សិស្សស្ទាវសន្ធរម៉ុកតាមសងសឹកសត្រូវដល់ជម្ពូវ័ន
រាជធានីភ្នំពេញ ៖ ក្រុមយុវជនស្ទាវ១២នាក់ត្រូវបានកំលាំងប៉ូលិសប៉ុសិ៍្ដសង្កាត់ត្រំញំងក្រសាំង សហការ ជាមួយប៉ុសិ៍្ដសំរោងក្រោម និងកំលាំងប៉ូលិសខណ្ឌដង្កោ ព្រមទាំងប្រជាពលរដ្ឋធ្វើការចាប់ខ្លួនបាន ខណៈ ដែលពួកគេប្រដាប់ដោយដាវសាមូរ៉ៃ និងកាំបិតក្នុងដៃជិះម៉ូតូដើររកគូទំនាស់ដើម្បីសងសឹករំសាយគំនុំ កាលពីប៉ុន្មានថ្ងៃមុន ។ ហេតុការណ៍នេះបានកើតឡើងកាលពីវេលាម៉ោង៩ និង៣០នាទីព្រឹកថ្ងៃទី២៨ ឧសភា ២០០៧ នៅតាមផ្លូវក្នុងភូមិតឹក្ខបញ្ញោសង្កាត់សំរោងក្រោម ខណ្ឌដង្កោ ក្រុងភ្នំពេញ ។
ក្រុមយុវជនស្ទាវទាំង១២នាក់នេះ ១- ឈ្មោះគង់ សុគន្ធ អាយុ១៨ឆ្នាំ មានទីលំនៅផ្ទះលេខ១១០ ផ្លូវលេខ១៨៦ សង្កាត់ទឹកល្អក់ទី៣ ខណ្ឌទួលគោក ក្រុងភ្នំពេញ ២-ឈ្មោះ ជឹម វាសនា អាយុ២២ឆ្នាំ មានទីលំនៅផ្ទះលេខ26B ផ្លូវលេខ១៣៤ សង្កាត់ផ្សារដេប៉ូទី២ ខណ្ឌទួលគោក ៣-ឈ្មោះអ៊ូ វីរៈ អាយុ ២១ឆ្នាំ មានទីលំនៅផ្ទះលេខ9Eo ផ្លូវលេខ២៧១ សង្កាត់បឹងសាឡាង ខណ្ឌទួលគោក ៤-ឈ្មោះមុន្នី សីហា អាយុ១៧ឆ្នាំ មានទីលំនៅផ្ទះលេខ៩៧ពែ១ ផ្លូវលេខ១៥៦ សង្កាត់ផ្សារដេប៉ូទី១ ខណ្ឌទួលគោក ៥-ឈ្មោះ ទុយ ដាលីន អាយុ១៧ឆ្នាំ មានទីលំនៅផ្ទះលេខ ៤៨៦ ផ្លូវលេខ២៧១ សង្កាត់បឹងសាឡាង ខណ្ឌទួលគោក ៦-ឈ្មោះង៉ែត សុគន្ធ អាយុ ១៧ឆ្នាំ មានទីលំនៅផ្ទះលេខ២៨ ផ្លូវលេខ ២០២ ខណ្ឌទួលគោក ៧-ឈ្មោះអ៊ូ សុវណ្ណា វីរៈ អាយុ១៧ឆ្នាំ មានទីលំនៅសង្កាត់ផ្សារដើមគរ ខណ្ឌទួលគោក ៨-ឈ្មោះបូក ត្រា អាយុ១៧ឆ្នាំ មានទីលំនៅផ្ទះលេខ138B ផ្លូវលេខ២៣០ សង្កាត់បឹងសាឡាង ខណ្ឌទួលគោក ៩-ឈ្មោះអ៊ុក សុខរិទ្ធ អាយុ១៧ឆ្នាំ មានទីលំនៅផ្ទះលេខ778B ផ្លូវលេខ១៨៤ សង្កាត់ទឹកល្អក់ទី៣ ខណ្ឌទួលគោក ១០- ឈ្មោះ ជន ឌីណា អាយុ១៧ឆ្នាំ មានទីលំនៅសង្កាត់ទឹកល្អក់ទី៣ ១១-ឈ្មោះមករា អាយុ១៨ឆ្នាំ មានទីលំនៅ ផ្ទះលេខ15C សង្កាត់ស្ទឹងមានជ័យ ខណ្ឌមានជ័យ ១២-ឈ្មោះ ម៉ាត់ ប្រុសពៅ អាយុ១៧ឆ្នាំ មានទីលំនៅ ផ្ទះលេខ886E1 ផ្លូវ១២ សង្កាត់ទឹកល្អក់ទី៣ ខណ្ឌទួលគោក រាជធានីភ្នំពេញ ។
