់នៅសង្កាត់ ផ្សារដើមថ្កូវ ខណ្ឌដូនពេញ ក្រុងភ្នំពេញ ជានិស្សិតសិក្សានៅក្រៅប្រទេស។ គេប្រាប់សមត្ថកិច្ចថា លោក សំ សុខា ប្រធានសាខាគយប្រចាំខេត្ដកំពត ជាឪពុករបស់គេ ។

មន្ដ្រីប៉ុស្ដិ៍រដ្ឋបាលស្រះចកនិយាយថា គ្មានមន្ដ្រីប៉ូលិសណាម្នាក់ដឹងថា រថយន្ដឡង់គ្រីស្ស័រនោះបើកប្រណាំង គ្នាឡើយ ព្រោះរវល់ចុះល្បាតនៅគោលដៅផ្សេង ។
នៅព្រឹកថ្ងៃដដែល រថយន្ដនោះត្រូវសមត្ថកិច្ចបញ្ជូនទៅការិយាល័យចរាចរណ៍ជើងគោក ក្រុងភ្នំពេញ ដើម្បីដោះស្រាយ។

Labels: ចរាចរណ៍, សណ្ដាប់ធ្នាប់, សន្តិសុខ

By Hang Meas
On
At 10:40 AM
Comments :

បុរសម្នាក់និងស្ដ្រីម្នាក់ស្លាប់ដោយចរាចរណ៍ដោយឡែកពីគ្នា

រាជធានីភ្នំពេញ ៖ បុរសម្នាក់ និងស្ដ្រីម្នាក់ បានត្រូវរថយន្ដពណ៌ត្រេអ៊ីកិនស្លាប់ក្នុងគ្រោះថ្នាក់ចរាចរដោយ ឡែកពីគ្នាកាលពីថ្ងៃទី២៩ ឧសភា នៅក្នុងខណ្ឌឫស្សីកែវ ហើយមនុស្សចំនួន២នាក់ដែលជាអ្នក បើកបររថយន្ដត្រូវបានឃាត់ខ្លួន ។

តាមព័ត៌មានច្បាស់ការណ៍ឱ្យដឹងថា នៅវេលាម៉ោង៤ និង១០នាទីរសៀលថ្ងៃទី២៩ ឧសភា មានគ្រោះថ្នាក់ ចរាចរមួយកើតឡើងនៅមុខភោជនីយដ្ឋានតាតាតាមផ្លូវជាតិលេខ6A ក្នុងសង្កាត់ជ្រោយចង្វា ខណ្ឌ ឫស្សីកែវ ។ ក្នុងហេតុការណ៍នេះបណ្ដាលឱ្យបុរសម្នាក់ជិះម៉ូតូម៉ាកហុងដា C125 ស៊េរី២០០៧ ពណ៌ខ្មៅ ដែលបើកវ៉ារថយន្ដមួយគ្រឿងបានជ្រុលទៅបុករថយន្ដធំមួយគ្រឿងម៉ាក FUSO ក្នុងទិសដៅបញ្ច្រាស គ្នាហើយស្លាប់បាត់បង់ជីវិតនៅនឹងកន្លែង ។ បុរសដែលស្លាប់នេះត្រូវប៉ូលិសឱ្យដឹងថា ឈ្មោះសាន់ សាន អាយុ២៦ឆ្នាំ មានទីលំនៅភូមិក្ដីចាស់ ឃុំបាក់ខែង ស្រុកមុខកំពូល ខេត្ដកណ្ដាល ។

តាមមន្ដ្រីប៉ូលិសឱ្យដឹងថា ម៉ូតូរបស់ជនរងគ្រោះពាក់ស្លាកលេខភ្នំពេញ 1C-2477 ធ្វើដំណើរតាមផ្លូវ ជាតិលេខ6A ក្នុងទិសដៅពីជើងទៅត្បូងសំដៅចូលក្រុងភ្នំពេញ លុះពេលមកដល់មុខភោជនីយដ្ឋានតាតា ម៉ូតូបានបើកវ៉ារថយន្ដមួយគ្រឿង ហើយក៏បានជ្រុលទៅបុករថយន្ដម៉ាក FUSO ពណ៌ត្រេអ៊ី គ្មានស្លាក លេខ ក្នុងទិសដៅបញ្ច្រាសគ្នាបណ្ដាលឱ្យរថយន្ដនោះកិនស្លាប់នៅនឹងកន្លែង ។ តាមព័ត៌មានឱ្យដឹងទៀតថា ក្រោយពេលដឹងថា បុកមនុស្សស្លាប់ហើយ រថយន្ដក៏បានបើករត់ តែត្រូវបានអ្នករត់ម៉ូតូឌុប និងសមត្ថកិច្ច ខណ្ឌឫស្សីកែវដេញតាមចាប់បាននៅចំណុចស្ពានទី៨ឃុំបាក់ខែង និងធ្វើការឃាត់ខ្លួនអ្នកបើកបរ ឈ្មោះ ហួ ម៉ាឡា ភេទប្រុស អាយុ២៨ឆ្នាំ មានទីលំនៅភូមិស្វាយមាស ឃុំសំរោងជ័យ ស្រុកជើងព្រៃ ខេត្ដកំពង់ចាម ហើយប្រគល់ទៅឱ្យប៉ូលិសចរាចរក្រុងភ្នំពេញ ។

