បឺត សំខាន់ ក្លាយជាជើងឯកខ្សែក្រវាត់ K Cement ទម្ងន់ ៥៤ គ.ក្រ, សិង្ហ សារ៉ាក់ លេខ២, ពេជ្រ សីហា លេខ៣ និង សំរិត សុភាព លេខ៤
រាជធានីភ្នំពេញ ៖ បឺត សំខាន់ អ្នកប្រដាល់នៃក្លឹបសាលវ័ន្ដកីឡាដណ្ដើមបានតំណែងជាម្ចាស់ជើងឯក ខ្សែក្រវាត់ K cement ប្រភេទទម្ងន់៥៤គីឡូក្រាម បន្ទាប់ពីគេបានប្រកួតយកឈ្នះពិន្ទុ សិង្ហ សារ៉ាក់ មកពី ក្លឹបកងពលតូចឆត្រយោង៩១១រួចមក ។ ការប្រកួតវគ្គផ្ដាច់ព្រ័ត្ររវាងគូនេះ បានធ្វើឡើងនៅលើ សង្វៀនប៉ុសិ៍្ដលេខ៥ កាលពីល្ងាចថ្ងៃអាទិត្យទី២៧ ឧសភា កន្លងមកនេះ ។
សារ៉ាក់ ជួប សំខាន់ លើកនេះ គេវ៉ៃមិនសូវបានល្អសោះ ដោយសារតែគេមានការញញើតញញើត សំខាន់ខ្លាំងពេក។ ២ទឹកដំបូងសំខាន់មានប្រៀបជាងសារ៉ាក់ឆ្ងាយណាស់ តែចូលដល់ទឹកទី៣និងទី៤ សារ៉ាក់ បែរជាមានប្រៀបជាងសំខាន់ទៅវិញ ដោយគេបានរុញច្រានឱ្យសំខាន់ដួលអុកគូទទៅលើក្ដារតាពី ជាញឹក ញាប់។ លុះចូលដល់ទឹកទី៥ដែលជាទឹកចុងក្រោយសំខាន់បានធ្វើការវាយលុកទៅលើសារ៉ាក់ឥតដកដៃ ដោយគេបានប្រើកណ្ដាប់ដៃវ៉ៃចំៗលើផ្ទៃមុខរបស់សារ៉ាក់ រហូតដល់សារ៉ាក់មិនអាចធ្វើការតបតវិញបាន។ ដូច្នេះហើយទើបគណៈកម្មការចៅក្រមបានផ្ដល់ពិន្ទុឱ្យបឺតសំខាន់ជាអ្នកឈ្នះការប្រកួតនេះ ។ ដោយសារ ការបរាជ័យដ៏គួរឱ្យសោកស្ដាយនេះ សិង្ហ សារ៉ាក់ បានធ្លាក់មកនៅចំណាត់ថ្នាក់លេខ២ ឯចំណាត់ ថ្នាក់លេខ៣ បានទៅលើពេជ្រ សីហា មកពីសមាគមកីឡាកងយោធពលខេមរភូមិន្ទ បន្ទាប់ពីគេបាន យកឈ្នះលើសំរិត សុភាព មកពីខេត្ដកោះកុងដោយពិន្ទុរួចមក ។ ចំពោះគូនេះកាលពីប្រកួតវគ្គ ជំរុះក្នុងពូលពួកគេអត់បានជួបគ្នាទេ ដោយសារតែសីហាមានបញ្ហាផ្នែកសុខភាព ។
សំរាប់ចំណាត់ថ្នាក់លេខ១ ក្រៅពីទទួលបានខ្សែក្រវាត់ជើងឯកគឺមានទឹកប្រាក់អមជាមួយ ចំនួន៦លាន ៧សែនរៀលថែមទៀត, ចំណាត់ថ្នាក់លេខ២ទទួលបានពាន១ និងទឹកប្រាក់២លានរៀល, ចំណាត់ថ្នាក់លេខ ៣ ទទួលបានពាន១និងទឹកប្រាក់១លានរៀល និងចំណាត់ថ្នាក់លេខ៤ទទួលបានទឹកប្រាក់៥០ម៉ឺនរៀល ។
ចំពោះគូប្រកួតមិត្ដភាពវិញ សាំង ស៊ីថា មកពីសមាគមកីឡាខេមរភូមិន្ទបានប្រកួត ឈ្នះឡុង វិបុល មកពីក្លឹបសាលវ័ន្ដកីឡាដោយពិន្ទុ ។ រីឯភេទ ភីរម្យ មកពីក្លឹបសិង្ហកីឡាបានវាយផ្ដួលជា ដារិទ្ធ មកពីក្លឹបបឹងទំពុនឱ្យសន្លប់នៅក្នុងទឹកទី៤ ។ ចំណែកម៉ាក់ សុផាត មកពីក្លឹបតាឡីដំរីព្រេចដែលប្រកួតជា លក្ខណៈសាកលជាមួយសាម សុគន្ធ មកពីក្លឹបយោធភូមិភាគពិសេសនោះគេបានយក ឈ្នះសុគន្ធាដោយ ពិន្ទុ ។
Labels: កីឡា
for this post
Leave a Reply