ក្រុមស្ទាវទាំង១២នាក់ ត្រូវបានកំលាំងប៉ូលិសខណ្ឌដង្កោធ្វើការចាប់ខ្លួនបានភ្លាមៗ ហើយពួកគេបានឱ្យ ដឹងថា ពួកគេគឺជាសិស្សវិទ្យាល័យសន្ធរម៉ុក ក្រុងភ្នំពេញ ។ មន្ដ្រីប៉ូលិសបានឱ្យដឹងថា នៅមុន ពេលកើតហេតុ ក្រុមជនស្ទាវទាំងនេះបានជិះម៉ូតូជាច្រើនគ្រឿងសុទ្ធតែស៊េរីទំនើបៗ ហើយនៅក្នុងដៃ មានកាន់ដាវសាមូរ៉ៃផង បានបើកប្រសេចប្រសាចបែបអនាធិបតេយ្យពេញផ្លូវប្រកបដោយអត្ដចរិត កោងកាចបំផុត និងក្នុងឯកសណ្ឋានជាកូនសិស្សសាលាទៀតផង។ មន្ដ្រីប៉ូលិសរូបនោះបានបន្ដថា ពេល ទៅដល់មុខគោលដៅឈរជើង២៤ម៉ោង របស់ប៉ុស្ដិ៍អន្ដរសង្កាត់ (ត្រញំងក្រសាំង) ប៉ូលិសក៏បានដេញតាម និងស្រែកតាមវិទ្យុទាក់ទងឱ្យប៉ូលិស ដែលកំពុងឈរជើងនៅតាមបណ្ដាគោលដៅនានា ជួយចេញស្ទាក់ ឃាត់ដើម្បីធ្វើការសាកសួរ។ ប្រភពខាងលើបានបន្ដថា បន្ទាប់ពីដឹងថាប៉ូលិសដេញតាម ក្រុមស្ទាវ ទាំងនោះបាននាំគ្នាបើកម៉ូតូរត់ដោយម៉ូតូនីមួយៗជិះឌុបគ្នាចាប់ពី២នាក់ឡើងទៅ។ ក្នុងខណៈនោះ កម្លាំង ប៉ូលិសប៉ុស្ដិ៍ផ្សេងៗ និងប៉ូលិសខណ្ឌដង្កោដឹកនាំដោយលោកវរសេនីយ៍ត្រីប៊ន សំអាត ជាអធិការបានចេញ ធ្វើការឡោមព័ទ្ធ ហើយក៏ចាប់បាន១២នាក់ភ្លាមៗ ចំណែកឯមួយចំនួនទៀតគេចខ្លួនរួច ។
ប្រភពដដែលបានបន្ដទៀតថា ក្រោយពេលឃាត់ខ្លួនប៉ូលិសដកហូតបានម៉ូតូស៊េរី ទំនើប៤គ្រឿង និង ដាវខ្លី២ដើម ចំណែកឯដាវសាមូរ៉ៃ និងកាំបិតមួយចំនួនទៀតត្រូវបានពួកគេបោះចោលតាមផ្លូវ ហើយ ពេលនេះប៉ូលិសនិងប្រជាពលរដ្ឋកំពុងតាមរកដាវ និងកាំបិតទាំងនោះហើយ។ ក្រោយពេលចាប់ខ្លួន ក្រុមជនស្ទាវទាំង១២នាក់នោះបានសារភាពខ្លះៗថា ពួកគេជាសិស្សនៅវិទ្យាល័យសន្ធរម៉ុក ហើយកាលពី ៤ថ្ងៃមុនក្រុមខ្លួន និងក្រុមយុវជនមួយក្រុមទៀតនៅវិទ្យាល័យ ហ៊ុន សែន ជម្ពូវ័ន សង្កាត់ចោមចៅ ខណ្ឌដង្កោ មានទំនាស់គ្នារហូតវាយតប់គ្នាបណ្ដាលឱ្យក្រុមខាងខ្លួនមានរបួសស្នាមទៀតផង។ ក្រុមស្ទាវ ទាំងនោះបានបន្ដថា បន្ទាប់ពីមានហេតុការណ៍បែបនេះពួកគេមានការក្ដៅក្រហាយខ្លាំងណាស់ នឹងមានគំនុំ រហូតមកដល់ថ្ងៃកើតហេតុ ពួកគេក៏បាននាំគ្នាជិះម៉ូតូប្រដាប់ដោយដាវដេញពីសាលាសន្ធរម៉ុក ឆ្ពោះទៅរកគូ ទំនាស់នៅវិទ្យាល័យហ៊ុន សែន ជម្ពូវ័ន ដើម្បីកាប់ចាក់សងសឹករំសាយគំនុំ ប៉ុន្ដែពុំទាន់បានជួបគូទំនាស់ផង ក៏ត្រូវប៉ូលិស ចាប់ខ្លួនបែបនេះតែម្ដង ។
លោកវរសេនីយ៍ត្រី ប៊ន សំអាត អធិការប៉ូលិសខណ្ឌដង្កោបានឱ្យដឹងថា ក្រុមស្ទាវទាំងនោះគឺជាក្រុម ក្មេងអន្ធពាល ពួកគេមានបំណងអុកឡុកសាលារៀនជម្ពូវ័ន ប៉ុន្ដែត្រូវបានកម្លាំងរបស់លោកបង្ក្រាប បានទាន់ពេលវេលា ។ ពេលនេះពួកគេកំពុងត្រូវបានឃុំខ្លួននៅអធិការដ្ឋានខណ្ឌដង្កោ ដើម្បីកសាង សំណុំរឿងបញ្ជូនទៅតុលាការ ។
Labels: សន្តិសុខ
for this post
Leave a Reply