ដោយឡែកមានគ្រោះថ្នាក់ចរាចរមួយទៀតកាលពីវេលាម៉ោង៥និង៣០នាទីល្ងាច ថ្ងៃទី២៩ ឧសភា ដោយ ស្ដ្រីម្នាក់ត្រូវបានរថយន្ដដឹកដីពណ៌ត្រេអ៊ីពាក់ស្លាកលេខ ខ.ម កិនស្លាប់នៅនឹងកន្លែង នៅមុខផ្ទះលេខ៤៦ ផ្លូវលេខ៥៩៨ ភូមិទួលគោក សង្កាត់ទួលសង្កែ ខណ្ឌឫស្សីកែវ ខណៈពេលស្ដ្រីរូបនេះ កំពុងអង្គុយ ហូបពងទា និងសាច់គោអាំង ហើយរថយន្ដដឹកដីបើកបោះពួយបុកចូលផ្ទះ និងកិនស្ដ្រីនោះស្លាប់ នៅនឹងកន្លែងតែម្ដង ។

ស្ដ្រីរងគ្រោះឈ្មោះរ៉ុង ចិន្ដា អាយុ១៩ឆ្នាំ ជាកម្មការិនីរោងចក្រកាត់ដេរ មានទីលំនៅ ភូមិព្រែកក្រូច ឃុំពើស១ ស្រុកក្រូចឆ្មារ ខេត្ដកំពង់ចាម ។ ចំណែករថយន្ដបង្កម៉ាកនីស្សាន់ បើកបរដោយឈ្មោះអៀង ខេមរិទ្ធ ភេទប្រុស អាយុ២៥ឆ្នាំ មានទីលំនៅក្នុងឃុំជយោ ស្រុកចំការលើ ខេត្ដកំពង់ចាម ត្រូវសមត្ថកិច្ច ឃាត់ខ្លួន ឯម្ចាស់រថយន្ដឈ្មោះឆន ម៉ាច ភេទស្រី អាយុ៤៥ឆ្នាំ មានទីលំនៅផ្ទះលេខ១០ ផ្លូវលេខ២៨៩ សង្កាត់បឹងកក់ទី១ ខណ្ឌទួលគោក ។ តាមមន្ដ្រីប៉ូលិសឱ្យដឹងថា នៅមុនពេលកើតហេតុរថយន្ដបង្ក បានធ្វើដំណើរតាមផ្លូវលេខ៣៥៥ ក្នុងទិសដៅពីត្បូងទៅជើង លុះពេលមកដល់ផ្លូវបំបែក រថយន្ដបានបត់ ទៅខាងស្ដាំដៃតាមផ្លូវលេខ៥៩៨ តែបែរជាជ្រុលចង្កូតទៅខាងឆ្វេងដៃបុកចូលផ្ទះលេខ៤៦ បណ្ដាលឱ្យស្ដ្រី ម្នាក់ដែលអង្គុយហូបពងទា និងសាច់គោអាំងមុខផ្ទះនោះត្រូវរថយន្ដកិនស្លាប់នៅនឹងកន្លែង ។ នៅក្នុង ហេតុការណ៍គ្រោះថ្នាក់ចរាចរនេះ បណ្ដាលឱ្យម៉ូតូធុនC100 កូរ៉េពណ៌ក្រហមមួយគ្រឿងដែលចត នៅមុខ ផ្ទះខូចខាតធ្ងន់ ហើយគ្រែ និងសំយាបផ្ទះក៏ត្រូវខូចខាតផងដែរ ។

ទាក់ទិននឹងគ្រោះថ្នាក់នេះ មន្ដ្រីប៉ូលិសឱ្យដឹងថា ដោយសារតែរថយន្ដហ្វ្រាំងមិនស៊ីក៏ជ្រុលចង្កូតឡើង ចិញ្ចើមផ្លូវបុកចូលផ្ទះ និង កិនមនុស្សស្លាប់តែម្ដង ។

Labels: ចរាចរណ៍, សណ្ដាប់ធ្នាប់, សន្តិសុខ

By Hang Meas
On Thursday, May 31, 2007
At 10:37 AM
Comments :

ប៉ូលិសចរាចរណ៍ត្រួតពិនិត្យមធ្យោបាយធ្វើដំណើរមិនស្របច្បាប់

ក្រុងព្រះសីហនុ ៖ ប៉ូលិសចរាចរណ៍ក្រុងព្រះសីហនុ ដឹកនាំដោយលោកវរសេនីយ៍ត្រី ព្រហ្ម ពៅ ប្រធាន ការិយាល័យចរាចរណ៍ផ្លូវគោក នៃស្នងការដ្ឋានក្រុងបានដាក់កម្លាំងនៅតាមផ្លូវសាធារណៈ ក្នុងទីប្រជុំជន ក្រុង ដើម្បីត្រួតពិនិត្យរកមើលបទល្មើសនៅលើយានយន្ដគ្រប់ប្រភេទ ទាំងរថយន្ដ និងម៉ូតូ ដែលការត្រួត ពិនិត្យនេះចាប់ផ្ដើមនៅថ្ងៃទី២៨ ខែឧសភា ។

