ស្រីស្នេហ៍ខារ៉ាអូខេតេហៅទៅច្រៀង..បើកម៉ូតូបុកឡានស្លាប់៤នាក់
ខេត្ដស្វាយរៀង ៖ បុរស៣នាក់បានស្លាប់ទាំងអស់គ្នានៅនឹងកន្លែង និងម្នាក់ទៀតបានស្លាប់ ពេលនាំ ទៅដល់មន្ទីរពេទ្យ ដែលការស្លាប់នេះដោយសារជិះម៉ូតូទៅបុករថយន្ដធុនធំពីក្រោយមួយទំហឹង ។ ហេតុការណ៍គួរឱ្យរន្ធត់នេះកើតឡើងកាលពីវេលាម៉ោង៩ និង៥នាទីយប់ ថ្ងៃទី៣១ ឧសភា កន្លងមក នៅលើផ្លូវជាតិលេខ១ ស្ថិតនៅភូមិធ្មល់ ឃុំចេក ស្រុកស្វាយជ្រំ ។
លោកវរសេនីយ៍ត្រីសៅ សុគន្ធ នាយការិយាល័យនគរបាលចរាចរខេត្ដបានឱ្យដឹងថា ជនរងគ្រោះទី១-ឈ្មោះ គុជ វុទ្ធី អាយុ១៨ឆ្នាំ បែកក្បាលធ្លាយខួរ, ២-ឈ្មោះទេព ម៉ៅ អាយុ២០ឆ្នាំ បែកក្បាលធ្លាយខួរ និងធ្លាយពោះវៀនចេញមកក្រៅ, ៣-ឈ្មោះភី អាយុ ២១ឆ្នាំ បែកក្បាលធ្លាយខួរ អ្នកទាំង៣បានស្លាប់ បាត់បង់ជីវិតនៅនឹងកន្លែង និងម្នាក់ទៀតឈ្មោះហួត តូរីស អាយុ១៩ឆ្នាំ បែកក្បាលរងរបួសយ៉ាងធ្ងន់ធ្ងរ ហើយត្រូវក្រុមគ្រួសារដឹកទៅសង្គ្រោះនៅមន្ទីរពេទ្យខេត្ដ ក៏ស្លាប់បាត់បង់ជីវិតនៅវេលាម៉ោង៣ ទៀបភ្លឺ ចូលថ្ងៃទី១ មិថុនា ហើយបច្ចុប្បន្នឪពុកម្ដាយបានយកសពទៅបូជានៅវត្ដតាសួស ។ លោកសៅ សុគន្ធ បន្ដទៀតថា បើតាមព័ត៌មានក្រៅផ្លូវការនិយាយថា មុនពេលកើតហេតុជនរងគ្រោះទាំង៤នាក់ខាងលើ បានផឹកស្រាជាមួយមិត្ដភក្ដិនៅភូមិថ្មស ឃុំតាសួស លុះដល់ម៉ោងជិត៩យប់ ក៏មានស្រីស្នេហ៍ជានារី ខារ៉ាអូខេ នៅភូមិចុងព្រែក ឃុំស្វាយរៀង បានទូរស័ព្ទហៅទៅច្រៀងខារ៉ាអូខេកំសាន្ដ ទើបជនរងគ្រោះ ទាំង៤នាក់ ក៏នាំគ្នាឡើងជិះម៉ូតូម៉ាក MCT សេ១១០ ពណ៌ក្រហម ដោយឈ្មោះគុជ វុទ្ធី ជាអ្នកបើក ក្នុងស្ថានភាពស្រវឹងជោក ។ ពេលមកដល់កន្លែងកើតហេតុក៏បុករថយន្ដ១គ្រឿងម៉ាក ហ៊ីណូ ចំណុះ៦តោន ពណ៌ទឹកប្រាក់ពាក់ស្លាកលេខ ប ០១៣៨ ភព៣ ចតនៅមុខការ៉ាស់រថយន្ដលើចិញ្ចើមថ្នល់ខាងស្ដាំ បែរមុខមកទិសខាងកើត (រថយន្ដនោះខូចឈប់បំរុងចូលជួសជុល) ហើយក៏មានដាក់ភ្លើងអំពូលម៉ែត នៅលើទ្រុងពីក្រោយផងដែរ តែទំនងជាជនរងគ្រោះស្រវឹងជោក បើកបរក្នុងល្បឿនលឿន និងជិះឌុបគ្នា ដល់ទៅ៤នាក់ ពិបាកបើកបរ ឬក៏ភ្នែកបើកមិនរួចមើលមិនឃើញពីចម្ងាយក៏បុករថយន្ដពីក្រោយ រមូលចូលក្រោមគូទរថយន្ដខាងឆ្វេង បុកចំកង់សាគួរពីក្រោមរថយន្ដដាច់ខ្ទាតចេញ៣ម៉ែត្រ រីឯម៉ូតូរួញបត់ ក្បាលទៅទិសខាងជើង បោកក្បាលជនរងគ្រោះស្លាប់៣នាក់នៅនឹងកន្លែងភ្លាមៗគរលើគ្នា រីឯម្នាក់ទៀត ត្រូវក្រុមគ្រួសារដឹកទៅសង្គ្រោះនៅមន្ទីរពេទ្យខេត្ដក៏បានស្លាប់បាត់បង់ជីវិតដែរ ។
គ្រោះថ្នាក់នេះបណ្ដាលមកពីការផឹកស្រា ស្រវឹងជោក ហើយជិះម៉ូតូហួសចំណុះ និង លឿនពេក ទើប បណ្ដាលឱ្យមានគ្រោះថ្នាក់ ហើយបើតាមអ្នកនៅជិតកន្លែងកើតហេតុប្រាប់ឱ្យដឹងថា ក្រោយពីកើតហេតុ បាន២០នាទី គេបានឃើញនាងៗខារ៉ាអូខេ មកមើលសាកសព រួចយំអាណិតអាសូរដល់គូស្នេហ៍ រួចនិយាយ ថា មិនគួរសោះ ។ សាកសពជនរងគ្រោះត្រូវឪពុកម្ដាយយកទៅបូជានៅវត្ដតាសួស រីឯរថយន្ដ និង ម៉ូតូត្រូវប៉ូលិសចរាចរខេត្ដ យកមករក្សាទុកនៅការិយាល័យចរាចរណ៍ដើម្បីធ្វើការដោះស្រាយ ។
Labels: សណ្ដាប់ធ្នាប់, សន្តិសុខ
for this post
Leave a Reply