ទូរទស្សន៍កូរ៉េ SBS ថតល្ខោនវីដេអូនៅប្រទេសកម្ពុជាលើកដំបូង
រាជធានីភ្នំពេញ ៖ កាលពីថ្ងៃទី៤ មិថុនា ឆ្នាំ២០០៧ ផលិតកម្ម STARMAX របស់ស្ថានីយទូរទស្សន៍ SBS នៃសាធារណរដ្ឋកូរ៉េ បានមកថតល្ខោនវីដេអូរឿង “មធ្យោបាយស្វែងរកអ្នកជិតខាងល្អឥតខ្ចោះ” ជាលើក ដំបូងនៅកម្ពុជា។ រឿងនេះផលិតសំរាប់ចាក់ផ្សាយតាមកញ្ចក់ទូរទស្សន៍ SBS ដោយមានការសំដែងរួមគ្នា រវាងតារាភាពយន្ដកូរ៉េ និងតារាកម្ពុជាយើង ។
លោកយិន សាំងហេង អ្នកគ្រប់គ្រងការថតនៅកម្ពុជាឱ្យដឹងថា ល្ខោនវីដេអូរបស់ស្ថានីយទូរទស្សន៍ សាធារណរដ្ឋកូរ៉េដែលថតនៅកម្ពុជាជាលើកទី១នេះ គឺរៀបចំថតនៅទីក្រុងភ្នំពេញ ក្រុងព្រះសីហនុ និងប្រាសាទអង្គរវត្ដ ដើម្បីបង្ហាញឱ្យប្រជាជនកូរ៉េបានឃើញបានស្គាល់ ។ វាជាមោទនភាពថ្មីមួយរបស់ កម្ពុជាក្នុងឆ្នាំ២០០៧នេះ ដែលប្រទេសកូរ៉េបានមកថតល្ខោនវីដេអូសំរាប់ចាក់ផ្សាយតាមទូរទស្សន៍របស់ ខ្លួន ។ រឿង “មធ្យោបាយស្វែងរកអ្នកជិតខាងល្អឥតខ្ចោះ” ជាស្នាដៃរបស់លោកជុង ជីវូ ដែលជាអ្នក និពន្ធល្បីឈ្មោះនៅប្រទេសកូរ៉េ និងដឹកនាំរឿងដោយលោកចូ ណាំហ្គូក ជាអ្នកដឹកនាំរឿងល្បីឈ្មោះ នៅប្រទេសកូរ៉េ ។
លោកយិន សាំងហេង ឱ្យដឹងថា តាមអ្នកគ្រប់គ្រងការផលិតរបស់កូរ៉េឱ្យដឹងថា រឿង “មធ្យោបាយស្វែង រកអ្នកជិតខាងល្អឥតខ្ចោះ” ចូលរួមសំដែងដោយតារាល្បីឈ្មោះ មកពីប្រទេសកូរ៉េជាច្រើនរូបដូចជា លោក គីម សឿងវូ និងលោកស៊ុន ហឿនជូ ជាដើម។ ជាពិសេសកញ្ញាពៅ ធាវី ជានារីខ្មែរដែលទទួល បានតំណែងជាស្រីស្អាតប្រចាំឆ្នាំ២០០៦ របស់ស្ថានីយទូរទស្សន៍ CTN បានចូលរួមសំដែងជាតួឯក ឈ្មោះនាងផ្កាឈូកផងដែរ ។
រឿង“មធ្យោបាយស្វែងរកអ្នកជិតខាងល្អឥតខ្ចោះ” និទានពីស្នេហាឆ្លងដែនរវាងកំលោះកូរ៉េ និងក្រមុំកម្ពុជា ក្នុងនោះបង្ហាញពីការធ្វើទេសចរណ៍នៅប្រាសាទអង្គរវត្ដ ទីក្រុងភ្នំពេញ ព្រះបរមរាជវាំង និងនៅក្រុង ព្រះសីហនុដ៏ល្អត្រកាល ។
លោកយិន សាំងហេង ឱ្យដឹងថា រឿងមធ្យោបាយស្វែងរកអ្នកជិតខាងល្អឥតខ្ចោះ នឹងចាក់ផ្សាយតាម កញ្ចក់ទូរទស្សន៍ SBS របស់សាធារណរដ្ឋកូរ៉េចាប់ពីថ្ងៃទី១១ ខែ កក្កដា រហូតដល់ថ្ងៃទី១៣ កញ្ញា ឆ្នាំ២០០៧ វេលាម៉ោង៩ និង៥៥នាទីដល់ម៉ោង១១ និង៥នាទីយប់ រៀងរាល់ថ្ងៃពុធ និងថ្ងៃព្រហស្បតិ៍។ ស្ថានីយទូរទស្សន៍នេះបណ្ដាប្រទេសនៅអាស៊ីមួយចំនួនអាចមើលឃើញ។
ក្រុមផលិតករកូរ៉េបញ្ជាក់ថា ទោះបីការថតនៅកម្ពុជាជួបប្រទះការលំបាកយ៉ាងណាក៏ដោយ ក៏ខ្លួននឹង ព្យាយាមផលិតរឿងល្ខោនវីដេអូ ដែលចូលរួមសំដែងរួមគ្នារវាងតារាកូរ៉េ និងកម្ពុជាជាលើកទី១នេះ ឱ្យទទួលបានជោគជ័យ ។ តាមរយៈស្នាដៃនេះនឹងធ្វើឱ្យទស្សនិកជននៅក្នុងតំបន់អាស៊ីមើលឃើញ រូប ភាពថ្មីមួយរបស់កម្ពុជាដែលប្រទេសនេះមានទេសភាពល្អស្រស់ត្រកាល មានប្រជាពលរដ្ឋចិត្ដល្អ និង មានសក្ដានុពលធំធេងសំរាប់ការអភិវឌ្ឍន៍ ហើយគេនឹងចាប់អារម្មណ៍មកទស្សនាកំសាន្ដមិនខាន ។
for this post
Leave a Reply