មន្ដ្រីប៉ូលិសចរាចរណ៍ដែលធ្វើការនេះឱ្យដឹងថា ការត្រួតពិនិត្យគឺផ្ដោតរកមើលបទល្មើសផ្សេងៗមាន ដូចជា ការបំពាក់ស្លាកលេខពុំត្រឹមត្រូវ យានយន្ដគ្មានស្លាកលេខ យានយន្ដពាក់ស្លាកលេខ ន.ប ខុសគោលការណ៍ ព្រមទាំងហាមឃាត់រថយន្ដដឹកកុងតឺន័រធំៗចូលក្រុង ដែលផ្ទុយនឹងសេចក្ដីជូនដំណឹងរបស់សាលាក្រុង ព្រះសីហនុ ។

មន្ដ្រីប៉ូលិសចរាចរណ៍រូបនោះឱ្យដឹងទៀតថា សមត្ថកិច្ចក៏ចាត់វិធានការផងដែរចំពោះជនបរទេសដែលជួល យានយន្ដបើកបរដោយខ្លួនឯងបង្កភាពអនាធិបតេយ្យក្នុងក្រុង។ មហាជននៅក្រុងព្រះសីហនុបានអបអរ សាទរចំពោះការហាមឃាត់ជនបរទេសមិនឱ្យបើកម៉ូតូ ឬយានយន្ដផ្សេងទៀតដោយខ្លួនឯងនៅក្នុងក្រុង ព្រោះថាកន្លងមកមានជនបរទេសមួយចំនួនជិះម៉ូតូរោទ៍ម៉ាស៊ីន រំខានការរស់នៅរបស់ប្រជាពលរដ្ឋ ទាំង ពេលយប់ និងពេលថ្ងៃ ។ ចំពោះអ្នកខ្លះទៀតបើកបរលឿនបង្កឱ្យមានគ្រោះថ្នាក់ចរាចរណ៍ជាញឹកញាប់។

Labels: ចរាចរណ៍, សណ្ដាប់ធ្នាប់, សន្តិសុខ

By Hang Meas
On Wednesday, May 30, 2007
At 10:10 AM
Comments :

Featured news

A Casino Night (also called Vegas Nights, Las Vegas Night, Monte Carlo Night) is an entertainment event with a casino theme. Casino Nights can be tied to a fundraiser to raise money for a specific cause (such as cancer research, community services, youth organizations, etc.) by having each participant purchase a ticket for the event. Each participant receives a specific amount of fun money that can be used to purchase gaming chips at the gambling tables. When the participants have lost their chips they may purchase additional fun money, increasing the amount of funds raised for the charity. The participants engage in various casino games (such as blackjack, roulette, baccarat, craps, poker, wheel of fortune, etc.) in the attempt to accumulate the largest amount of gaming chips. At the end of the evening the participant who managed to win the most chips may receive a prize, which is often awarded by a representative of the charity. When a casino night party is just for entertainment it usually works in the same way as a fundraiser casino night except that guests are given the fun money free of charge. Casino Nights function strictly as entertainment events with no real monetary gambling involved.

Cambodia News

កូនមន្ដ្រីសំបូរលុយបាញ់គ្នានៅមុខរដ្ឋសភាថ្មី

បុរសជនជាតិកូរ៉េស្រវឹងដល់.កបើកអាក្ដាមត្របាក់ទ្វារផ្ទះគេទាំងយប់

យុវជនជំទង់ម្នាក់ត្រូវរថយន្ដកិនស្លាប់យ៉ាងអាណោចអាធ័ម

រថយន្ដកាមរីបុករះម៉ូតូទាំងព្រឹកអស់៥គ្រឿងនិងរបួសធ្ងន់ម្នាក់

ខ្យល់និងព្រះពិរុណមួយមេធំនៅភ្នំពេញរំលំពោធិ៍មួយដើមទាំងឫស

ឆក់ខ្សែ.កជិះម៉ូតូរត់បុកគេដួលប្រកាច់២នាក់ជាប់ខ្នោះដៃលើគ្រែពេទ្យ

ប៉ូលិសយីអ៊ុនដាក់ទាំងព្រឹក ប្រុងផាករកកាហ្វេគុយទាវបែរជាសងថ្លៃខូចសោម៉ូតូ

កូនមេគយកំពតបើកឡង់គ្រីស្ស័រដេញគ្នាបុកផ្អើលពេញក្រុង

បុរសម្នាក់និងស្ដ្រីម្នាក់ស្លាប់ដោយចរាចរណ៍ដោយឡែកពីគ្នា

ប៉ូលិសចរាចរណ៍ត្រួតពិនិត្យមធ្យោបាយធ្វើដំណើរមិនស្របច្បាប់

Featured news

Recent Posts

Recent Comments

Archives

Blogroll

Searching

Subscribe & Bookmark

Readers's Community